ന്യൂദല്ഹി- അടുത്ത അഞ്ച് വര്ഷത്തിനുള്ളില് ബയോഫാര്മ മേഖലക്കായി 10,000 കോടി രൂപ ബജറ്റില് അനുവദിച്ചതായി ധനമന്ത്രി നിര്മല സീതാരാമന്. 'ബയോ ഫാര്മ ശക്തി' എന്ന പദ്ധതിയുടെ കീഴില് ഈ മേഖലയെ വികസിപ്പിക്കാനാണ് സര്ക്കാര് ലക്ഷ്യമിടുന്നത്. ബയോഫാര്മ ഉത്പാദനത്തിന്റെ ആഗോള കേന്ദ്രമായി ഇന്ത്യയെ മാറ്റുകയാണ് പദ്ധതിയുടെ ഉദ്ദേശ്യം. ദീര്ഘകാല ആരോഗ്യസംരക്ഷണത്തിലും ലൈഫ് സയന്സ് മേഖലയിലെ വളര്ച്ചയിലും ഈ പദ്ധതി വലിയ പങ്കുവഹിക്കുമെന്നും മന്ത്രി വ്യക്തമാക്കി. നീക്കം രാജ്യത്തിന്റെ ഫാര്മസ്യൂട്ടിക്കല് വ്യവസായത്തിന് ശക്തമായ ഉത്തേജനം നല്കുമെന്നാണ് പ്രതീക്ഷ.
ഇന്ത്യയുടെ രോഗഭാരം കാന്സര്, പ്രമേഹം പോലുള്ള സാംക്രമികേതര രോഗങ്ങളിലേക്ക് മാറുന്നുവെന്ന് ധനമന്ത്രി പറഞ്ഞു. ജീവകാരുണ്യ പ്രവര്ത്തനങ്ങള് മെച്ചപ്പെടുത്തുന്നതിനും ജനങ്ങളുടെ ജീവിതനിലവാരം ഉയര്ത്തുന്നതിനും ബയോളജിക് മരുന്നുകള് നിര്ണായകമാകും. ഈ മരുന്നുകള് താങ്ങാനാവുന്ന വിലയില് ലഭ്യമാക്കുമെന്നും മന്ത്രി വ്യക്തമാക്കി. ബയോഫാര്മ, ബയോസിമിലര് മേഖലകളില് തദ്ദേശീയ ഉത്പാദനം ശക്തിപ്പെടുത്തുകയാണ് പദ്ധതിയുടെ പ്രധാന ലക്ഷ്യം. ഏഴ് തന്ത്രപരമായ മേഖലകളിലെ ഉത്പാദനം വര്ധിപ്പിക്കുന്നതിനുള്ള സര്ക്കാര് പദ്ധതിയുടെ ഭാഗമായാണ് 'ബയോ ഫാര്മ ശക്തി' നടപ്പാക്കുന്നത്.
ബയോഫാര്മ മേഖലയെ കേന്ദ്രീകരിച്ച ഗവേഷണത്തിനും പരിശീലനത്തിനുമായി മൂന്ന് പുതിയ നാഷണല് ഇന്സ്റ്റിറ്റ്യൂട്ടുകള് ഓഫ് ഫാര്മസ്യൂട്ടിക്കല് എജ്യുക്കേഷന് ആന്ഡ് റിസര്ച്ച് സ്ഥാപിക്കുമെന്ന് ധനമന്ത്രി അറിയിച്ചു. നിലവിലുള്ള ഏഴ് സ്ഥാപനങ്ങളുടെ നവീകരണവും പദ്ധതിയുടെ ഭാഗമാണ്.
കൂടാതെ, 1,000 അംഗീകൃത ക്ലിനിക്കല് ട്രയല് കേന്ദ്രങ്ങള് ഉള്പ്പെടുന്ന ഒരു ദേശീയ ശൃംഖല സ്ഥാപിക്കും. ഇത് മരുന്നുകളുടെ വികസനം വേഗത്തിലാക്കുകയും അവയുടെ നിലവാരം മെച്ചപ്പെടുത്തുകയും ചെയ്യും. ഇതിന് പുറമെ, ആഗോളനിലവാരത്തിലേക്ക് സെന്ട്രല് ഡ്രഗ്സ് സ്റ്റാന്ഡേര്ഡ് കണ്ട്രോള് ഓര്ഗനൈസേഷനെ നവീകരിക്കും.
Related News
