ജിദ്ദ- വിശുദ്ധ റമദാന്‍ മാസത്തിലെ നമസ്‌കാര വേളകളില്‍ പള്ളികളിലെ പുറം ഉച്ചഭാഷിണികള്‍ ഉപയോഗിക്കാന്‍ അനുവാദമുണ്ടാകില്ലെന്ന് സൗദി ഇസ്ലാമിക കാര്യ മന്ത്രി ഡോ. അബ്ദുല്‍ ലത്തീഫ് അല്‍ ഷെയ്ഖ് വ്യക്തമാക്കി. പുറം ഉച്ചഭാഷിണികളുടെ ഉപയോഗം ബാങ്ക് വിളിക്കുന്നതിനും ഇഖാമത്തിനും മാത്രമായി പരിമിതപ്പെടുത്തിയിട്ടുണ്ടെന്ന് അദ്ദേഹം വെളിപ്പെടുത്തി.
വിശ്വാസികള്‍ക്ക് മികച്ച സേവനം ഉറപ്പാക്കുന്നതിനും മന്ത്രാലയത്തിന്റെ ലക്ഷ്യങ്ങള്‍ നടപ്പിലാക്കുന്നതിനുമായി പള്ളികള്‍ സജ്ജമാക്കുന്നതുമായി ബന്ധപ്പെട്ട് മന്ത്രാലയം പുതിയ സര്‍ക്കുലര്‍ പുറത്തിറക്കിയിരുന്നു. നിലവിലുള്ള നിയമങ്ങളില്‍ മാറ്റം വരുത്താതെ ബാങ്ക് വിളിക്കും ഇഖാമത്തിനും മാത്രം പുറം ഉച്ചഭാഷിണികള്‍ ഉപയോഗിക്കണമെന്ന മുന്‍ നിര്‍ദ്ദേശം മന്ത്രാലയം വീണ്ടും ഓര്‍മ്മിപ്പിച്ചു.
ഉമ്മുല്‍ ഖുറാ കലണ്ടര്‍ അനുസരിച്ച് കൃത്യസമയത്ത് ബാങ്ക് വിളിക്കുന്നുണ്ടെന്ന് ഉറപ്പുവരുത്തണമെന്നും ഇഷാ, സുബ്ഹി നമസ്‌കാരങ്ങള്‍ക്ക് ബാങ്കിനും ഇഖാമത്തിനും ഇടയിലുള്ള സമയം കൃത്യമായി പാലിക്കണമെന്നും നിര്‍ദ്ദേശമുണ്ട്. നിലവിലെ നിയമപ്രകാരം ഉച്ചഭാഷിണികളുടെ ശബ്ദപരിധി ഉപകരണത്തിന്റെ ആകെ ശബ്ദശേഷിയുടെ മൂന്നിലൊന്നില്‍ കൂടാന്‍ പാടില്ലെന്നും മന്ത്രാലയം അറിയിച്ചു.