ലണ്ടന്: ബ്രിട്ടനിലും മറ്റ് യൂറോപ്യന് രാജ്യങ്ങളിലും അനുഭവപ്പെടുന്ന അതിശൈത്യത്തെത്തുടര്ന്ന് ജനജീവിതം ദുസ്സഹമാകുന്നു. ശക്തമായ മഞ്ഞുവീഴ്ചയും ഐസും കാരണം ബ്രിട്ടനില് നൂറുകണക്കിന് സ്കൂളുകള് അടച്ചുപൂട്ടി. വിമാന-ട്രെയിന് ഗതാഗതം താറുമാറായതോടെ ആയിരക്കണക്കിന് യാത്രക്കാരാണ് വിവിധയിടങ്ങളില് കുടുങ്ങിക്കിടക്കുന്നത്.
ബ്രിട്ടനിലെ കാലാവസ്ഥാ ഓഫീസ് സ്കോട്ട്ലന്ഡ്, വടക്കന് അയര്ലന്ഡ്, വടക്കന് ഇംഗ്ലണ്ട് എന്നിവിടങ്ങളില് തിങ്കള്, ചൊവ്വ ദിവസങ്ങളില് ജാഗ്രതാ നിര്ദ്ദേശം പുറപ്പെടുവിച്ചു. ഞായറാഴ്ച രാത്രി വടക്കുപടിഞ്ഞാറന് ഇംഗ്ലണ്ടിലെ ഷാപ്പില് താപനില മൈനസ് 10.9 ഡിഗ്രി സെല്ഷ്യസ് വരെ താഴ്ന്നു. ചൊവ്വാഴ്ചയോടെ ഇത് മൈനസ് 12 ഡിഗ്രി സെല്ഷ്യസ് വരെ താഴാന് സാധ്യതയുണ്ടെന്ന് അധികൃതര് മുന്നറിയിപ്പ് നല്കുന്നു.
വടക്കന് അയര്ലന്ഡില് മാത്രം 212 സ്കൂളുകള്ക്ക് അവധി നല്കി. സ്കോട്ട്ലന്ഡ്, വെയില്സ് എന്നിവിടങ്ങളിലും ഡസന് കണക്കിന് സ്കൂളുകള് അടച്ചിട്ടിരിക്കുകയാണ്. ിവര്പൂള്, ആബര്ഡീന്, ബെല്ഫാസ്റ്റ് വിമാനത്താവളങ്ങളില് നിരവധി സര്വീസുകള് റദ്ദാക്കി. സ്കോട്ട്ലന്ഡില് റെയില്വേ പാളങ്ങളിലെ മഞ്ഞ് നീക്കം ചെയ്യാന് സ്നോപ്ലൗ യന്ത്രങ്ങള് വിന്യസിച്ചു. പാരിസിലെ ചാള്സ് ഡി ഗല്ലെ, ഓര്ലി വിമാനത്താവളങ്ങളില് 15 ശതമാനത്തോളം സര്വീസുകള് റദ്ദാക്കി. പാരിസിലും നോര്മണ്ടി മേഖലയിലും റോഡ് ഗതാഗതം പൂര്ണ്ണമായും സ്തംഭിച്ചു.
ആംസ്റ്റര്ഡാം ഷിഫോള് വിമാനത്താവളത്തില് തിങ്കളാഴ്ച മാത്രം 500-ഓളം വിമാനങ്ങള് റദ്ദാക്കി. ആംസ്റ്റര്ഡാമിന് ചുറ്റുമുള്ള ട്രെയിന് ഗതാഗതവും പൂര്ണ്ണമായും നിര്ത്തിവെച്ചിരിക്കുകയാണ്. ലണ്ടനും നെതര്ലന്ഡ്സിനും ഇടയിലുള്ള ട്രെയിന് സര്വീസുകളില് നിയന്ത്രണം ഏര്പ്പെടുത്തിയതിനാല് യാത്രക്കാര് യാത്ര മാറ്റിവെക്കണമെന്ന് യൂറോസ്റ്റാര് അധികൃതര് അറിയിച്ചു.
റോഡുകളില് മഞ്ഞും ഐസും നിറഞ്ഞതിനെത്തുടര്ന്ന് അപകടങ്ങള് വര്ദ്ധിക്കുന്നതായി റിപ്പോര്ട്ടുകളുണ്ട്. സാധാരണ ദിവസങ്ങളെ അപേക്ഷിച്ച് സഹായം അഭ്യര്ത്ഥിച്ചുള്ള ഫോണ് കോളുകളില് 40 ശതമാനം വര്ദ്ധനവുണ്ടായതായി ബ്രിട്ടനിലെ റോഡ് സൈഡ് അസിസ്റ്റന്സ് പ്രൊവൈഡറായ 'എഎ' അറിയിച്ചു. അടച്ചിട്ട റോഡുകളിലൂടെ വാഹനമോടിക്കരുതെന്ന് പോലീസ് കര്ശന നിര്ദ്ദേശം നല്കിയിട്ടുണ്ട്.
അതിശൈത്യം വരും ദിവസങ്ങളിലും തുടരാന് സാധ്യതയുള്ളതിനാല് വയോധികരും ആരോഗ്യപ്രശ്നങ്ങളുള്ളവരും പ്രത്യേകം ജാഗ്രത പാലിക്കണമെന്ന് ആരോഗ്യ മന്ത്രാലയം നിര്ദ്ദേശിച്ചു.
.jpg)
