ടെഹ്റാന്: അമേരിക്കന്-ഇസ്രായേല് സഖ്യത്തിന്റെ ശക്തമായ വ്യോമാക്രമണങ്ങള്ക്കിടയിലും, തളരാത്ത വീര്യവുമായി ഇറാന്റെ തലസ്ഥാനമായ ടെഹ്റാനില് ദശലക്ഷങ്ങള് പങ്കെടുത്ത കുദ്സ് ദിന റാലി നടന്നു. രാജ്യത്തിന്റെ ഔദ്യോഗിക നേതൃത്വത്തിലെ പ്രമുഖര് റാലിയില് നേരിട്ട് പങ്കെടുത്തത് പ്രത്യാക്രമണങ്ങളുടെയും ചെറുത്തുനില്പ്പിന്റെയും സന്ദേശമായി മാറി.
ഇറാന് പ്രസിഡന്റ് മസൂദ് പെസെഷ്കിയാന്, വിദേശകാര്യമന്ത്രി അബ്ബാസ് അരാഗ്ചി എന്നിവര് റാലിയില് ജനങ്ങള്ക്കൊപ്പം നടന്നു നീങ്ങി. ഇറാനിയന്, ഫലസ്തീന് പതാകകള് ഏന്തിയ വന് ജനക്കൂട്ടത്തിനൊപ്പം നേതാക്കള് ദൃശ്യമായത് ഭരണകൂടം ഇപ്പോഴും സുരക്ഷിതമാണെന്ന സന്ദേശം നല്കാനാണ്. 'എലികള് ചെയ്യുന്നതുപോലെ' ഇറാനിയന് നേതാക്കള് ഒളിവിലാണെന്ന അമേരിക്കയുടെ പ്രസ്താവനക്കു തൊട്ടു പിന്നാലെയാണ് നേതാക്കള് തെരുവില് ജനക്കൂട്ടത്തിനിടയില് പ്രത്യക്ഷപ്പെട്ടത് എന്നതും ശ്രദ്ധേയമാണ്. അമേരിക്കന്-ഇസ്രായേല് ആക്രമണങ്ങള്ക്ക് പിന്നാലെ ഇറാന്റെ നേതൃനിര 'നിരാശയിലാണെന്നും ഒളിവിലാണെന്നും' യു.എസ് പ്രതിരോധ സെക്രട്ടറി പീറ്റ് ഹെഗ്സെത്ത് പറഞ്ഞിരുന്നു.
യുദ്ധത്തിന്റെ രണ്ടാം വാരത്തിലേക്ക് കടക്കുമ്പോള് രാജ്യത്തെ പ്രധാന നേതൃനിരയിലെ പലരും കൊല്ലപ്പെട്ടുവെന്ന റിപ്പോര്ട്ടുകള്ക്കിടയിലാണ് ഉന്നത ഉദ്യോഗസ്ഥരുടെ ഈ പരസ്യ പ്രകടനം. അമേരിക്കയുടെയും ഇസ്രായേലിന്റെയും ആക്രമണങ്ങള് ഭയപ്പെടുത്തുന്നതല്ലെന്നും, ടെഹ്റാനിലും രാജ്യത്തെ മറ്റ് പ്രധാന നഗരങ്ങളിലും ദശലക്ഷക്കണക്കിന് ആളുകള് തെരുവിലിറങ്ങിയിട്ടുണ്ടെന്നും വിദേശകാര്യമന്ത്രി അബ്ബാസ് അരാഗ്ചി പറഞ്ഞു.
സ്ഫോടനങ്ങള്ക്കിടയിലും പതറാതെ റാലി
റാലി നടന്നുകൊണ്ടിരിക്കെ തന്നെ സമീപപ്രദേശങ്ങളില് വ്യോമാക്രമണങ്ങള് നടന്നതായി റിപ്പോര്ട്ടുകളുണ്ട്. കറുത്ത പുക ഉയരുന്ന ദൃശ്യങ്ങള് സമൂഹമാധ്യമങ്ങളില് പ്രചരിക്കുന്നുണ്ടെങ്കിലും ഇതൊന്നും ജനക്കൂട്ടത്തെ പിന്തിരിപ്പിച്ചില്ല. ജുഡീഷ്യറി ചീഫ് ഗുലാം ഹൊസൈന് മൊഹ്സെനി-എജെയി പ്രസംഗിക്കുന്നതിനിടയിലും സമീപത്ത് സ്ഫോടനശബ്ദം കേട്ടു.
'ശത്രുവിന്റെ ഈ ആക്രമണങ്ങളില് ജനങ്ങള് ഭയപ്പെടുന്നില്ല. മിസൈല് വര്ഷങ്ങള്ക്കും ആക്രമണങ്ങള്ക്കും മുന്നില് ഇറാന് ജനത കീഴടങ്ങില്ല,' എന്ന് സ്ഫോടനത്തിന് പിന്നാലെ അദ്ദേഹം പ്രതികരിച്ചു.
ഇറാന്റെ പുതിയ പരമോന്നത നേതാവ് മുജ്തബ ഖാംനഇ റാലിയില് പങ്കെടുക്കാതിരുന്നത് പല ഊഹാപോഹങ്ങള്ക്കും ഇടയാക്കിയിട്ടുണ്ട്. ഫെബ്രുവരി 28-ന് നടന്ന ആദ്യഘട്ട ആക്രമണത്തില് പിതാവും മുന് പരമോന്നത നേതാവുമായ അലി ഖാംനഇ കൊല്ലപ്പെട്ടിരുന്നു. ഈ ആക്രമണത്തില് മുജ്തബ ഖാംനഇക്ക് പരിക്കേറ്റതാവാം അദ്ദേഹത്തിന്റെ അസാന്നിധ്യത്തിന് കാരണമെന്ന് ചില മാധ്യമങ്ങള് റിപ്പോര്ട്ട് ചെയ്യുന്നു.
റമദാനിലെ അവസാന വെള്ളിയാഴ്ച ഫലസ്തീന് ഐക്യദാര്ഢ്യത്തിനായി ആചരിക്കുന്ന കുദ്സ് ദിനം, നിലവിലെ യുദ്ധ സാഹചര്യത്തില് ഇറാനെ സംബന്ധിച്ച് അതീവ പ്രാധാന്യമുള്ളതായിരുന്നു. ഭരണനേതൃത്വത്തിലെ വിടവുകള് നികത്തിക്കൊണ്ട് രാജ്യം മുന്നോട്ട് പോകുന്നു എന്ന് തെളിയിക്കാനാണ് ഈ റാലിയിലൂടെ ഇറാന് ശ്രമിക്കുന്നത്.
Related News
