തിരുവനന്തപുരം: പ്രശസ്ത സംവിധായകനും മുന് എം.എല്.എയുമായ പി.ടി. കുഞ്ഞുമുഹമ്മദിനെതിരെ ലൈംഗികാതിക്രമത്തിനും സ്ത്രീത്വത്തെ അപമാനിച്ചതിനും പോലീസ് കേസെടുത്തു. ഐ.എഫ്.എഫ്.കെ (രാജ്യാന്തര ചലച്ചിത്രമേള) സെലക്ഷന് സ്ക്രീനിങ്ങിനിടെ അപമര്യാദയായി പെരുമാറിയെന്ന ചലച്ചിത്രപ്രവര്ത്തകയുടെ പരാതിയിലാണ് നടപടി. കന്റോണ്മെന്റ് പോലീസാണ് എഫ്.ഐ.ആര് രജിസ്റ്റര് ചെയ്തത്.
ഐ.എഫ്.എഫ്.കെ ജൂറി ചെയര്മാനാണ് പി.ടി. കുഞ്ഞുമുഹമ്മദ്. മേളയുടെ ജൂറി അംഗമായ ചലച്ചിത്രപ്രവര്ത്തകയാണ് പരാതിക്കാരി. സംഭവത്തെക്കുറിച്ച് എഫ്.ഐ.ആറില് പറയുന്നതിങ്ങനെ: തിരുവനന്തപുരത്തെ ഒരു ഹോട്ടല് മുറിയില് വെച്ചാണ് ലൈംഗികാതിക്രമം നടന്നത്. സ്ക്രീനിങ്ങുമായി ബന്ധപ്പെട്ട ഒരു ചര്ച്ചയ്ക്കായി സംവിധായകന് ചലച്ചിത്രപ്രവര്ത്തകയോട് മുറിയിലേക്ക് വരാന് ആവശ്യപ്പെട്ടു. മുറിയില് കയറിയ ഉടന് സംവിധായകന് തന്നെ കടന്നുപിടിക്കുകയായിരുന്നുവെന്ന് പരാതിയില് പറയുന്നു. ഇത് സ്ത്രീത്വത്തെ അപമാനിക്കുന്ന രീതിയിലുള്ള പെരുമാറ്റമാണെന്നും പരാതിയില് വ്യക്തമാക്കുന്നു.
ചലച്ചിത്രപ്രവര്ത്തക മുഖ്യമന്ത്രിക്ക് നേരിട്ടാണ് പരാതി നല്കിയത്. മുഖ്യമന്ത്രിയുടെ ഓഫീസില് നിന്ന് പരാതി തുടര്നടപടികള്ക്കായി ഡി.ജി.പിക്ക് കൈമാറി. ഇതിനു പിന്നാലെ കന്റോണ്മെന്റ് പോലീസ് കേസ് രജിസ്റ്റര് ചെയ്യുകയും പരാതിക്കാരിയുടെ മൊഴി രേഖപ്പെടുത്തുകയും ചെയ്തു.
ഡിസംബര് 12 മുതല് 19 വരെയാണ് തിരുവനന്തപുരത്ത് അന്താരാഷ്ട്ര ചലച്ചിത്രമേള നടക്കുന്നത്. ഇതിന്റെ ഭാഗമായുള്ള സ്ക്രീനിങ്ങിനിടെയാണ് കേസിനാസ്പദമായ സംഭവമുണ്ടായത്. സി.പി.എം സ്വതന്ത്രനായി ഗുരുവായൂരില് നിന്ന് രണ്ടു തവണ എം.എല്.എയായി തിരഞ്ഞെടുക്കപ്പെട്ടിട്ടുള്ള ഇടതു സഹയാത്രികനാണ് പി.ടി. കുഞ്ഞുമുഹമ്മദ്.
.jpg)
Related News
