ടെഹ്റാന്/ടെല് അവീവ്: ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവിനെ വധിക്കുമെന്ന പ്രഖ്യാപനവുമായി ഇറാന് റെവല്യൂഷണറി ഗാര്ഡ്സ് (IRGC). ഫെബ്രുവരി 28-ന് ഇറാന്റെ പരമോന്നത നേതാവ് ആയത്തുള്ള അലി ഖാംനഇ കൊല്ലപ്പെട്ടതിനും, നേരത്തെ ഹിസ്ബുല്ല തലവന് ഹസന് നസറുള്ള, ഹമാസ് നേതാക്കള് എന്നിവരുടെ വധത്തിനും പകരമായി നെതന്യാഹുവിനെ ഇല്ലാതാക്കുമെന്നാണ് ഐ.ആര്.ജി.സി കമാന്ഡര്മാര് വ്യക്തമാക്കിയത്.
ഇറാന്റെ മിസൈല് ആക്രമണങ്ങള്ക്ക് പിന്നാലെ നെതന്യാഹു കൊല്ലപ്പെട്ടുവെന്ന തരത്തില് സാമൂഹിക മാധ്യമങ്ങളില് പ്രചരണങ്ങള് ശക്തമായിരുന്നു. ഇതിനിടെയാണ്, അദ്ദേഹം എവിടെ ഒളിച്ചാലും പിന്തുടര്ന്ന് വധിക്കുമെന്ന് ഇറാന് ഔദ്യോഗികമായി പ്രഖ്യാപിച്ചത്. ഇസ്രായേലിന്റെ സൈനിക താവളങ്ങളെ ലക്ഷ്യമിട്ടുള്ള ആക്രമണങ്ങള് തുടരുന്നതിനൊപ്പം ഭരണനേതൃത്വത്തെ നേരിട്ട് ലക്ഷ്യം വെക്കുമെന്ന ഇറാന്റെ നിലപാട് മേഖലയില് യുദ്ധം കൂടുതല് വഷളാക്കിയിട്ടുണ്ട്.
വധഭീഷണി നിലനില്ക്കുന്നതിനിടെ നെതന്യാഹുവിന്റെ സുരക്ഷാ മുന്കരുതലുകളെക്കുറിച്ച് വിചിത്രമായ വാദങ്ങളും ഉയരുന്നുണ്ട്. നെതന്യാഹുവിന്റെ ഒരു വീഡിയോ ദൃശ്യത്തില് അദ്ദേഹത്തിന്റെ കൈകളില് ആറ് വിരലുകള് ഉള്ളതായി തോന്നിച്ചതാണ് വിവാദങ്ങള്ക്ക് ആധാരം. നെതന്യാഹു കൊല്ലപ്പെട്ടുവെന്നും ഇപ്പോള് പുറത്തുകാണുന്നത് അദ്ദേഹത്തിന്റെ 'ബോഡി ഡബിള്' (പകരക്കാരന്) ആണെന്നും സോഷ്യല് മീഡിയയില് ഒരു വിഭാഗം വാദിക്കുന്നു.
എന്നാല്, ഈ ദൃശ്യങ്ങള് സാങ്കേതികമായി എഡിറ്റ് ചെയ്തതാണെന്നും അല്ലെങ്കില് ക്യാമറ ആംഗിളിലെ തകരാര് മാത്രമാണെന്നും അന്താരാഷ്ട്ര വാര്ത്താ ഏജന്സികള് റിപ്പോര്ട്ട് ചെയ്യുന്നു. നെതന്യാഹു സുരക്ഷിതനാണെന്നും സൈനിക നീക്കങ്ങള് നേരിട്ട് നിയന്ത്രിക്കുന്നുണ്ടെന്നുമാണ് ഇസ്രായേല് ഔദ്യോഗികമായി വ്യക്തമാക്കുന്നത്.
Related News
