ന്യൂഡല്‍ഹി: സിബിഎസ്ഇ പത്താം ക്ലാസ് ബോര്‍ഡ് പരീക്ഷയുടെ ചോദ്യപേപ്പര്‍ ഘടനയില്‍ സമൂലമായ മാറ്റങ്ങള്‍ പ്രഖ്യാപിച്ചു. 2026-ലെ പരീക്ഷ മുതലാണ് ഈ പുതിയ പരിഷ്‌കാരങ്ങള്‍ നിലവില്‍ വരുന്നത്. മൂല്യനിര്‍ണയം കൂടുതല്‍ എളുപ്പവും കാര്യക്ഷമവുമാക്കുക എന്നതാണ് മാറ്റങ്ങളുടെ പ്രധാന ലക്ഷ്യം.

സയന്‍സ്, സോഷ്യല്‍ സയന്‍സ് ചോദ്യക്കടലാസുകള്‍ വിവിധ ഭാഗങ്ങളായി തിരിച്ചായിരിക്കും ചോദ്യങ്ങളുണ്ടാവുക. സയന്‍സ് ചോദ്യക്കടലാസ് സെക്ഷന്‍ എ-ബയോളജി, സെക്ഷന്‍ ബി-കെമിസ്ട്രി, സെക്ഷന്‍ സി- ഫിസിക്സ് എന്നിങ്ങനെ തിരിക്കും. സോഷ്യല്‍ സയന്‍സിനെ നാലായിട്ടാണ് തിരിക്കുക. സെക്ഷന്‍ എ-ഹിസ്റ്ററി, ബി-ജോഗ്രഫി, സി-പൊളിറ്റിക്കല്‍ സയന്‍സ്, ഡി-ഇക്കണോമിക്സ്. ഓരോ സെക്ഷന്റേയും ഉത്തരങ്ങള്‍ അതിനുള്ള സ്ഥലത്ത് മാത്രമേ എഴുതാനാവൂ. ഒരു ഭാഗത്തെ ഉത്തരം മറുഭാഗത്ത് എഴുതുകയോ കൂട്ടിച്ചേര്‍ക്കുകയോ ചെയ്താല്‍ മൂല്യനിര്‍ണയം നടത്തില്ല. പുനര്‍മൂല്യ നിര്‍ണയത്തിന്റെ ഘട്ടത്തിലും ഇതുമായി ബന്ധപ്പെട്ട പരാതികള്‍ പരിഗണിക്കില്ല.

വിദ്യാര്‍ഥികള്‍ക്ക് ചോദ്യക്കടലാസ് പരിചയപ്പെടുത്തുന്നതിനായി മാതൃകയും പ്രസിദ്ധീകരിച്ചിട്ടുണ്ട്. cbseacademic.nic.in വെബ്സൈറ്റ് പരിശോധിച്ചാല്‍ പുതിയ ചോദ്യക്കടലാസിന്റെ മാതൃക ലഭ്യമാവും. കഴിഞ്ഞ ബോര്‍ഡ് പരീക്ഷവരെ ഓരോ വിഷയങ്ങളിലേയും ചോദ്യങ്ങള്‍ വേര്‍തിരിക്കാതെയാണ് നല്‍കിയിരുന്നത്. ഒറ്റമാര്‍ക്കിന്റെ ചോദ്യങ്ങള്‍ക്ക് ശേഷം 2 മാര്‍ക്കിന്റെ ചോദ്യങ്ങള്‍, പിന്നീട് 3,5 മാര്‍ക്കിന്റെ ചോദ്യങ്ങള്‍ എന്നതായിരുന്നു രീതി. ഈ വര്‍ഷം മുതല്‍ ഒരു സെക്ഷനില്‍ വിവിധ മാര്‍ക്കിന്റെ ചോദ്യങ്ങള്‍ കഴിഞ്ഞാകും അടുത്ത സെക്ഷന്‍ ആരംഭിക്കുക.