ജിദ്ദ: പ്രപഞ്ചസൃഷ്ടാവായ അല്ലാഹുവിനെ ധിക്കരിക്കുന്നതൊഴികെ ഏത് കാര്യത്തിലും തന്റെ മാതാപിതാക്കളെ അനുസരിക്കണമെന്ന ഖുര്ആന് വാക്യം തന്നെ ഏറെ ആകര്ഷിച്ചുവെന്ന് ഒഐസിസി റീജിയണല് കമ്മിറ്റി സെക്രട്ടറി മനോജ് മാത്യു അഭിപ്രായപ്പെട്ടു. ജിദ്ദ ഇന്ത്യന് ഇസ്ലാഹീ സെന്ററില് 'ലേണ് ദ ഖുര്ആന്' പഠനപദ്ധതിയുടെ ഒമ്പതാം ഘട്ടം സിലബസ് വിതരണോദ്ഘാടന ചടങ്ങില് ആദ്യ കോപ്പി ഏറ്റുവാങ്ങിക്കൊണ്ട് സംസാരിക്കുകയായിരുന്നു അദ്ദേഹം. മതം ഉപയോഗിച്ച് വെറുപ്പുണ്ടാക്കാനാണ് ഇന്ന് പലരും ശ്രമിക്കുന്നത്. എന്നാല് ഖുര്ആനിലെ നന്മകള് മനുഷ്യനന്മക്കായി ഉപയോഗിക്കാന് നമുക്ക് കഴിയണമെന്നും ഇസ്ലാഹീ സെന്ററിന്റെ കീഴില് നടക്കുന്ന ഇത്തരം ഖുര്ആന് പഠനങ്ങള് മാനവിക ഐക്യത്തിന് വേണ്ടി തന്നെയാണെന്നും അദ്ദേഹം പറഞ്ഞു.
നേരത്തെ ഐഎസ്എം പാലക്കാട് ജില്ലാ വൈസ് പ്രസിഡന്റും യൂത്ത് കോണ്ഗ്രസ് മണ്ണാര്ക്കാട് അസ്സബ്ലി മണ്ഡലം പ്രസിഡന്റുമായ നസീര് സ്വലാഹി എടത്തനാട്ടുകാര പരിപാടി ഉദ്ഘാടനം ചെയ്തു. ഖുര്ആനിലെ ആദ്യ വരികള് തന്നെ വായിക്കാന് ഉല്ബോധനം നല്കുന്നതാണെന്നും അറിവ് നേടുമ്പോള് സംസ്കാരം ഉണ്ടാകുമെന്നും അദ്ദേഹം അഭിപ്രായപ്പെട്ടു. ഇന്ന് വിദ്യാസമ്പന്നരായ പലര്ക്കും ധാര്മിക മൂല്യങ്ങളില്ലാതാകുന്നതും മയക്കുമരുന്നിന് അടക്കം അടിമകളാക്കുന്നതും ഭൗതിക അറിവിന്റെ കൂടെ മതപരമായ അറിവ് കൂടി മനുഷ്യന് അത്യാവശ്യമാണെന്ന് തെളിയിക്കുന്നു. ഒരു മനുഷ്യനെ സഹായിച്ചാല് അതിന് പരലോകത്ത് പ്രതിഫലമുണ്ടെന്ന വിശ്വാസത്തോടെ നമ്മള് രാഷ്ട്രീയ രംഗത്തും പൊതുരംഗത്തുമെല്ലാം സജീവമാകണമെന്നും അദ്ദേഹം ഉണര്ത്തി.
തുടര്ന്ന് 'നിങ്ങള് അവരെ ഖുര്ആന് പഠിപ്പിക്കൂ... ഖുര്ആന് അവരെ എല്ലാം പഠിപ്പിക്കും' എന്ന വിഷയത്തില് ബാദുഷ ബാഖവി മുഖ്യപ്രഭാഷണം നിര്വഹിച്ചു. ഖുര്ആന് പഠനം നടക്കുമ്പോള് സമൂഹത്തില് നിന്ന് അന്തകാരം ഇല്ലാതാവുകയും പ്രകാശം പരക്കുകയും ചെയ്യുമെന്ന് അദ്ദേഹം പറഞ്ഞു. എന്നാല് അജ്ഞാത കാലത്തെ തിന്മകളായ 'ദുരഭിമാനം' അടക്കം പലതും ഇന്നും നമുക്കിടയില് കാണുന്നു എന്നത് ഖുര്ആന് നമ്മെ സ്വാധീനിക്കുന്നില്ല എന്നതിന്റെ സൂചനയാണ്. തിന്മകളുടെ അതിപ്രസരണം കാരണം ഖുര്ആനിന്റെ പ്രകാശം സമൂഹത്തില് നിന്ന് കുറഞ്ഞുപോകുന്നതിനെതിരെ നാം ജാഗ്രത പാലിക്കണമെന്നും ഇസ്ലാഹീ സെന്ററിന്റെ കീഴില് നടക്കുന്ന ഖുര്ആന് പഠനങ്ങള് ഇത്തരത്തിലുള്ള ശ്രമങ്ങളാണെന്നും അദ്ദേഹം ഉണര്ത്തി.
നമ്മുടെ വീടുകളില്, ഇടപാടുകളില്, പെരുമാറ്റങ്ങളില് തുടങ്ങി ജീവിതത്തിന്റെ സര്വ്വ മേഖലയിലും ഖുര്ആന് ഉണ്ടാകണമെന്ന നിഷ്കര്ഷ നമുക്ക് വേണമെന്നും അപ്പോള് നമ്മുടെ മക്കളും നല്ല മാര്ഗ്ഗത്തില് വളരുമെന്നും ചടങ്ങിന് നന്ദിയര്പ്പിച്ചുകൊണ്ട് സംസാരിച്ച ഷിഹാബ് സലഫി ഉണര്ത്തി. അബ്ബാസ് ചെമ്പന് അധ്യക്ഷത വഹിച്ചു. നൂരിഷ വള്ളിക്കുന്ന് സ്വാഗതം ആശംസിച്ചു.
ഫോട്ടോ: 'ലേണ് ദ ഖുര്ആന്' പഠനപദ്ധതിയുടെ ഒമ്പതാം ഘട്ടം സിലബസിന്റെ ആദ്യ കോപ്പി ഒഐസിസി റീജിയണല് കമ്മിറ്റി സെക്രട്ടറി മനോജ് മാത്യു ISM ജില്ലാ വൈസ് പ്രസിഡന്റ് നസീര് സ്വലാഹി എടത്തനാട്ടുകരയില് നിന്നും സ്വീകരിക്കുന്നു.
.jpg)
.jpg)
Related News
