കൊച്ചി: കേരള സര്ക്കാരിന്റെ പ്രവാസി കേരളീയകാര്യ വകുപ്പിന്റെയും (നോര്ക്ക) ലോക കേരള സഭയുടെയും ആഭിമുഖ്യത്തില് നോര്ക്ക പ്രൊഫഷണല് ആന്ഡ് ബിസിനസ് ലീഡര്ഷിപ്പ് മീറ്റ് സെപ്റ്റംബര് 27 ന് കൊച്ചി ഗ്രാന്ഡ് ഹയാത്തില് നടക്കും. ലോകത്തിന്റെ വിവിധ ഭാഗങ്ങളില് നിന്നായി 50 പ്രമുഖ മലയാളി പ്രൊഫഷണലുകള്, സിഇഒമാര്, സംരംഭകര്, ശാസ്ത്രജ്ഞര്, സാങ്കേതിക വിദഗ്ധര്, ആരോഗ്യ രംഗത്തെ പ്രമുഖര്, സ്റ്റാര്ട്ടപ്പ് സംരംഭകര്, അക്കാദമിക് വിദഗ്ധര്, വ്യവസായ പ്രമുഖര് എന്നിവരും കേരള സര്ക്കാരിലെ മുതിര്ന്ന നയരൂപകരും വ്യവസായ രംഗത്തെ പ്രതിനിധികളും പങ്കെടുക്കുന്ന പ്രത്യേക ക്ഷണിതാക്കളുടെ സമ്മേളനമായാണ് മീറ്റ് വിഭാവനം ചെയ്തിട്ടുള്ളത്.
കഴിഞ്ഞ ആറു പതിറ്റാണ്ടുകളില് പ്രവാസി മലയാളികളില് വലിയൊരു പങ്ക് ലോകോത്തര പ്രൊഫഷണലുകളും വ്യവസായികളും ആയി മാറിയിട്ടുണ്ട്. ബഹുരാഷ്ട്ര കമ്പനികളിലും സര്വകലാശാലകളിലും ആരോഗ്യസ്ഥാപനങ്ങളിലുമെല്ലാം അവര് മുന്നിരയില് പ്രവര്ത്തിക്കുന്നുണ്ട്. ഈ മാറ്റം മുന്നിര്ത്തി, കേരളത്തിന്റെ വികസന കാഴ്ചപ്പാടുമായി പ്രവാസി മലയാളികളുടെ വൈദഗ്ധ്യവും അനുഭവവും കൂട്ടിച്ചേര്ക്കുന്നതിന് ഇതിലൂടെ വേദി സൃഷ്ടിക്കുകയാണ്.
കേരളത്തിന്റെ ദീര്ഘകാല വികസന ലക്ഷ്യങ്ങളുമായി പ്രവാസികളുടെ പങ്കാളിത്തം ശക്തിപ്പെടുത്തുക, ആരോഗ്യം, ഭാവി സാങ്കേതികവിദ്യകള്, പുതു ഊര്ജം - സുസ്ഥിര വികസനം - കാലാവസ്ഥ, വിദ്യാഭ്യാസം - ഭാവിയിലേക്കുള്ള നൈപുണ്യ വികസനം, സാമൂഹിക നവീകരണം എന്നീ മേഖലകളില് സഹകരണ പദ്ധതികള് ആരംഭിക്കുക, ഗ്ലോബല് അംബാസഡര്മാരായി പ്രവാസി മലയാളികളെ ഉയര്ത്തിക്കാട്ടി കേരളത്തിന്റെ ആഗോള പ്രതിഛായ വര്ധിപ്പിക്കുക, അതിലൂടെ നിക്ഷേപം ആകര്ഷിക്കുക എന്നതാണ് പരിപാടിയുടെ ലക്ഷ്യം.
ആരോഗ്യം, സാങ്കേതിക വിദ്യ, ഊര്ജ്ജം , വിദ്യാഭ്യാസം, സാമൂഹിക നവീകരണം എന്നീ മേഖലകളില് സഹകരണം, നയരൂപീകരണ മാര്ഗനിര്ദേശങ്ങള്, നിക്ഷേപ സാധ്യതകള് സംബന്ധിച്ച് പ്രവാസി പ്രതിനിധികളും സര്ക്കാര് പ്രതിനിധികളുമായുള്ള ചര്ച്ചകളും പരിപാടിയുടെ ഭാഗമായി ഉണ്ടാകും. ഗവേഷണ വികസന മേഖലയില് സഹകരണ പദ്ധതികള് സൃഷ്ടിക്കുക, പ്രവാസി നേതൃത്വത്തിലുള്ള മെന്ററിംഗ്, നൈപുണ്യ വികസന പദ്ധതികള് ആരംഭിക്കുക, വിദഗ്ധ ഉപദേശക സമിതികള് രൂപീകരിക്കുക. പ്രധാന മേഖലകളില് പൈലറ്റ് പ്രോജക്റ്റുകള് തുടങ്ങുക എന്നിവയും ലക്ഷ്യം വയ്ക്കുന്നു.
Related News
