ന്യൂഡല്‍ഹി - റഷ്യന്‍ പ്രസിഡന്റ് വ്‌ളാദിമിര്‍ പുടിന് രാഷ്ട്രപതി ദ്രൗപദി മുര്‍മു ഒരുക്കിയ ഔദ്യോഗിക അത്താഴവിരുന്നിലേക്കുള്ള ക്ഷണം സ്വീകരിച്ച് അതില്‍ പങ്കെടുത്ത കോണ്‍ഗ്രസ് എംപി ശശി തരൂരിനെതിരേ പാര്‍ട്ടിയില്‍നിന്ന് രൂക്ഷ വിമര്‍ശം. ലോക്‌സഭാ പ്രതിപക്ഷ നേതാവായ രാഹുല്‍ ഗാന്ധിയേയും രാജ്യസഭാ പ്രതിപക്ഷ നേതാവായ മല്ലികാര്‍ജുന്‍ ഖര്‍ഗെയേയും ക്ഷണിക്കാതിരുന്ന വിരുന്നിലാണ് തരൂര്‍ പങ്കെടുത്തത്. ക്ഷണം തരൂര്‍ സ്വീകരിക്കാന്‍ പാടില്ലായിരുന്നുവെന്നും പാര്‍ട്ടിയോട് കൂടിയാലോചിക്കാതെയാണ് തരൂര്‍ പങ്കെടുത്തതെന്നും കോണ്‍ഗ്രസ് വക്താവ് പവന്‍ ഖേര പറഞ്ഞു.

വെള്ളിയാഴ്ച വൈകീട്ടാണ് രാഷ്ട്രപതിഭവനില്‍ റഷ്യന്‍ പ്രസിഡന്റിനായി രാഷ്ട്രപതി ഔദ്യോഗിക അത്താഴവിരുന്ന് നടത്തിയത്. പരിപാടിയില്‍ തരൂര്‍ പങ്കെടുത്തു. തരൂര്‍ വിരുന്നില്‍ പങ്കെടുത്തതില്‍ ആശ്ചര്യം പ്രകടിപ്പിച്ച പവന്‍ ഖേര, തരൂരിന് ഈ 'കളി'യെക്കുറിച്ച് അറിയില്ലായിരുന്നോ എന്നും ചോദിച്ചു. ''എന്റെ നേതാക്കളെ ക്ഷണിച്ചിട്ടില്ല. പക്ഷേ ഞാന്‍ ക്ഷണിക്കപ്പെടുമ്പോള്‍, എന്തുകൊണ്ടാണ് ഈ കളി നടക്കുന്നത്, ആരാണ് കളി കളിക്കുന്നത്, നമ്മള്‍ എന്തുകൊണ്ട് അതിന്റെ ഭാഗമാകരുത് എന്ന് നമ്മള്‍ മനസ്സിലാക്കണം'', ഖേര പറഞ്ഞു.

എന്തുകൊണ്ടാണ് മറ്റുള്ളവരെ വിളിക്കാത്തതെന്ന് തനിക്കറിയില്ലെന്നും അത്താഴവിരുന്നില്‍ പങ്കെടുക്കുമെന്നും ശശി തരൂര്‍ നിലപാട് അറിയിച്ചിരുന്നു. കേന്ദ്രം നടത്തിയത് ഗുരുതര പ്രോട്ടോക്കോള്‍ ലംഘനമാണെന്നും ഖേര കുറ്റപ്പെടുത്തി.