വാഷിംഗ്ടണ്‍ ഡി.സി: ഡൊണാള്‍ഡ് ട്രംപിന്റെ പുതിയ H-1B വിസ ഫീസ് വര്‍ദ്ധനവ്, ടെക് കമ്പനികളില്‍ നിന്ന് പിരിച്ചുവിടപ്പെട്ട ആയിരക്കണക്കിന് പ്രൊഫഷണലുകള്‍ക്ക് അനുഗ്രഹമായി മാറിയേക്കാം. പുതിയ H-1B വിസയ്ക്ക് 100,000 ഡോളര്‍ ഫീസ് ഏര്‍പ്പെടുത്തിയ തീരുമാനമാണ് ഈ മാറ്റത്തിന് വഴിയൊരുക്കുന്നത്. പുതിയ ജീവനക്കാരെ റിക്രൂട്ട് ചെയ്യുന്നതിന് വലിയ തുക മുടക്കുന്നതിന് പകരം, നിലവില്‍ H-1B വിസയുള്ളവരെ തന്നെ നിയമിക്കാന്‍ കമ്പനികള്‍ തയ്യാറായേക്കും. ഇത് അടുത്തിടെ ജോലി നഷ്ടപ്പെട്ടവര്‍ക്ക് പുതിയ തൊഴിലവസരങ്ങള്‍ നേടാന്‍ സഹായിച്ചേക്കാം.

റിപ്പോര്‍ട്ടുകള്‍ പ്രകാരം, 2025-ന്റെ തുടക്കം മുതല്‍ ഇതുവരെ 533 തവണകളായി 1,44,926 ടെക് ജീവനക്കാരെയാണ് വിവിധ കമ്പനികള്‍ പിരിച്ചുവിട്ടത്. കഴിഞ്ഞ വര്‍ഷം ഇത് 1,115 തവണകളിലായി 2,38,461 പേര്‍ക്കായിരുന്നു. ഒറാക്കിള്‍, ഇന്റല്‍, മൈക്രോസോഫ്റ്റ്, AWS തുടങ്ങിയ പ്രമുഖ കമ്പനികളിലും വലിയ തോതിലുള്ള പിരിച്ചുവിടലുകള്‍ നടന്നിട്ടുണ്ട്.

പുതിയ ഫീസ് വര്‍ദ്ധനവ്, പുതിയ H-1B അപേക്ഷകര്‍ക്ക് മാത്രമാണ് ബാധകമാവുകയെന്ന് വൈറ്റ് ഹൗസ് വ്യക്തമാക്കിയിട്ടുണ്ട്. നിലവിലെ H-1B വിസയുള്ളവര്‍, വിസ പുതുക്കുന്നവര്‍, തൊഴില്‍ ദാതാക്കളെ മാറ്റുന്നവര്‍ എന്നിവര്‍ക്ക് ഈ ഫീസ് വര്‍ദ്ധനവ് ബാധകമല്ല. ഇത് പിരിച്ചുവിട്ട ജീവനക്കാര്‍ക്ക് വലിയ ആശ്വാസമാണ്. പിരിച്ചുവിടപ്പെട്ട H-1B വിസക്കാര്‍ക്ക് പുതിയ ജോലി കണ്ടെത്താന്‍ 60 ദിവസത്തെ സമയം ലഭിക്കും. ഈ സമയത്തിനുള്ളില്‍ ജോലി കണ്ടെത്താന്‍ കഴിഞ്ഞില്ലെങ്കില്‍ അവര്‍ക്ക് അമേരിക്ക വിടേണ്ടി വരും. അതിനാല്‍, പുതിയ ഫീസ് വര്‍ദ്ധനവ് തൊഴിലുടമകളെ പഴയ ജീവനക്കാരെ തിരികെ വിളിക്കാന്‍ പ്രേരിപ്പിച്ചേക്കാം എന്ന് യു.എസ്. ഇമിഗ്രേഷന്‍ നിയമ വിദഗ്ധന്‍ നവനീത് എസ് ചുഗ് അഭിപ്രായപ്പെട്ടു.