റോം: ജീവിതം കരുപിടിപ്പിക്കാനുള്ള ശ്രമത്തിനിടെ മലയാളി യുവാവിന് ദാരുണാന്ത്യം. ഇറ്റലിയിലെ നാപ്പോളിയില് താമസസ്ഥലത്തെ കെട്ടിടത്തില് നിന്ന് കാല് വഴുതി വീണ് കൊല്ലം നല്ലില സ്വദേശിയായ നിതിന് ജെയിംസ് (28) മരിച്ചു. കഴിഞ്ഞ ദിവസം രാത്രിയിലാണ് സംഭവം. നാപ്പോളിയിലെ നാല് നില കെട്ടിടത്തിന്റെ മുകള് നിലയിലുള്ള ഷെയര് റൂമിലാണ് നിതിന് താമസിച്ചിരുന്നത്. ഭക്ഷണം കഴിച്ച ശേഷം വേസ്റ്റ് ബാഗുകള് കളഞ്ഞ് തിരികെ മുകളിലത്തെ നിലയിലേക്ക് സ്റ്റെയര്കേസ് വഴി കയറുമ്പോഴാണ് അപകടം സംഭവിച്ചതെന്നാണ് പ്രാഥമിക നിഗമനം.
രണ്ടാം നിലയിലെ സ്റ്റെപ്പില് നിതിന്റെ ഒരു ചെരിപ്പ് കണ്ടെത്തിയതിനാല് അവിടെ വെച്ചാകാം കാല് വഴുതി വീണത് എന്ന് കരുതുന്നു. കെട്ടിടത്തില് ലിഫ്റ്റ് സ്ഥാപിക്കാനായി ഒഴിച്ചിട്ട സ്ഥലത്തേക്ക് തലയടിച്ച് വീണതാണ് ഗുരുതര പരിക്കുകള്ക്കും മരണത്തിനും കാരണമായത്. നിതിന് നിലത്ത് വീഴുന്ന ശബ്ദം കേട്ട് സമീപ മുറികളിലുള്ളവര് ഓടിയെത്തി. ഉടന് തന്നെ ആംബുലന്സ് സഹായത്തോടെ തൊട്ടടുത്ത ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
ബിടെക് മെക്കാനിക്കല് എന്ജിനീയറിങ് പൂര്ത്തിയാക്കിയ ശേഷം രണ്ടു വര്ഷം മുന്പാണ് നിതിന് വര്ക്ക് വിസയില് മാള്ട്ടയില് എത്തുന്നത്. മെച്ചപ്പെട്ട ജോലി തേടി എട്ട് മാസം മുന്പാണ് ഇറ്റലിയിലെത്തിയത്. സ്ഥിരമായ ഒരു ജോലിക്കായുള്ള അന്വേഷണത്തിലായിരിക്കെയാണ് കുടുംബാംഗങ്ങളെയും സുഹൃത്തുക്കളെയും ദുഖത്തിലാഴ്ത്തി നിതി വിടപറഞ്ഞത്.
നല്ലില എള്ളുവിള എന് എന് ഹൗസില് പി. ജെയിംസ് - ഗീത ദമ്പതികളുടെ മകനാണ് നിതിന്. നീതു ജെയിംസ് ഏക സഹോദരിയാണ്. കുടുംബത്തിന് വലിയ പ്രതീക്ഷ നല്കിയ പ്രവാസിയായിരുന്നു നിതിന്. നിതിന്റെ മൃതദേഹം നാട്ടിലെത്തിക്കുന്നതിനായി ഇറ്റലിയിലെ മലയാളി സമൂഹം കുടുംബത്തിന് എല്ലാ സഹായങ്ങളും നല്കി വരുന്നു. മൃതദേഹം എത്രയും വേഗം നാട്ടില് എത്തിക്കാനുള്ള ശ്രമങ്ങള് പുരോഗമിക്കുകയാണ്.
.jpg)
Related News
