ബെംഗളൂരു: പ്രിയങ്ക ഗാന്ധിയുടെ മണ്ഡലമായ വയനാടിനെ മനോഹരമായ വിനോദസഞ്ചാര കേന്ദ്രമായി പ്രോത്സാഹിപ്പിച്ചുകൊണ്ടുള്ള കര്ണാടക സ്റ്റേറ്റ് ടൂറിസം ഡെവലപ്മെന്റ് കോര്പ്പറേഷന്റെ (കെഎസ്ടിഡിസി) എക്സ് പോസ്റ്റില് രാഷ്ട്രീയപ്പോര്. മുഖ്യമന്ത്രിക്കസേര നിലനിര്ത്താന് സിദ്ധരാമയ്യ നടത്തുന്ന ഹൈക്കമാന്ഡ് പ്രീണനമാണ് ഇതെന്ന് ബി.ജെ.പി ആരോപിച്ചു.
'സാഹസികതയോ ശാന്തതയോ തേടുകയാണോ? രണ്ടും വയനാട്ടില് കണ്ടെത്തൂ! മനോഹരമായ പാതകളിലൂടെ ട്രെക്ക് ചെയ്യുക, വെള്ളച്ചാട്ടങ്ങളെ പിന്തുടരുക, കെഎസ്ടിഡിസിക്കൊപ്പം വന്യജീവികളെ കാണുക. ഏറ്റവും മികച്ച പ്രകൃതിയാത്ര നിങ്ങളെ കാത്തിരിക്കുന്നു.' ഒക്ടോബര് 28-ന് സംസ്ഥാന ടൂറിസം കോര്പ്പറേഷന് എക്സില് പങ്കുവെച്ച, വയനാട്ടിലേക്കുള്ള രണ്ട് രാത്രിയും മൂന്ന് പകലും നീളുന്ന ടൂര് പാക്കേജിന്റെ പ്രൊമോഷണല് പോസ്റ്റില് ഇങ്ങനെ പറയുന്നു.
'വയനാടിന്റെ ജില്ലാ കലക്ടറായും ഫണ്ട് ശേഖരിക്കുന്ന ആളായും പെരുമാറുന്ന മുഖ്യമന്ത്രിയെ കര്ണാടക എത്രനാള് സഹിക്കുമെന്ന് പ്രതിപക്ഷ നേതാവും ബി.ജെ.പി നേതാവുമായ ആര്. അശോക് ചോദിച്ചു. 'നിങ്ങള് കര്ണാടകയിലെ നികുതിദായകരുടെ 10 കോടി രൂപ അതിവേഗത്തില് വയനാടിന് നല്കി. ആനയുടെ ആക്രമണത്തില് കൊല്ലപ്പെട്ടയാളുടെ കുടുംബത്തിന് 15 ലക്ഷം രൂപ നല്കി. ഉരുള്പൊട്ടലിനുശേഷം വയനാട്ടില് 100 വീടുകള് നിര്മിക്കുമെന്ന് പ്രഖ്യാപിച്ചു. പ്രിയങ്ക ഗാന്ധിയുടെ മണ്ഡലമായ വയനാട്ടിലെ ടൂറിസം പ്രോത്സാഹിപ്പിക്കാന് നിങ്ങള് കര്ണാടകയുടെ സ്വന്തം ടൂറിസം കോര്പ്പറേഷനായ കെ.എസ്.ടി.ഡി.സിയെ ഉപയോഗിച്ചു.' അശോക കുറ്റപ്പെടുത്തി.
'കല്ബുര്ഗി, റായ്ച്ചൂര്, യാദ്ഗിര്, ബിദര്, വിജയപുര, ബാഗല്കോട്ട്, ബെലഗാവി എന്നിവിടങ്ങളിലെ നഷ്ടപരിഹാരവും വെള്ളപ്പൊക്ക ദുരിതാശ്വാസവും എവിടെ? കര്ഷകര് ദുരിതമനുഭവിക്കുന്നു, വീടുകള് ഒലിച്ചുപോയി. 12.5 ലക്ഷം ഹെക്ടര് കൃഷി നശിച്ചു. എന്നാല് നഷ്ടപരിഹാരം ഇപ്പോഴുമില്ല.' അദ്ദേഹം കൂട്ടിച്ചേര്ത്തു,
'വയനാട് കര്ണാടകയുടേതാണോ? അതോ കെ.എസ്.ടി.ഡി.സി കേരളമായി മാറിയോ? താങ്കളുടെ പാര്ട്ടി നേതാവ് പ്രിയങ്ക ഗാന്ധിയെ പ്രീതിപ്പെടുത്താന് കോണ്ഗ്രസ് സര്ക്കാര് കന്നഡ നാടിന്റെ അഭിമാനം പണയംവെക്കുകയാണ്.' ബി.ജെ.പി നേതാവും മുന് മന്ത്രിയുമായ സി.ടി. രവി പറഞ്ഞു.
Related News
