ന്യൂദല്‍ഹി- 2025 ല്‍ ധനമന്ത്രി നിര്‍മല സീതാരാമന്‍ അവതരിപ്പിച്ച എട്ടാമത് ബജറ്റില്‍ നികുതി സ്ലാബുകളിലെ മാറ്റങ്ങളും ഉയര്‍ന്ന ഇളവ് പരിധിയും പുതിയ നികുതി വ്യവസ്ഥയിലേക്കുള്ള ചുവടുമാറ്റവുമായിരുന്നു പ്രധാന സവിശേഷത. എന്നാല്‍, 2026-ലെ കേന്ദ്ര ബജറ്റിലേക്ക് എത്തുമ്പോള്‍ വിദഗ്ധര്‍ വളരെ കരുതലോടെയുള്ള പ്രതീക്ഷകളാണ് പങ്കുവെക്കുന്നത്. ഇത്തവണ വലിയ തോതിലുള്ള ആദായനികുതി ഇളവുകള്‍ പ്രതീക്ഷിക്കേണ്ടതില്ലെന്ന് നികുതി വിദഗ്ധര്‍ ചൂണ്ടിക്കാട്ടുന്നു. കഴിഞ്ഞ ബജറ്റില്‍ തന്നെ ഗണ്യമായ ആനുകൂല്യങ്ങള്‍ പ്രഖ്യാപിച്ചതിനാലും സര്‍ക്കാരിന് ഇനിയും നികുതി കുറയ്ക്കാന്‍ പരിമിതികള്‍ ഉള്ളതിനാലുമാണിത്.

പുതിയ ഇളവുകള്‍ നല്‍കുന്നതിനേക്കാള്‍ നികുതി ഘടന ലളിതമാക്കുന്നതിലായിരിക്കും ഇത്തവണ സര്‍ക്കാരിന്റെ ശ്രദ്ധ. പഴയ നികുതി വ്യവസ്ഥയിലുള്ള ചില ഡിഡക്ഷനുകള്‍ (നികുതി ഇളവുകള്‍) പുതിയ വ്യവസ്ഥയിലേക്കും കൊണ്ടുവന്നേക്കാം. ഇത് പുതിയ രീതി കൂടുതല്‍ ആകര്‍ഷകമാക്കാനും ആളുകളെ അതിലേക്ക് മാറാന്‍ പ്രേരിപ്പിക്കാനും സഹായിക്കും.

കൂടുതല്‍ ആളുകള്‍ പുതിയ നികുതി രീതി സ്വീകരിക്കുന്ന സാഹചര്യത്തില്‍, പഴയ നികുതി വ്യവസ്ഥ വരും കാലങ്ങളില്‍ പൂര്‍ണ്ണമായും നിര്‍ത്തലാക്കിയേക്കാം.
സ്റ്റെല്ലാര്‍ ഇന്നൊവേഷന്‍സിലെ ടാക്‌സ് ആന്‍ഡ് ട്രാന്‍സിഷന്‍ വൈസ് പ്രസിഡന്റ് കാര്‍ത്തിക് നാരായണ്‍ പറയുന്നത്, ഇന്ത്യയുടെ നികുതി വ്യവസ്ഥയുടെ ഭാവി നിശ്ചയിക്കുന്നതില്‍ 2026 ബജറ്റ് നിര്‍ണ്ണായകമാകുമെന്നാണ്. അദ്ദേഹത്തിന്റെ പ്രധാന നിരീക്ഷണങ്ങള്‍ ഇവയാണ്:

2025-ലെ ബജറ്റില്‍ വരുത്തിയ മാറ്റങ്ങള്‍ ചിലയിടങ്ങളില്‍ അപാകം ഉണ്ടാക്കിയിട്ടുണ്ട്. എല്ലാ വരുമാനക്കാര്‍ക്കും ഒരേ അളവിലുള്ള ആശ്വാസം ലഭിച്ചുവെങ്കിലും, വരുമാനത്തിനനുസരിച്ച് നീതിപൂര്‍വ്വമായ നികുതി ഈടാക്കാന്‍ അത് പര്യാപ്തമായിരുന്നില്ല.

30 ലക്ഷം മുതല്‍ 50 ലക്ഷം രൂപ വരെ വരുമാനമുള്ളവര്‍ക്കായി 25% നികുതി എന്ന പുതിയ സ്ലാബ് അവതരിപ്പിക്കുന്നത് ഈ അസന്തുലിതാവസ്ഥ പരിഹരിക്കാന്‍ സഹായിക്കും. ഇത് ഉയര്‍ന്ന വരുമാനക്കാര്‍ക്ക് 30% നികുതി നിലനിര്‍ത്തിക്കൊണ്ടുതന്നെ ഇടത്തരക്കാര്‍ക്കും ഉയര്‍ന്ന ഇടത്തരക്കാര്‍ക്കും ആശ്വാസം നല്‍കും.

നിക്ഷേപം, വിരമിക്കല്‍ ആസൂത്രണം എന്നിവ പ്രോത്സാഹിപ്പിക്കുന്നതിനായി ഡിഡക്ഷന്‍ പരിധി ഉയര്‍ത്തിയേക്കാം.

സ്ലാബുകള്‍ക്ക് പുറമെ, സ്ഥിരനിക്ഷേപങ്ങളുടെ പലിശ വരുമാനത്തിന്മേലുള്ള നികുതി ഇളവ് വര്‍ദ്ധിപ്പിക്കണമെന്നും വിദഗ്ധര്‍ ആവശ്യപ്പെടുന്നുണ്ട്. കൂടാതെ, പണപ്പെരുപ്പത്തിനനുസരിച്ച് നികുതി സ്ലാബുകളില്‍ കൃത്യമായ ഇടവേളകളില്‍ മാറ്റം വരുത്തണം. വരുമാനം വര്‍ദ്ധിക്കുന്നത് പേപ്പറില്‍ മാത്രമാണെങ്കില്‍, വര്‍ദ്ധിച്ചുവരുന്ന ജീവിതച്ചെലവ് പരിഗണിക്കുമ്പോള്‍ സാധാരണക്കാര്‍ക്ക് അത് വലിയ ഭാരമാകും.

നികുതി നിരക്കുകളില്‍ വലിയ കുറവ് വരുത്തിയില്ലെങ്കിലും, ലളിതവും നീതിയുക്തവുമായ ഒരു നികുതി സംവിധാനം കൊണ്ടുവന്നാല്‍ അത് 2026 ബജറ്റിനെ സംബന്ധിച്ച് ശുഭവാര്‍ത്തയാകുമെന്നാണ് സാമ്പത്തിക വിദഗ്ധര്‍ പറയുന്നത്.