ജിദ്ദ: പുതുതലമുറയായ 'ജെന് ആല്ഫ'യെ (Generation Alpha) ബാധിക്കുന്ന വിഷയങ്ങള് ചര്ച്ച ചെയ്യുന്നതിനും അവരുടെ ഭാവിയെക്കുറിച്ചുള്ള തീരുമാനങ്ങളില് സ്വാധീനം ചെലുത്തുന്നതിനുമായി കൗമാരക്കാരിയായ സൗദി കണ്ടന്റ് ക്രിയേറ്ററും പോഡ്കാസ്റ്റ് അവതാരകയുമായ റത്തീല് അല്ഷെഹ്രി 'റത്തീല് കൗണ്സില്' ആരംഭിച്ചു. യുവതലമുറയ്ക്ക് തങ്ങളുടെ കാഴ്ചപ്പാടുകള് പങ്കുവെക്കാനും, വെല്ലുവിളികള് ചര്ച്ച ചെയ്യാനും, ഭാവിയിലേക്കുള്ള ശുപാര്ശകള് രൂപീകരിക്കാനുമുള്ള ഒരു വേദിയായാണ് ഇത് വിഭാവനം ചെയ്തിരിക്കുന്നത്.
അടുത്ത തലമുറയെക്കുറിച്ചുള്ള തീരുമാനങ്ങള് മുതിര്ന്നവര് എടുക്കുമ്പോള് എന്തുകൊണ്ട് കുട്ടികളെക്കൂടി ആ ചര്ച്ചകളില് ഉള്പ്പെടുത്തുന്നില്ല എന്ന ലളിതമായ ചോദ്യമാണ് ഇത്തരമൊരു കൗണ്സില് രൂപീകരിക്കാന് റത്തീലിന് പ്രചോദനമായത്.
'ഞങ്ങളുടെ തലമുറയെക്കുറിച്ച് ആളുകള് സംസാരിക്കുമ്പോഴെല്ലാം മുതിര്ന്നവര് മാത്രമാണ് സംസാരിക്കുന്നത്. ഞങ്ങളുടെ വിദ്യാഭ്യാസം, ഭാവി, വെല്ലുവിളികള്, സ്ക്രീന് സമയം എന്നിവയെക്കുറിച്ചെല്ലാം അവര് ചര്ച്ച ചെയ്യുന്നു. എന്നാല് ഞങ്ങളുടെ അഭിപ്രായം എന്താണെന്ന് അവര് എത്രത്തോളം ചോദിക്കാറുണ്ട്? ചോദ്യങ്ങള് ചോദിക്കാനും വിയോജിക്കാനും ആശയങ്ങള് പങ്കുവെക്കാനും ഒരുമിച്ച് തീരുമാനങ്ങളെടുക്കാനും ഞങ്ങള്ക്ക് സ്വന്തമായി ഒരു വേദി ഉണ്ടായിരുന്നെങ്കില് എന്ന് ഞാന് ചിന്തിച്ചു,' അല്ഷെഹ്രി പറഞ്ഞു.
വെറും ചര്ച്ചകളില് മാത്രം ഒതുങ്ങുന്ന പരമ്പരാഗത യുവജന ഫോറങ്ങളില് നിന്ന് വ്യത്യസ്തമായി, പങ്കാളികള്ക്ക് കൂട്ടായി ശുപാര്ശകള് രൂപീകരിക്കാനും സ്വന്തമായി സംരംഭങ്ങള് ആരംഭിക്കാനും കഴിയുന്ന ഒരു പ്രക്രിയയാണ് റത്തീല് കൗണ്സില് ലക്ഷ്യമിടുന്നത്. യുവജനങ്ങളുമായി ബന്ധപ്പെട്ട ഒരു പ്രധാന ചോദ്യമോ വിഷയമോ ഉന്നയിച്ചുകൊണ്ടായിരിക്കും ഓരോ കൗണ്സില് സെഷനും ആരംഭിക്കുക.
