റിയാദ്- സൗദി അറേബ്യയിലെ നിലവിലെ പ്രത്യേക സാഹചര്യങ്ങള്‍ കണക്കിലെടുത്ത് വിസിറ്റ് വിസ കാലാവധി കഴിഞ്ഞ വിദേശികള്‍ക്ക് ആഭ്യന്തര മന്ത്രാലയം ഇളവുകള്‍ പ്രഖ്യാപിച്ചു.
മേഖലയിലെ അസാധാരണ സാഹചര്യങ്ങള്‍ കാരണം മടക്കയാത്ര തടസ്സപ്പെട്ടവര്‍ക്കാണ് ഈ ആനുകൂല്യം ലഭിക്കുക. 2026 ഫെബ്രുവരി 25 (ഹിജ്‌റ 1447 റമദാന്‍ 8) മുതല്‍ വിസ കാലാവധി അവസാനിച്ചവര്‍ക്ക് ഏപ്രില്‍ 18 വരെയാണ് ഇളവ് അനുവദിച്ചിരിക്കുന്നത്.


എല്ലാത്തരം വിസിറ്റ് വിസകള്‍ക്കും ഈ ഇളവ് ബാധകമാണ്. ഉംറ വിസ, ട്രാന്‍സിറ്റ് വിസ, ഫൈനല്‍ എക്‌സിറ്റ് വിസ എന്നിവക്കും ബാധകമാണ്.

വിസ കാലാവധി കഴിഞ്ഞവര്‍ക്ക് സ്‌പോണ്‍സര്‍ മുഖേന അബ്ഷിര്‍ പ്ലാറ്റ്ഫോം വഴി നിശ്ചിത ഫീസ് അടച്ച് ഏപ്രില്‍ 18 വരെ വിസ നീട്ടിയെടുക്കാം.

വിസ പുതുക്കാതെയും പിഴയോ അധിക ഫീസോ നല്‍കാതെയും വിമാനത്താവളങ്ങള്‍ വഴി നേരിട്ട് സ്വന്തം നാട്ടിലേക്ക് മടങ്ങാനും അനുവാദമുണ്ട്.

ഈ ആനുകൂല്യം ഉപയോഗപ്പെടുത്തി 2026 ഏപ്രില്‍ 18-ന് മുന്‍പായി രാജ്യം വിടേണ്ടതാണ്.

നിശ്ചിത സമയപരിധിക്കുള്ളില്‍ മടങ്ങാത്തവര്‍ക്കെതിരെ കര്‍ശന നിയമനടപടികള്‍ സ്വീകരിക്കുമെന്ന് മന്ത്രാലയം വ്യക്തമാക്കിയിട്ടുണ്ട്.