ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്രമന്ത്രിസഭ, എട്ടാം ശമ്പള കമ്മീഷന്റെ ടേംസ് ഓഫ് റഫറന്‍സിന് അംഗീകാരം നല്‍കി. മന്ത്രിസഭാ യോഗത്തിന് ശേഷം കേന്ദ്രമന്ത്രി അശ്വിനി വൈഷ്ണവ് നടത്തിയ പത്രസമ്മേളനത്തിലാണ് സുപ്രധാനമായ ഈ വിവരം അറിയിച്ചത്. 18 മാസത്തിനുള്ളില്‍ കമ്മീഷന്‍ ശുപാര്‍ശകള്‍ സമര്‍പ്പിക്കുമെന്നും അദ്ദേഹം വ്യക്തമാക്കി.

ശമ്പള കമ്മീഷന്റെ ശുപാര്‍ശകള്‍ പ്രതിരോധ സേനാ ഉദ്യോഗസ്ഥര്‍ ഉള്‍പ്പെടെയുള്ള ഏകദേശം 50 ലക്ഷം കേന്ദ്രസര്‍ക്കാര്‍ ജീവനക്കാര്‍ക്കും 69 ലക്ഷത്തോളം പെന്‍ഷന്‍കാര്‍ക്കും ബാധകമാകും.

കേന്ദ്രസര്‍ക്കാര്‍ ജീവനക്കാരുടെ ശമ്പള ഘടന, അലവന്‍സുകള്‍, പെന്‍ഷന്‍ തുടങ്ങിയവ പരിഷ്‌കരിക്കുന്നതിന് വേണ്ടിയുള്ള മാര്‍ഗ്ഗനിര്‍ദ്ദേശ രേഖയാണ് 'ടേംസ് ഓഫ് റഫറന്‍സ്'. ഇത് അംഗീകരിച്ചതോടെയാണ് ശമ്പള കമ്മീഷന് ഔദ്യോഗികമായി തങ്ങളുടെ പ്രവര്‍ത്തനം ആരംഭിക്കാന്‍ കഴിയുന്നത്.

2025 ജനുവരിയിലാണ് കേന്ദ്രസര്‍ക്കാര്‍ 8-ാം ശമ്പള കമ്മീഷന്‍ രൂപീകരിക്കുന്നത് പ്രഖ്യാപിച്ചത്. ഏഴാം ശമ്പള കമ്മീഷന്‍ ശുപാര്‍ശകള്‍ 6 മാസത്തിനുള്ളില്‍ അംഗീകരിച്ച് 2016 ജനുവരി 1 മുതല്‍ പ്രാബല്യത്തില്‍ വന്നിരുന്നു. ഇത് രിഗണിക്കുകയാണെങ്കില്‍, 8-ാം ശമ്പള കമ്മീഷന്‍ ഏകദേശം 24 മാസത്തിനുള്ളില്‍ നടപ്പാക്കാന്‍ സാധ്യതയുണ്ട്.