ബീജിംഗ്- ചൈനയില്‍ ഫുഡ് ഡെലിവറി പ്ലാറ്റ്‌ഫോമുകള്‍ തമ്മിലുള്ള കടുത്ത മത്സരത്തെ തുടര്‍ന്ന് റെസ്റ്റോറന്റുകളും ടീ ശൃംഖലകളും പ്രതിസന്ധിയില്‍. ഉപയോക്താക്കള്‍ക്ക് 14 സെന്റിന് കാപ്പിയും 50 സെന്റിന് ഭക്ഷണവും ലഭിക്കുമ്പോള്‍ ഉപഭോക്താക്കളുടെ എണ്ണം കുറയുന്നതിന്റെ കണക്കെടുപ്പിലാണ് റസ്റ്റോറന്റുകള്‍.

പ്രമുഖ റെസ്റ്റോറന്റുകളും കഫേകളും പുറത്തുവിട്ട സാമ്പത്തിക വിവരങ്ങള്‍ ബ്ലൂംബെര്‍ഗ് ന്യൂസ് വിശകലനം ചെയ്തതില്‍, ഈ വര്‍ഷത്തിന്റെ ആദ്യ പകുതിയില്‍, പ്രത്യേകിച്ച് വിലയുദ്ധം പൊട്ടിപ്പുറപ്പെട്ട ജൂണ്‍ വരെയുള്ള മൂന്ന് മാസങ്ങളില്‍, ഓണ്‍ലൈന്‍ പ്രമോഷനുകള്‍ ഈ സ്ഥാപനങ്ങള്‍ക്ക് വലിയ നഷ്ടമുണ്ടാക്കിയതായി കാണിക്കുന്നു.

ഹാദിലാവോ ഇന്റര്‍നാഷണല്‍ ഹോള്‍ഡിംഗ്, ടായ് എര്‍ തുടങ്ങിയ റെസ്റ്റോറന്റുകള്‍ ആദ്യ പകുതിയില്‍ വില്‍പ്പനയില്‍ 20% വരെ ഇടിവ് രേഖപ്പെടുത്തി. അലിബാബ, മെയ്റ്റുവന്‍, ജെഡി.കോം തുടങ്ങിയ പ്ലാറ്റ്‌ഫോമുകളുടെ ഡെലിവറി സേവനങ്ങളിലേക്ക് ഉപഭോക്താക്കള്‍ മാറിയതോടെ റെസ്റ്റോറന്റുകളിലെ ഉപഭോക്താക്കളുടെ എണ്ണത്തിലും കാര്യമായ കുറവുണ്ടായി.

റെസ്റ്റോറന്റുകള്‍ക്ക് ഡെലിവറി മൂലമുള്ള സമ്മര്‍ദ്ദം

കുറഞ്ഞ വിലയിലുള്ള ഓഫറുകള്‍ ഡെലിവറി പ്ലാറ്റ്‌ഫോമുകള്‍ക്ക് ഉപയോക്താക്കളെ ആകര്‍ഷിക്കാനും ചൈനയിലെ 80 ബില്യണ്‍ ഡോളറിന്റെ ഫുഡ് ഡെലിവറി വിപണിയില്‍ തങ്ങളുടെ വിഹിതം വര്‍ദ്ധിപ്പിക്കാനും സഹായിക്കുമെങ്കിലും, ഇത് റെസ്റ്റോറന്റുകള്‍ക്ക് ഒരേ സമയം വില്‍പ്പന വര്‍ദ്ധിപ്പിക്കുകയും ദുര്‍ബലപ്പെടുത്തുകയും ചെയ്യുന്ന ഒരു പ്രശ്നമാണ് സൃഷ്ടിക്കുന്നത്. ഓണ്‍ലൈന്‍ പ്രമോഷനുകള്‍ കുറഞ്ഞ സമയത്തിനുള്ളില്‍ നൂറുകണക്കിന് ഓര്‍ഡറുകള്‍ക്ക് കാരണമാവുകയും ജീവനക്കാരെ ജോലി ഭാരം കൊണ്ട് തളര്‍ത്തുകയും ചെയ്യും. ഇത് റെസ്റ്റോറന്റുകളില്‍ നേരിട്ടെത്തുന്ന ഉപഭോക്താക്കള്‍ക്ക് വേണ്ടത്ര പരിഗണന ലഭിക്കാത്ത അവസ്ഥയും ഉണ്ടാക്കുന്നു.

