ന്യൂദല്‍ഹി- അടുത്ത ആഴ്ച ന്യൂദല്‍ഹിയില്‍ നടക്കാനിരിക്കുന്ന 'ഇന്ത്യ എഐ ഇംപാക്ട് സമ്മിറ്റില്‍' എന്‍വിഡിയ സിഇഒ ജെന്‍സണ്‍ ഹുവാങ് പങ്കെടുക്കില്ല. ആഗോള ടെക്‌നോളജി രംഗത്തെ പ്രമുഖരും രാഷ്ട്രീയ നേതാക്കളും പങ്കെടുക്കുന്ന ഉച്ചകോടിയില്‍ ഹുവാങ്ങിന്റെ സാന്നിധ്യം വലിയ ആകര്‍ഷണമാകുമെന്ന് കരുതിയിരുന്ന സാഹചര്യത്തിലാണ് കമ്പനിയുടെ പുതിയ അറിയിപ്പ്.

ശനിയാഴ്ചയാണ് എന്‍വിഡിയ ഇക്കാര്യം ഔദ്യോഗികമായി അറിയിച്ചത്. ബുധനാഴ്ച ന്യൂദല്‍ഹിയില്‍ വെച്ച് അദ്ദേഹം മാധ്യമങ്ങളെ അഭിസംബോധന ചെയ്യേണ്ടതായിരുന്നു. എന്നാല്‍, 'അപ്രതീക്ഷിത കാരണങ്ങളാല്‍' അദ്ദേഹത്തിന് യാത്ര ചെയ്യാന്‍ സാധിക്കില്ലെന്ന് എന്‍വിഡിയയുടെ ഇന്ത്യയിലെ മീഡിയ ഏജന്‍സിയായ എംഎസ്എല്‍ ഇമെയില്‍ വഴി അറിയിച്ചു.

വ്യാഴാഴ്ച പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യുന്ന ഉച്ചകോടിയിലെ പ്രധാന വ്യക്തിത്വങ്ങളില്‍ ഒരാളായിരുന്നു ജെന്‍സണ്‍ ഹുവാങ്. അദ്ദേഹത്തിന്റെ അഭാവം ഉച്ചകോടിയെ സംബന്ധിച്ചിടത്തോളം വലിയൊരു മാറ്റമാണ്.