ഓരോ യോഗത്തിലും അംഗങ്ങള് ആശയങ്ങള് ചര്ച്ച ചെയ്യുകയും, ശുപാര്ശകളില് വോട്ടെടുപ്പ് നടത്തുകയും, തീരുമാനങ്ങള് രേഖപ്പെടുത്തുകയും ചെയ്യും. തുടര്ന്ന് ഈ ശുപാര്ശകള് നടപ്പിലാക്കാന് സഹായിക്കുന്ന സംഘടനകള്ക്കും നയരൂപീകരണ വിദഗ്ധര്ക്കും കൈമാറും. സ്ഥാപനങ്ങളെ മാത്രം ആശ്രയിക്കാതെ സ്വന്തം സമൂഹത്തില് ആശയങ്ങള് നടപ്പിലാക്കാന് യുവജനങ്ങള് തന്നെ ഉത്തരവാദിത്തം ഏറ്റെടുക്കണമെന്നും റത്തീല് വ്യക്തമാക്കി. മുതിര്ന്നവരുടെ മാര്ഗനിര്ദ്ദേശം വേണ്ടെന്നല്ല, മറിച്ച് തങ്ങളുടെ വാക്കുകള് കൂടി അവര് കേള്ക്കണമെന്നാണ് ജെന് ആല്ഫ ആഗ്രഹിക്കുന്നതെന്നും അവര് കൂട്ടിച്ചേര്ത്തു.
ജെന് ആല്ഫയെക്കുറിച്ചുള്ള പൊതുവായ തെറ്റിദ്ധാരണകള് മാറ്റിയെടുക്കാനും ഈ സംരംഭം ലക്ഷ്യമിടുന്നു. 'പഴയ തലമുറ ഞങ്ങളെ വെറുമൊരു 'സ്ക്രീന് തലമുറ' (Screen Generation) ആയിട്ടാണ് കാണുന്നത്. സാങ്കേതികവിദ്യയ്ക്കൊപ്പമാണ് ഞങ്ങള് വളര്ന്നത് എന്നത് ശരിയാണ്, പക്ഷേ അതിനര്ത്ഥം ഞങ്ങള് യഥാര്ത്ഥ ലോകത്തില് നിന്ന് അകന്നുനില്ക്കുന്നു എന്നല്ല. സര്ഗ്ഗാത്മകത, സംരംഭകത്വം, സാമൂഹിക മാറ്റം എന്നിവയില് ഞങ്ങളുടെ തലമുറയ്ക്ക് വലിയ താല്പര്യമുണ്ട്,' റത്തീല് പറഞ്ഞു.
നേരത്തെ ടെഡ്എക്സ് പരിപാടികളില് അവതാരകയായിട്ടുള്ള റത്തീല്, ഈ വര്ഷത്തെ ജോയ് അവാര്ഡ്സില് 'പ്രിയപ്പെട്ട വനിതാ ഇന്ഫ്ലുവന്സര്' പുരസ്കാരം നേടിയിരുന്നു. 2026-ല് 'ഫാസ്റ്റ് കമ്പനി മിഡില് ഈസ്റ്റിന്റെ' ബിസിനസ്സ് രംഗത്തെ ഏറ്റവും സര്ഗ്ഗാത്മകതയുള്ള വ്യക്തികളില് ഒരാളായും അവര് തിരഞ്ഞെടുക്കപ്പെട്ടിട്ടുണ്ട്.
സൗദി അറേബ്യയുടെ 'വിഷന് 2030'-ന്റെ ഭാഗമായി വിദ്യാഭ്യാസം, സാങ്കേതികവിദ്യ, സംരംഭകത്വം, സാംസ്കാരിക വികസനം എന്നിവയിലൂടെ യുവജനങ്ങള്ക്ക് വലിയ അവസരങ്ങളാണ് ലഭിക്കുന്നത്. ഈ അവസരങ്ങള് പ്രയോജനപ്പെടുത്തുക മാത്രമല്ല, പുതിയ അവസരങ്ങള് സൃഷ്ടിക്കാന് കൂടി ജെന് ആല്ഫയ്ക്ക് സാധിക്കുമെന്ന് റത്തീല് പ്രത്യാശ പ്രകടിപ്പിച്ചു. ജിദ്ദയില് തുടങ്ങിയ ഈ കൗണ്സില് സൗദി അറേബ്യയിലുടനീളവും ഭാവിയില് അന്താരാഷ്ട്ര തലത്തിലേക്കും വ്യാപിപ്പിക്കാനാണ് റത്തീല് ലക്ഷ്യമിടുന്നത്.
'യുവജനങ്ങളെ ബാധിക്കുന്ന ഒരു പ്രധാന തീരുമാനം ചര്ച്ച ചെയ്യപ്പെടുമ്പോള്, 'നമ്മള് കൗണ്സിലിനോട് അഭിപ്രായം ചോദിച്ചോ?' എന്ന് ആരെങ്കിലും ചോദിക്കുന്ന ഒരു ദിവസമാണ് എന്റെ സ്വപ്നം. അന്നായിരിക്കും ഞങ്ങള് ഒരു മാറ്റമുണ്ടാക്കിയെന്ന് എനിക്ക് ബോധ്യപ്പെടുക,' റത്തീല് അല്ഷെഹ്രി പറഞ്ഞു.