ജയ്പുര്‍: രാജസ്ഥാന്‍ ജയ്പൂരിലെ സവായ് മാന്‍ മാന്‍ സിങ് ആശുപത്രിയിലെ ഐസിയുവിലുണ്ടായ തീപിടിത്തത്തില്‍ 8 പേര്‍ മരിച്ചു. ഷോര്‍ട്ട് സര്‍ക്യൂട്ടാണ് കാരണമെന്നാണ് പ്രാഥമിക നിഗമനം. തീപിടിത്തം ഉണ്ടായപ്പോള്‍ 11 രോഗികള്‍ ഐസിയുവില്‍ ഉണ്ടായിരുന്നതായി അധികൃതര്‍ പറഞ്ഞു. മരിച്ചവരില്‍ 4 പുരുഷന്‍മാരും 2 സ്ത്രീകളുമുണ്ട്.

പിന്റു, ദിലീപ്, ശ്രീനാഥ്, രുക്മിണി, ഖുഷ്മ, സര്‍വേഷ്, ബഹാദുര്‍, ദിഗംബര്‍ വര്‍മ എന്നിവരാണ് മരിച്ചത്. മറ്റൊരു ഐസിയുവിലുണ്ടായിരുന്ന 14 പേര്‍ സുരക്ഷിതരാണെന്ന് അധികൃതര്‍ പറഞ്ഞു. ആശുപത്രിക്കുള്ളില്‍ പുക നിറഞ്ഞതോടെ രോഗികള്‍ പരിഭ്രാന്തരായി ഓടി. ഐസിയുവിലെ ഉപകരണങ്ങളും ആശുപത്രി രേഖകളും കത്തിനശിച്ചു. മുഖ്യമന്ത്രി ഭജന്‍ലാല്‍ ശര്‍മയും മന്ത്രിമാരും ആശുപത്രി സന്ദര്‍ശിച്ചു. ആശുപത്രി ജീവനക്കാരുടെ അനാസ്ഥയാണ് അപകടത്തിനു വഴിയൊരുക്കിയതെന്ന് രോഗികളുടെ ബന്ധുക്കള്‍ ആരോപിച്ചു. പോലീസ് വിശദമായ അന്വേഷണം ആരംഭിച്ചു.