ലഖ്നൗ- കോണ്ഗ്രസ് നേതാവ് രാഹുല് ഗാന്ധിയുടെ ബ്രിട്ടീഷ് പൗരത്വ ആരോപണവുമായി ബന്ധപ്പെട്ട കേസില് ലഖ്നൗവിലെ പ്രത്യേക എംപി/എംഎല്എ കോടതി ദൈനംദിന വാദം കേള്ക്കല് ആരംഭിച്ചു. അഡീഷണല് ചീഫ് ജുഡീഷ്യല് മജിസ്ട്രേറ്റ് അലോക് വര്മ്മയുടെ കോടതിയിലാണ് വാദം കേള്ക്കല് തുടങ്ങിയത്.
കര്ണാടകയില് നിന്നുള്ള ബിജെപി നേതാവ് വിഘ്നേഷ് ശിശിറാണ് രാഹുല് ഗാന്ധിക്കെതിരെ ക്രിമിനല് പരാതി നല്കിയത്. റായ്ബറേലി എംപിയായ രാഹുല് ഗാന്ധിക്കെതിരെ എഫ്ഐആര് രജിസ്റ്റര് ചെയ്യാന് കോടതി ഉത്തരവിടണമെന്നാണ് ഇദ്ദേഹത്തിന്റെ ആവശ്യം.
റായ്ബറേലിയില് കേസ് പരിഗണിക്കുമ്പോള് തനിക്ക് ജീവന് ഭീഷണിയുണ്ടെന്നും അവിടെ നിഷ്പക്ഷമായ വാദം കേള്ക്കല് നടക്കില്ലെന്നും പരാതിക്കാരന് ചൂണ്ടിക്കാട്ടിയിരുന്നു. തുടര്ന്ന് 2025 ഡിസംബര് 17-ന് അലഹബാദ് ഹൈക്കോടതിയുടെ ലഖ്നൗ ബെഞ്ച് കേസ് റായ്ബറേലിയില് നിന്ന് ലഖ്നൗവിലേക്ക് മാറ്റി.
കേസില് എല്ലാ ദിവസവും വാദം കേള്ക്കാന് വിചാരണാ കോടതിയോട് ഹൈക്കോടതി നിര്ദ്ദേശിച്ചിരുന്നു. ചൊവ്വാഴ്ച കോടതിയില് നേരിട്ട് ഹാജരായ വിഘ്നേഷ് ശിശിര് തന്റെ ആരോപണങ്ങള് ശരിവെക്കുന്ന ഇമെയിലുകളും മറ്റ് രേഖകളും കോടതിക്ക് കൈമാറി.
പരാതിക്കാരന്റെ സുരക്ഷ കണക്കിലെടുത്ത് ഇദ്ദേഹത്തിന് 24 മണിക്കൂറും സുരക്ഷ ഉറപ്പാക്കാന് 2025 ഓഗസ്റ്റ് 29-ന് ഹൈക്കോടതി കേന്ദ്ര സര്ക്കാരിനോട് നിര്ദ്ദേശിച്ചിരുന്നു.
ബ്രിട്ടനിലെ ഒരു കമ്പനിയുടെ ഡയറക്ടറായിരുന്ന കാലത്ത് രാഹുല് ഗാന്ധി തന്നെത്തന്നെ ബ്രിട്ടീഷ് പൗരനായി രേഖപ്പെടുത്തി എന്ന ആരോപണമാണ് ഈ കേസിന് ആധാരം.
.jpg)
Related News
