തെഹ്റാന്/വാഷിംഗ്ടണ്: തന്ത്രപ്രധാനമായ ഹോര്മുസ് കടലിടുക്ക് ശത്രുരാജ്യങ്ങള്ക്കായി തുറന്നുനല്കില്ലെന്ന് ഇറാന്റെ റെവല്യൂഷണറി ഗാര്ഡ്സ് (IRGC) വ്യക്തമാക്കി. ഹോര്മുസ് കടലിടുക്കിന്റെ നിയന്ത്രണം പൂര്ണ്ണമായും തങ്ങളുടെ നാവികസേനയുടെ കൈകളിലാണെന്നും അവര് അറിയിച്ചു. എന്നാല്, ഹോര്മുസ് കടലിടുക്ക് ഗതാഗതത്തിനായി പൂര്ണ്ണമായും തുറന്നുകൊടുത്താല് മാത്രമേ വെടിനിര്ത്തലിനെക്കുറിച്ച് ആലോചിക്കുകയുള്ളൂ എന്ന് യുഎസ് പ്രസിഡന്റ് ഡൊണാള്ഡ് ട്രംപ് വ്യക്തമാക്കി.
ഇറാന് പ്രസിഡന്റ് വെടിനിര്ത്തലിന് താല്പര്യം പ്രകടിപ്പിച്ചതായി ട്രംപ് അവകാശപ്പെട്ടു. ഹോര്മുസ് കടലിടുക്ക് പൂര്ണ്ണമായും സ്വതന്ത്രമാകുന്നതുവരെ ഇറാനെതിരെയുള്ള ആക്രമണം തുടരുമെന്ന് അദ്ദേഹം മുന്നറിയിപ്പ് നല്കി. ഭീഷണിയുടെയും സമയപരിധിയുടെയും ഭാഷയില് ഇറാനോട് സംസാരിക്കാന് കഴിയില്ലെന്നും പ്രതിരോധത്തിനായി തങ്ങള്ക്ക് സമയപരിധിയില്ലെന്നും ഇറാന്റെ വിദേശകാര്യ മന്ത്രി അബ്ബാസ് അരാഗ്ചി ഇതിന് മറുപടി നല്കി.
ഇസ്രായേല് എണ്ണക്കപ്പല് ഇറാന് തകര്ത്തു. പേര്ഷ്യന് ഗള്ഫില് ഇസ്രായേലിന്റെ ഉടമസ്ഥതയിലുള്ള 'അക്വ 1' (Aqua 1) എന്ന എണ്ണക്കപ്പല് മിസൈല് ആക്രമണത്തിലൂടെ തകര്ത്തതായി ഇറാന് റെവല്യൂഷണറി ഗാര്ഡ്സ് സ്ഥിരീകരിച്ചു. ഖത്തറിന്റെ സമുദ്രാതിര്ത്തിയിലാണ് കപ്പലിന് നേരെ ആക്രമണമുണ്ടായതെന്ന് ഖത്തര് അധികൃതര് നേരത്തെ അറിയിച്ചിരുന്നു. ഇറാന്റെ നടപടികള്ക്കെതിരെ ഐ.സി.എ.ഒ രാജ്യാന്തര സിവില് ഏവിയേഷന് മേഖലയ്ക്ക് ഭീഷണിയാകുന്ന രീതിയിലുള്ള ഇറാന്റെ നിയമവിരുദ്ധമായ ആക്രമണങ്ങളെ അന്താരാഷ്ട്ര സിവില് ഏവിയേഷന് ഓര്ഗനൈസേഷന് (ICAO) അപലപിച്ചു. ജി.സി.സി രാജ്യങ്ങള്, ഈജിപ്ത്, ജോര്ദാന്, മൊറോക്കോ എന്നിവര് സമര്പ്പിച്ച സംയുക്ത പ്രമേയത്തിന്റെ അടിസ്ഥാനത്തിലാണ് ഈ സുപ്രധാന തീരുമാനം.
ബെയ്റൂട്ടില് ഹിസ്ബുള്ള കമാന്ഡര് കൊല്ലപ്പെട്ടു. ലെബനന് തലസ്ഥാനമായ ബെയ്റൂട്ടിലെ ജ്നാ (Jnah) മേഖലയില് ഇസ്രായേല് നടത്തിയ വ്യോമാക്രമണത്തിലാണ് ഹിസ്ബുള്ളയുടെ ഇറാഖ് കാര്യങ്ങള്ക്കായുള്ള സൈനിക കമാന്ഡര് യൂസഫ് ഹാഷിം കൊല്ലപ്പെട്ടത്. ആക്രമണത്തില് ഹാഷിം ഉള്പ്പെടെ ഏഴ് പേര് കൊല്ലപ്പെട്ടതായാണ് റിപ്പോര്ട്ട്.
Related News
