റിയാദ്: ഈ വര്‍ഷത്തെ ഉംറ സീസണുമായി ബന്ധപ്പെട്ട വിസ കാലാവധിയും തീര്‍ത്ഥാടകരുടെ മടക്കയാത്രയും സംബന്ധിച്ച നിര്‍ണ്ണായക വിവരങ്ങള്‍ സൗദി ഹജ്ജ്-ഉംറ മന്ത്രാലയം പുറത്തുവിട്ടു. ശനിയാഴ്ച നടന്ന ഉംറ കമ്പനികളുടെ യോഗത്തിലാണ് മന്ത്രാലയം പുതിയ സമയക്രമം വ്യക്തമാക്കിയത്.

ഉംറ വിസ അനുവദിക്കുന്ന അവസാന തീയതി ശവ്വാല്‍ 1 (മാര്‍ച്ച് 20) ആണ്. തീര്‍ത്ഥാടകര്‍ക്ക് സൗദിയില്‍ പ്രവേശിക്കാവുന്ന അവസാന തീയതി ശവ്വാല്‍ 15 (ഏപ്രില്‍ 3). തീര്‍ത്ഥാടകര്‍ രാജ്യം വിടേണ്ട അവസാന തീയതി ദുല്‍ ഖഅദ് 1 (ഏപ്രില്‍ 18).

ഉംറ വിസ ഉപയോഗിച്ച് ഹജ്ജ് കര്‍മ്മങ്ങള്‍ നിര്‍വ്വഹിക്കാന്‍ പാടില്ലെന്ന് മന്ത്രാലയം കര്‍ശന നിര്‍ദ്ദേശം നല്‍കി. ഹജ്ജ് നിര്‍വ്വഹിക്കുന്നതിന് കൃത്യമായ 'ഹജ്ജ് വിസ' തന്നെ കൈവശമുണ്ടായിരിക്കണം. നിയമങ്ങള്‍ ലംഘിക്കുന്നവര്‍ക്കെതിരെ കര്‍ശന നടപടിയുണ്ടാകുമെന്നും മന്ത്രാലയം മുന്നറിയിപ്പ് നല്‍കി.

റമദാന്‍ മാസത്തില്‍ മികച്ച സേവനം കാഴ്ചവെച്ച ഉംറ കമ്പനികളെ ഹജ്ജ്-ഉംറ മന്ത്രി ഡോ. തൗഫീഖ് അല്‍-റബിയ അഭിനന്ദിച്ചു. വിമാനത്താവളങ്ങളിലെ തിരക്ക് ഒഴിവാക്കാന്‍ തീര്‍ത്ഥാടകരുടെ വരവ് കൃത്യമായ സമയക്രമമനുസരിച്ചായിരിക്കണം. യാത്രക്കാരുടെ വിവരങ്ങള്‍ 'നുസുക് മസാര്‍' (Nusk Masar) പ്ലാറ്റ്ഫോം വഴി നിരന്തരം പുതുക്കണമെന്നും കമ്പനികളോട് നിര്‍ദ്ദേശിച്ചു.

സൗദി വിഷന്‍ 2030-ന്റെ ഭാഗമായി തീര്‍ത്ഥാടകരുടെ അനുഭവം മെച്ചപ്പെടുത്തുന്നതിനായി 2026-ല്‍ നടക്കാനിരിക്കുന്ന മൂന്നാമത് 'ഉംറ ആന്റ് വിസിറ്റ് ഫോറത്തില്‍' സജീവമായി പങ്കുചേരാനും കമ്പനികളോട് മന്ത്രി ആഹ്വാനം ചെയ്തു. തീര്‍ത്ഥാടകരുടെ സുരക്ഷിതമായ മടക്കയാത്ര ഉറപ്പാക്കുന്നതിനും സേവനങ്ങള്‍ മെച്ചപ്പെടുത്തുന്നതിനുമുള്ള നടപടികള്‍ യോഗം വിലയിരുത്തി.