വാഷിങ്ടണ്: തിരഞ്ഞെടുപ്പിലെ തിരിച്ചടിക്കു പിന്നാലെ താരിഫ് കടുംപിടിത്തത്തില് അയഞ്ഞ് യു.എസ് പ്രസിഡന്റ് ഡൊണാള്ഡ് ട്രംപ്. കാപ്പി, വാഴപ്പഴം, ബീഫ് എന്നിവയുള്പ്പെടെയുള്ള വിവിധ ഭക്ഷ്യോത്പ്പന്നങ്ങളെ താരിഫുകളില്നിന്ന് ഒഴിവാക്കുന്ന ഉത്തരവില് ട്രംപ് ഒപ്പുവച്ചു.
താരിഫ് കടുംപിടിത്തത്തെ തുടര്ന്നുണ്ടായ ജീവിതച്ചെലവിനെക്കുറിച്ചുള്ള ആശങ്കകളെ ട്രംപ് മുന്പ് നിസ്സാരവല്ക്കരിച്ചിരുന്നെങ്കിലും, കഴിഞ്ഞാഴ്ചത്തെ ന്യൂയോര്ക്ക് തിരഞ്ഞെടുപ്പില് റിപ്പബ്ലിക്കന് പാര്ട്ടിയുടെ മോശം പ്രകടനം പുനരാലോചനകള്ക്ക് ഇടയാക്കിയിരിക്കുകയാണ്.
അവോക്കാഡോയും തക്കാളിയും മുതല് തേങ്ങയും മാമ്പഴവും വരെ ഉള്പ്പെടുന്ന ഉത്പന്നങ്ങള്ക്കാണ് ട്രംപ് ഭരണകൂടം ഇപ്പോള് താരിഫ് ഒഴിവാക്കിയിരിക്കുന്നത്. ഈ സാധനങ്ങള് മതിയായ അളവില് ആഭ്യന്തരമായി ഉത്പാദിപ്പിക്കാന് കഴിയില്ലെന്ന് ട്രംപ് ഭരണകൂടം സമ്മതിച്ചു. മതിയായ അളവില് യുഎസില് ഉല്പാദിപ്പിക്കാന് കഴിയാത്ത ചരക്കുകള്ക്കാണ് ഇളവുകള് നല്കിയിട്ടുള്ളതെന്ന് വൈറ്റ് ഹൗസ് അറിയിച്ചു.
കാപ്പി, കൊക്കോ, ബ്ലാക് ടീ, ഗ്രീന് ടീ, വാനില ബീന്സ്, ബീഫ് ഉല്പ്പന്നങ്ങള്, അക്കായി, അവോക്കാഡോ, വാഴപ്പഴം, തേങ്ങ, പേരയ്ക്ക, ചെറുനാരങ്ങ, ഓറഞ്ച്, മാമ്പഴം, നേന്ത്രപ്പഴം, പൈനാപ്പിള്, വിവിധയിനം മുളകുകള്, തക്കാളി, സര്വ്വസുഗന്ധി, കറുവയില, ഏലം, കറുവപ്പട്ട, ഗ്രാമ്പൂ, മല്ലി, ജീരകം, കറി പൗഡര്, പെരുംജീരകം, ഇഞ്ചി, ജാതിപത്രി, ജാതിക്ക, ഒറിഗാനോ, പപ്രിക, കുങ്കുമപ്പൂവ്, മഞ്ഞള്, അണ്ടിപ്പരിപ്പുകള്, ധാന്യങ്ങള്, കിഴങ്ങുകള്, ബാര്ളി, ബ്രസീല് നട്ട്, കേപ്പര്, കശുവണ്ടി, ചെസ്റ്റ്നട്ട്, മക്കാഡാമിയ നട്ട്, മിസോ, പനയുടെ കൂമ്പ്, പൈന് നട്ട്, കസ്കസ്, മരച്ചീനി, ചേമ്പ് എന്നിവക്കെല്ലാം താരിഫ് ഒഴിവാക്കി.
എല്ലാ രാജ്യങ്ങളില് നിന്നുമുള്ള ഇറക്കുമതിക്ക് 10% അടിസ്ഥാന തീരുവയും, ഇന്ത്യയടക്കമുള്ള പല രാജ്യങ്ങള്ക്കും അധിക തീരുവകളും ട്രംപ് ഭരണകൂടം ഏര്പ്പെടുത്തിയിരുന്നു. ഇത് യുഎസ് ഉപഭോക്താക്കള്ക്ക് വില വര്ദ്ധനവിന് കാരണമാകില്ലെന്നായിരുന്നു ട്രംപിന്റെ അവകാശവാദം.
.jpg)
Related News