ഷാങ്ഹായില്‍ നാല് ശാഖകളുള്ള നൂഡില്‍സ് റെസ്റ്റോറന്റ് ഉടമയായ ചെന്‍ ക്വിയാങ് നേരിടുന്നത് ഈ പ്രശ്നമാണ്. 25 യുവാനില്‍ കൂടുതലുള്ള വാങ്ങലുകള്‍ക്ക് 24 യുവാനിന്റെ കൂപ്പണുകള്‍ അവതരിപ്പിച്ചതോടെ അദ്ദേഹത്തിന്റെ ജീവനക്കാര്‍ക്ക് ഡെലിവറി ഓര്‍ഡറുകളുടെ പ്രളയമായി. ജൂലൈ ആയപ്പോഴേക്കും, സാധാരണ ഉപഭോക്താക്കള്‍ സേവനം മന്ദഗതിയിലാണെന്ന് പരാതിപ്പെട്ടതിനെത്തുടര്‍ന്ന് ഉച്ചഭക്ഷണ സമയങ്ങളില്‍, അതായത് 11:40 മുതല്‍ 12:20 വരെ, ഡെലിവറി നിര്‍ത്തിവെക്കേണ്ടിവന്നു.

'ഞങ്ങള്‍ എപ്പോഴും തിരക്കിലാണ്, പക്ഷെ ലാഭം കുറവാണ്. കാരണം, കുറഞ്ഞ വിലയിലുള്ള ഓണ്‍ലൈന്‍ ഓര്‍ഡറുകള്‍ റെസ്റ്റോറന്റിലെത്തുന്ന ഉപഭോക്താക്കളെ നഷ്ടപ്പെടുത്തുന്നു.' ക്വിയാങ് പറഞ്ഞു.

കെ.എഫ്.സി, പിസ്സ ഹട്ട് ശൃംഖലകളുടെ ഓപ്പറേറ്ററായ യം ചൈന ഹോള്‍ഡിംഗ്‌സ്, വര്‍ദ്ധിച്ച ഓര്‍ഡര്‍ കാരണം ഡെലിവറി ചെലവിലുണ്ടായ ഗണ്യമായ വര്‍ദ്ധനവ് വിപരീത ഫലം സൃഷ്ടിച്ചതായി കഴിഞ്ഞ ഓഗസ്റ്റിലെ വരുമാന റിപ്പോര്‍ട്ടില്‍ വ്യക്തമാക്കി. ജൂണില്‍ അവസാനിച്ച പാദത്തില്‍ പ്രതീക്ഷിച്ചതിലും മികച്ച വരുമാനം രേഖപ്പെടുത്തിയിട്ടും, കടുത്ത മത്സരം ലാഭക്ഷമതയെ ബാധിക്കുമെന്ന നിക്ഷേപകരുടെ ആശങ്ക കാരണം കമ്പനിയുടെ ഓഹരികള്‍ ഇടിഞ്ഞു.

നിയന്ത്രണ അതോറിറ്റികള്‍ 'അന്യായമായ മത്സരം തടയുക, ഹാനികരമായ സബ്സിഡികള്‍ ഒഴിവാക്കുക' എന്ന് ആഹ്വാനം ചെയ്തിട്ടും, പുതിയ സബ്സിഡികള്‍ അവതരിപ്പിച്ച് കുറഞ്ഞ വിലയിലുള്ള പ്രചാരണങ്ങള്‍ തുടരുകയാണ്. ഈ തന്ത്രം ഒടുവില്‍ ഗുണങ്ങളേക്കാള്‍ കൂടുതല്‍ ദോഷകരമായ പ്രത്യാഘാതങ്ങള്‍ ഉണ്ടാക്കുമെന്ന് പലരും ഭയപ്പെടുന്നു.