17 വര്‍ഷത്തിനുശേഷം മോഹന്‍ലാലും മമ്മൂട്ടിയും ഒരുമിച്ചഭിനയിക്കുന്ന പാട്രിയറ്റിന്റെ ചിത്രീകരണം പുരോഗമിക്കുകയാണ്. മമ്മുട്ടി ഇടക്ക് ആശുപത്രിയിലായതിനാല്‍ ഷൂട്ടിംഗ് നിര്‍ത്തിവെച്ചിരുന്നവെങ്കിലും അദ്ദേഹം അഭിനയത്തിന്റെ തിരക്കുകളിലേക്ക് മടങ്ങിയെത്തിയിരിക്കുകയാണ്. ചെന്നൈ വിമാനത്താവളത്തില്‍ കുടുംബസമേതം എത്തിയ മമ്മൂട്ടിയുടെ ദൃശ്യങ്ങളും വൈറലായി.

മമ്മൂട്ടിയെ എയര്‍പോര്‍ട്ടില്‍ യാത്രയാക്കാന്‍ ദുല്‍ഖര്‍ സല്‍മാന്‍ എത്തിയിരുന്നു. ഇതിന്റെ ദൃശ്യമാണ് ആരാധകര്‍ ഏറ്റെടുത്തിരിക്കുന്നത്. മമ്മൂട്ടിക്കും ഉമ്മ സുല്‍ഫത്തിനും സ്‌നേഹചുംബനം നല്‍കിയാണ് ദുല്‍ഖര്‍ യാത്രയാക്കിയത്. ആരാധകരെ മമ്മൂട്ടി കൈവീശി അഭിസംബോധന ചെയ്യുന്നതും ദൃശ്യത്തിലുണ്ട്. മമ്മൂട്ടിയുടേയും ദുല്‍ഖറിന്റേയും സ്റ്റാഫ് ശരത് ടി.കെയാണ് വീഡിയോ തന്റെ സോഷ്യല്‍ മീഡിയാ അക്കൗണ്ടിലൂടെ പുറത്തുവിട്ടത്.

ആരോഗ്യകാരണങ്ങളാല്‍ സിനിമയില്‍നിന്ന് വിട്ടുനില്‍ക്കുകയായിരുന്നു മമ്മൂട്ടി. ഈ മാസം ആദ്യമാണ് അദ്ദേഹം സിനിമയുടെ തിരക്കുകളിലേക്ക് മടങ്ങിയെത്തിയത്. മഹേഷ് നാരായണന്‍ സംവിധാനംചെയ്യുന്ന പാട്രിയറ്റിന്റെ ഷൂട്ടിങ്ങിനിടെയാണ് മമ്മൂട്ടി ചികിത്സയ്ക്കായി പോയത്. പിന്നീട് അദ്ദേഹം ചെന്നൈയിലെ വസതിയില്‍ വിശ്രമത്തിലുമായിരുന്നു. നീണ്ട ഇടവേളയ്ക്കുശേഷം കഴിഞ്ഞമാസമാണ് അദ്ദേഹം പൂര്‍ണ ആരോഗ്യവാനായെന്നുള്ള വിവരം താരത്തിന്റെ അടുത്ത സുഹൃത്തുക്കളായ നിര്‍മാതാവ് ആന്റോ ജോസഫും ജോര്‍ജും സോഷ്യല്‍ മീഡിയയിലൂടെ അറിയിച്ചത്.

ഫഹദ് ഫാസില്‍, കുഞ്ചാക്കോ ബോബന്‍, നയന്‍താര, രേവതി എന്നിവരും ചിത്രത്തിലുണ്ട്. ശ്രീലങ്കയിലായിരുന്നു ചിത്രത്തിന്റെ ആദ്യഘട്ട ഷൂട്ടിങ്.