ബീജിങ്: ലോകത്തിലെ ഏറ്റവും വേഗതയേറിയ ഇലക്ട്രിക് മള്‍ട്ടിപ്പിള്‍ യൂണിറ്റ് (EMU) എന്ന് വിശേഷിപ്പിക്കപ്പെടുന്ന സിആര്‍ 450 (CR450) ബുള്ളറ്റ് ട്രെയിനിന്റെ പരീക്ഷണ ഓട്ടം ചൈനയില്‍ ആരംഭിച്ചു. കഴിഞ്ഞ വര്‍ഷം അനാച്ഛാദനം ചെയ്ത ഈ അതിവേഗ ട്രെയിന്‍, വാണിജ്യ സേവനത്തിന് ഒരുങ്ങുന്നതിന് മുന്നോടിയായാണ് പരീക്ഷണ ഓട്ടങ്ങള്‍ നടത്തുന്നത്.

സിജിടിഎന്‍ റിപ്പോര്‍ട്ട് പ്രകാരം, പരീക്ഷണ ഓട്ടങ്ങളില്‍ സിആര്‍ 450 റെക്കോര്‍ഡ് വേഗത കൈവരിച്ചു. മണിക്കൂറില്‍ 450 കിലോമീറ്റര്‍ എന്ന ശ്രദ്ധേയമായ വേഗതയും, ട്രെയിനുകള്‍ പരസ്പരം കടന്നുപോകുമ്പോള്‍ മണിക്കൂറില്‍ 896 കിലോമീറ്റര്‍ എന്ന റിലേറ്റീവ് പാസിങ് സ്പീഡും ഈ ട്രെയിന്‍ നേടി. സിആര്‍ആര്‍സി ചാങ്ചുന്‍ റെയില്‍വേ വെഹിക്കിളും സിആര്‍ആര്‍സി സിഫാങ് കോ ലിമിറ്റഡും ചേര്‍ന്നാണ് സിആര്‍ 450 പ്രോട്ടോടൈപ്പ് വികസിപ്പിച്ചത്.

ഇത്രയും വലിയ വേഗത കൈവരിക്കാന്‍ ട്രെയിനിനെ സഹായിച്ചത് അതിന്റെ വിപ്ലവകരമായ എയറോഡൈനാമിക് രൂപകല്‍പ്പനയാണ്. നീളമേറിയ നോസ് കോണ്‍: ട്രെയിനിന്റെ മൂക്ക് (നോസ് കോണ്‍) നിലവിലെ 350 കി.മീ/മണിക്കൂര്‍ ട്രെയിനുകളിലെ 12.5 മീറ്ററില്‍ നിന്ന് 15 മീറ്ററായി വര്‍ദ്ധിപ്പിച്ചു. ഇത് എയറോഡൈനാമിക് ഡ്രാഗ് (വായുവിന്റെ വലിവ്) കാര്യമായി കുറയ്ക്കുന്നതിന് സഹായിച്ചു.

ബാഹ്യ രൂപകല്‍പ്പനയിലെ മാറ്റങ്ങളിലൂടെ ട്രെയിനിന്റെ വായു പ്രതിരോധം (എയര്‍ റെസിസ്റ്റന്‍സ്) 22 ശതമാനം വരെ കുറയ്ക്കാന്‍ സാധിച്ചു. ചക്രങ്ങളും മറ്റും സ്ഥാപിച്ചിട്ടുള്ള ബോഗികള്‍ പൂര്‍ണ്ണമായും മൂടിയ രീതിയിലാണ് ഒരുക്കിയിരിക്കുന്നത്. കൂടാതെ കാരേജുകളുടെ അടിയിലുള്ള സ്‌കര്‍ട്ടുകള്‍ താഴ്ത്തി ചക്രങ്ങളും വായുവുമായുള്ള സമ്പര്‍ക്കം കുറച്ചു. അതിവേഗ റേസ് കാറുകളുടെ രൂപകല്‍പ്പനയ്ക്ക് സമാനമാണിത്. ട്രെയിനിന്റെ ഉയരം 20 സെന്റീമീറ്റര്‍ കുറയ്ക്കുകയും ഭാരത്തില്‍ 50 ടണ്‍ കുറവ് വരുത്തുകയും ചെയ്തത് വേഗം വര്‍ദ്ധിപ്പിക്കുന്നതില്‍ നിര്‍ണായകമായി.

നിലവില്‍ ഷാങ്ഹായില്‍ നിന്ന് ചോങ്ക്വിങ്-ചെങ്ദു അതിവേഗ റെയില്‍ ലൈനിലൂടെയാണ് പരീക്ഷണ ഓട്ടം നടക്കുന്നത്. വെറും 4 മിനിറ്റ് 40 സെക്കന്‍ഡില്‍ നിശ്ചലാവസ്ഥയില്‍ നിന്ന് മണിക്കൂറില്‍ 350 കിലോമീറ്റര്‍ വേഗം കൈവരിക്കാന്‍ സിആര്‍ 450-ന് സാധിക്കും. നിലവിലുള്ള ഫക്‌സിങ് ഇഎംയു (Fuxing EMU) ട്രെയിനിനേക്കാള്‍ 100 സെക്കന്‍ഡ് വേഗക്കൂടുതലാണിത്. ഫക്‌സിങ് ഇഎംയുവിന് 350 കി.മീ വേഗം കൈവരിക്കാന്‍ 6 മിനിറ്റ് 20 സെക്കന്‍ഡ് ആവശ്യമാണ്. അധികൃതരുടെ അനുമതി ലഭിച്ച ശേഷം സിആര്‍ 450 വാണിജ്യ സേവനങ്ങള്‍ക്കായി രംഗത്തെത്തും.