റിയാദ്: സൗദി അറേബ്യയിലെ മാധ്യമ മേഖലയിലെ സുതാര്യതയും നിലവാരവും ഉറപ്പുവരുത്തുന്നതിന്റെ ഭാഗമായി കഴിഞ്ഞ ഒരാഴ്ചക്കുള്ളില്‍ 15 സിനിമാ ഉള്ളടക്കങ്ങള്‍ക്കും 5 ടെലിവിഷന്‍ പരമ്പരകള്‍ക്കും ജനറല്‍ അതോറിറ്റി ഫോര്‍ മീഡിയ റെഗുലേഷന്‍ അംഗീകാരം നല്‍കി. ശനിയാഴ്ച പുറത്തിറക്കിയ ഔദ്യോഗിക റിപ്പോര്‍ട്ടിലാണ് അതോറിറ്റി ഈ വിവരങ്ങള്‍ വെളിപ്പെടുത്തിയത്. വിനോദ മേഖലയിലെ വളര്‍ച്ച പ്രോത്സാഹിപ്പിക്കുന്നതിനൊപ്പം തന്നെ രാജ്യത്തെ നിയമങ്ങള്‍ പാലിക്കപ്പെടുന്നുണ്ടെന്ന് ഉറപ്പാക്കാനാണ് ഈ വര്‍ഗ്ഗീകരണത്തിലൂടെ ലക്ഷ്യമിടുന്നത്.

സിനിമകള്‍ക്കും പരമ്പരകള്‍ക്കും പുറമെ മറ്റ് മാധ്യമ വിഭവങ്ങള്‍ക്കും അതോറിറ്റി അനുമതി നല്‍കിയിട്ടുണ്ട്. കഴിഞ്ഞ ഏഴ് ദിവസത്തിനിടെ 385 അച്ചടി പുസ്തകങ്ങള്‍ക്കും 25 ഇലക്ട്രോണിക് ഗെയിമുകള്‍ക്കുമാണ് അതോറിറ്റി ക്ലിയറന്‍സ് നല്‍കിയത്. കൂടാതെ, വിപണിയിലുള്ള 66,000 മാധ്യമ ഉപകരണങ്ങള്‍ പരിശോധിക്കുകയും അവക്ക് ആവശ്യമായ വര്‍ഗ്ഗീകരണങ്ങള്‍ നല്‍കുകയും ചെയ്തു. ഇലക്ട്രോണിക് ഗെയിമിംഗ് രംഗത്തെ വര്‍ദ്ധിച്ചുവരുന്ന താല്പര്യം പരിഗണിച്ചാണ് ഗെയിമുകളുടെ പരിശോധന വേഗത്തിലാക്കിയത്.

മാധ്യമ പ്രവര്‍ത്തനങ്ങള്‍ സുഗമമാക്കുന്നതിനായി വിവിധ വിഭാഗങ്ങളിലായി നിരവധി ലൈസന്‍സുകളും അതോറിറ്റി അനുവദിച്ചു. കഴിഞ്ഞ ആഴ്ചയില്‍ മാത്രം 360 മാധ്യമ ലൈസന്‍സുകള്‍, 50 'മോതൂഖ്' ലൈസന്‍സുകള്‍, 10 നോ ഒബ്ജക്ഷന്‍ സര്‍ട്ടിഫിക്കറ്റുകള്‍ എന്നിവ വിതരണം ചെയ്തു. കൂടാതെ 510 പ്രൊഫഷണല്‍ രജിസ്ട്രേഷനുകളും അതോറിറ്റി പൂര്‍ത്തിയാക്കി. സൗദി വിഷന്‍ 2030-ന്റെ ഭാഗമായി മാധ്യമ നിക്ഷേപകര്‍ക്കും പ്രൊഫഷണലുകള്‍ക്കും കൂടുതല്‍ അവസരങ്ങള്‍ ഒരുക്കുന്നതിന്റെ സൂചനയാണിതെന്ന് അതോറിറ്റി വ്യക്തമാക്കി.