റിയാദ്: സര്‍ക്കാര്‍ ലേലങ്ങളിലും ടെന്‍ഡറുകളിലും ഒത്തുകളിയും ഏകോപനവും നടത്തിയെന്ന് തെളിഞ്ഞതിനെത്തുടര്‍ന്ന് നിരവധി സ്ഥാപനങ്ങള്‍ക്കെതിരെ ജനറല്‍ അതോറിറ്റി ഫോര്‍ കോമ്പറ്റീഷന്‍ പിഴ ചുമത്തിയതായി പ്രഖ്യാപിച്ചു.
ഇരുപത്തിനാല് സ്ഥാപനങ്ങള്‍ക്കെതിരെ ആകെ 17,291,831 റിയാലാണ് പിഴ ചുമത്തിയത്. നിയമം ലംഘിച്ച സ്ഥാപനങ്ങള്‍ക്കെതിരെ ക്രിമിനല്‍ നടപടികള്‍ ആരംഭിക്കുന്നതിന് അതോറിറ്റിയുടെ ഡയറക്ടര്‍ ബോര്‍ഡ് അംഗീകാരം നല്‍കുകയും കേസ് നിയമ ലംഘനങ്ങള്‍ പരിഹരിക്കുന്നതിനുള്ള കമ്മിറ്റിക്ക് കൈമാറുകയും ചെയ്തിട്ടുണ്ട്.

സര്‍ക്കാര്‍ ലേലങ്ങളിലോ ടെന്‍ഡറുകളിലോ മത്സര നിയമം ലംഘിച്ച് ഒത്തുകളിയും ഏകോപനവും നടത്തിയ നിരവധി സ്ഥാപനങ്ങളെ അതോറിറ്റി നിരീക്ഷിച്ചു. സംശയം തോന്നിയ ഇടപാടുകളില്‍ ആവശ്യമായ അന്വേഷണങ്ങള്‍ക്കും ചോദ്യം ചെയ്യലുകള്‍ക്കും ശേഷമാണ് നടപടി കൈക്കൊണ്ടത്. കോമ്പറ്റീഷന്‍ നിയമത്തിലെ അഞ്ചാം വകുപ്പിലെ ഖണ്ഡിക (8) ലംഘിച്ചതിനാണ് ശിക്ഷ. സ്ഥാപനങ്ങള്‍ തമ്മിലുള്ള രേഖാമൂലമുള്ളതോ വാക്കാലുള്ളതോ ആയ, വ്യക്തമായതോ പരോക്ഷമായതോ ആയ കരാറുകള്‍, അവയുടെ ലക്ഷ്യം മത്സരത്തെ തടസ്സപ്പെടുത്തുകയാണെങ്കില്‍, പ്രത്യേകിച്ചും സര്‍ക്കാര്‍ ലേലങ്ങളിലും മറ്റുമുള്ള ഒത്തുകളിയും ഏകോപനവും മത്സരത്തെ തടസ്സപ്പെടുത്തുന്ന രീതിയിലാണെങ്കില്‍, അവ നിരോധിക്കപ്പെട്ടിരിക്കുന്നു എന്നതാണ് ഈ വകുപ്പ്.