ദുബായ്: ഇന്ത്യക്കെതിരായ സൂപ്പര് 4 മത്സരത്തിന് മുന്നോടിയായി പാകിസ്ഥാന് ക്രിക്കറ്റ് ടീം മനഃശാസ്ത്ര യുദ്ധം ആരംഭിച്ചതായി റിപ്പോര്ട്ട്. ദുബായില് നടന്ന പരിശീലന സെഷനിടെ പാകിസ്ഥാന് കളിക്കാര് '6-0, 6-0' എന്ന് മുദ്രാവാക്യം വിളിച്ചതായി ടൂര്ണമെന്റ് റിപ്പോര്ട്ട് ചെയ്യാനെത്തിയ ഇന്ത്യന് മാധ്യമപ്രവര്ത്തകര് സമൂഹമാധ്യമങ്ങളില് ആരോപിച്ചു.
ഓപ്പറേഷന് സിന്ദൂറിന് ശേഷമുണ്ടായ നാല് ദിവസത്തെ സംഘര്ഷത്തില് ആറ് ഇന്ത്യന് പോര്വിമാനങ്ങള് തകര്ത്തുവെന്ന പാകിസ്ഥാന്റെ അവകാശവാദത്തെയാണ് '6-0' എന്ന മുദ്രാവാക്യം സൂചിപ്പിക്കുന്നത്. അതേസമയം, അഞ്ച് പാക് പോര്വിമാനങ്ങളും ഒരു വലിയ നിരീക്ഷണ വിമാനവും തകര്ത്തതായി ഇന്ത്യന് വ്യോമസേന വ്യക്തമാക്കിയിട്ടുണ്ട്.
ഞായറാഴ്ചത്തെ മത്സരത്തിന് മുന്നോടിയായി നടന്ന പത്രസമ്മേളനത്തില് പങ്കെടുക്കാന് പാകിസ്ഥാന് ടീം വിസമ്മതിച്ചതും മത്സരം വിവാദത്തില് കലാശിക്കുമെന്നതിന്റെ സൂചനയായി. ഗ്രൂപ്പ് ഘട്ടത്തിലെ 'ഹസ്തദാന' വിവാദത്തില് പ്രതിഷേധിച്ചാണ് പാകിസ്ഥാന്റെ ഈ നടപടി.
ഗ്രൂപ്പ് ഘട്ടത്തില് ഇന്ത്യ പാകിസ്ഥാനെതിരെ ആധിപത്യം പുലര്ത്തിയിരുന്നു. എന്നാല്, മത്സരശേഷം ഇന്ത്യന് കളിക്കാര് പാക് താരങ്ങളുമായി ഹസ്തദാനം ചെയ്യാന് വിസമ്മതിച്ചത് വലിയ വിവാദങ്ങള്ക്ക് വഴിവെച്ചു. ഏപ്രിലില് നടന്ന പഹല്ഗാം ഭീകരാക്രമണത്തില് പ്രതിഷേധിച്ചാണ് ഈ നടപടിയെന്ന് ഇന്ത്യന് ടീം വ്യക്തമാക്കി. സംഭവത്തെത്തുടര്ന്ന് പാകിസ്ഥാന് ക്രിക്കറ്റ് ബോര്ഡ് (പി.സി.ബി) ഐ.സി.സിക്ക് ഔദ്യോഗികമായി പരാതി നല്കുകയും, പക്ഷപാതം ആരോപിച്ചുകൊണ്ട് മാച്ച് റഫറി ആന്ഡി പൈക്രോഫ്റ്റിനെ മാറ്റണമെന്ന് ആവശ്യപ്പെടുകയും ചെയ്തു. എന്നാല്, ഐ.സി.സി ഈ ആവശ്യം രണ്ടുതവണ തള്ളി. പൈക്രോഫ്റ്റിനെ വീണ്ടും മാച്ച് റഫറിയായി നിയമിച്ച ഐ.സി.സി തീരുമാനം പി.സി.ബിയില് കൂടുതല് രോഷത്തിന് കാരണമായേക്കാം.
മത്സരത്തിന് പുറത്തുള്ള നാടകീയ സംഭവങ്ങള്ക്കിടയിലും, ദുബായ് അന്താരാഷ്ട്ര സ്റ്റേഡിയത്തില് നിറഞ്ഞ സദസ്സിന് മുന്നില് ഇരുടീമുകളും കളിക്കളത്തിലിറങ്ങുമെന്നാണ് പ്രതീക്ഷ. എന്നാല്, പാകിസ്ഥാനുമായി 'കൈകൊടുക്കില്ല' എന്ന നിലപാട് ക്യാപ്റ്റന് സൂര്യകുമാറും ടീം ഇന്ത്യയും തുടരുമോ എന്നതിലാണ് എല്ലാവരുടെയും ശ്രദ്ധ.
Related News
