ദാവോസ്- ഇന്ത്യയും യൂറോപ്യന്‍ യൂണിയനും തമ്മിലുള്ള ചരിത്രപരമായ സ്വതന്ത്ര വ്യാപാര കരാര്‍ ഉടന്‍ യാഥാര്‍ത്ഥ്യമാകുമെന്ന് യൂറോപ്യന്‍ കമ്മീഷന്‍ പ്രസിഡന്റ് ഉര്‍സുല വോണ്‍ ഡെര്‍ ലെയന്‍ വ്യക്തമാക്കി. ലോക സാമ്പത്തിക ഫോറത്തിന്റെ വാര്‍ഷിക യോഗത്തില്‍ സംസാരിക്കവെയാണ് ഈ സുപ്രധാന പ്രഖ്യാപനം നടത്തിയത്. ലോക ജിഡിപിയുടെ ഏകദേശം നാലിലൊന്ന് വരുന്ന, 200 കോടി ജനങ്ങളുള്ള ഒരു വിപുലമായ വിപണി ഈ കരാറിലൂടെ സൃഷ്ടിക്കപ്പെടുമെന്നും അവര്‍ പറഞ്ഞു.

ജനുവരി 25 മുതല്‍ 27 വരെ നീണ്ടുനില്‍ക്കുന്ന ഇന്ത്യയുടെ റിപ്പബ്ലിക് ദിനാഘോഷങ്ങളില്‍ മുഖ്യാതിഥികളായി ഉര്‍സുല വോണ്‍ ഡെര്‍ ലെയനും യൂറോപ്യന്‍ കൗണ്‍സില്‍ പ്രസിഡന്റ് അന്റോണിയോ കോസ്റ്റയും പങ്കെടുക്കും. സന്ദര്‍ശന വേളയില്‍ പ്രധാനമന്ത്രി നരേന്ദ്ര മോദിയുമായി നടത്തുന്ന ഉച്ചകോടിയില്‍ കരാര്‍ സംബന്ധിച്ച ഔദ്യോഗിക പ്രഖ്യാപനം ഉണ്ടാകുമെന്നാണ് പ്രതീക്ഷിക്കുന്നത്. അമേരിക്കയുടെ പുതിയ താരിഫ് നയങ്ങള്‍ സൃഷ്ടിക്കുന്ന ആഗോള വ്യാപാര പ്രതിസന്ധികള്‍ക്കിടയിലാണ് ഈ നീക്കം എന്നത് ശ്രദ്ധേയമാണ്.

ഏകദേശം 18 വര്‍ഷമായി തുടരുന്ന ചര്‍ച്ചകള്‍ക്കൊടുവിലാണ് ഇരുപക്ഷവും ഈ കരാറിലെത്തുന്നത്. 2007-ല്‍ ആരംഭിച്ച ചര്‍ച്ചകള്‍ 2013-ല്‍ നിര്‍ത്തിവെച്ചിരുന്നെങ്കിലും 2022 ജൂണിലാണ് വീണ്ടും പുനരാരംഭിച്ചത്. ആകെ 24 അധ്യായങ്ങളുള്ള കരാറില്‍ 20 എണ്ണത്തിലും ധാരണയായതായി വാണിജ്യ മന്ത്രാലയം സൂചിപ്പിച്ചു. എന്നാല്‍, കാര്‍ഷിക മേഖലയെ തല്‍ക്കാലം ഈ കരാറില്‍ നിന്ന് ഒഴിവാക്കിയിട്ടുണ്ട്. പകരം തുണിത്തരങ്ങള്‍, പാദരക്ഷകള്‍, ആഭരണങ്ങള്‍ എന്നിവയില്‍ ഇന്ത്യക്കും വാഹനങ്ങള്‍, മദ്യം എന്നിവയില്‍ യൂറോപ്യന്‍ യൂണിയനും വിപണി സാധ്യതകള്‍ വര്‍ധിക്കും.

വ്യാപാരത്തിന് പുറമെ പ്രതിരോധ മേഖലയിലും തന്ത്രപരമായ സഹകരണത്തിനും ഈ ഉച്ചകോടി വഴിയൊരുക്കും. സെക്യൂരിറ്റി ആന്‍ഡ് ഡിഫന്‍സ് പാര്‍ട്ണര്‍ഷിപ്പ് എന്ന പേരില്‍ പുതിയ പ്രതിരോധ ചട്ടക്കൂട് ഉണ്ടാക്കാനും പ്രതിരോധ സാങ്കേതിക വിദ്യകള്‍ കൈമാറുന്നതിനായി സെക്യൂരിറ്റി ഓഫ് ഇന്‍ഫര്‍മേഷന്‍ അഗ്രിമെന്റ് ചര്‍ച്ചകള്‍ ആരംഭിക്കാനും ഇരുപക്ഷവും പദ്ധതിയിടുന്നു. കൂടാതെ, ഇന്ത്യന്‍ തൊഴിലാളികള്‍ക്ക് യൂറോപ്പില്‍ കൂടുതല്‍ തൊഴിലവസരങ്ങള്‍ ലഭ്യമാക്കുന്നതിനുള്ള കുടിയേറ്റ ചട്ടക്കൂടും ഈ സന്ദര്‍ശനത്തില്‍ ചര്‍ച്ചാവിഷയമാകും.