ലോസ് ആഞ്ചലസ്: ഹോളിവുഡ് നടനും ഹാസ്യതാരവുമായ ജിം കാരി (64) ദീര്ഘകാല പങ്കാളി മിന് ആഹിനെ വിവാഹം ചെയ്തു. ലോസ് ആഞ്ചലസില് നടന്ന സ്വകാര്യ ചടങ്ങിലായിരുന്നു വിവാഹം. ലോസ് ആഞ്ചലസ് ആസ്ഥാനമായി പ്രവര്ത്തിക്കുന്ന നടിയും കലാകാരിയുമാണ് മിന്.
കാരി സ്വകാര്യ ജീവിതം പൊതുചര്ച്ചകളില് നിന്ന് അകറ്റിനിര്ത്തുന്ന വ്യക്തിയാണ്. വിവാഹത്തിന്റെ തീയതി, അതിഥികള് തുടങ്ങിയ കൂടുതല് വിവരങ്ങള് പുറത്തുവിട്ടിട്ടില്ല.
2026 ഫെബ്രുവരിയില് പാരീസില് നടന്ന ചടങ്ങിലാണ് ജിം കാരിയും മിന് ആഹും ആദ്യമായി ഒരുമിച്ച് പൊതുവേദിയില് പ്രത്യക്ഷപ്പെട്ടത്. ചടങ്ങില് കാരിക്ക് ഓണററി സീസര് പുരസ്കാരം ലഭിച്ചിരുന്നു.
ഫ്രഞ്ചില് നടത്തിയ സ്വീകരണ പ്രസംഗത്തില് കുടുംബാംഗങ്ങള്ക്ക് നന്ദി പറഞ്ഞ കാരി, മിന് ആഹിനെ പ്രത്യേകം പരാമര്ശിക്കുകയും 'തന്റെ മഹത്തായ ജീവിതപങ്കാളി' എന്ന് വിശേഷിപ്പിക്കുകയും ചെയ്തു.
ജിം കാരിയുടെ മൂന്നാമത്തെ വിവാഹമാണിത്. മെലിസ വോമറുമായി 1987-ല് വിവാഹിതനായി. 1995-ല് വേര്പിരിഞ്ഞു. ഇവര്ക്ക് ജെയ്ന് എറിന് കാരി എന്ന മകളുണ്ട്. സഹതാരം ലോറന് ഹോളിയുമായി 1996-ല് വിവാഹിതനായി; 1997-ല് വിവാഹമോചിതരായി.
നടിയും കലാകാരിയുമായ മിന് ആഹ് പൊതുജീവിതത്തില് അധികം സജീവമല്ല. അവരുടെ സിനിമാ പ്രവര്ത്തനങ്ങളെക്കുറിച്ചും വ്യക്തിജീവിതത്തെക്കുറിച്ചും പൊതുവില് ലഭ്യമായ വിവരങ്ങള് പരിമിതമാണ്. ഫെബ്രുവരിയില് കാരിക്കൊപ്പം എത്തിയതോടെയാണ് അവര് കൂടുതല് ശ്രദ്ധ നേടിയത്. അന്ന് കാരിയുടെ മകള് ജെയ്ന്, കൊച്ചുമകന് ജാക്സണ് എന്നിവര് കൂടെയുണ്ടായിരുന്നു.
Related News