വാഷിംഗ്ടണ്: ഇറാന് വ്യോമാതിര്ത്തിയില് അമേരിക്കന് യുദ്ധവിമാനം തകര്ന്നുവീണു. ഇറാന്റെ ആക്രമണത്തിലാണ് വിമാനം നിലംപൊത്തിയതെന്നാണ് റിപ്പോര്ട്ട്. വിമാനത്തിലുണ്ടായിരുന്ന രണ്ട് ജീവനക്കാരില് ഒരാളെ യുഎസ് സേന സാഹസികമായി രക്ഷപ്പെടുത്തിയതായി ഔദ്യോഗിക വൃത്തങ്ങളെ ഉദ്ധരിച്ച് റോയിട്ടേഴ്സ് റിപ്പോര്ട്ട് ചെയ്തു. അപകടത്തില്പ്പെട്ട രണ്ടാമത്തെ വൈമാനികനായുള്ള തിരച്ചില് ഊര്ജ്ജിതമായി തുടരുകയാണ്.
അമേരിക്കയുടെ കരുത്തുറ്റ F-15E സ്ട്രൈക്ക് ഈഗിള് യുദ്ധവിമാനമാണ് തകര്ന്നതെന്ന് ന്യൂയോര്ക്ക് ടൈംസും വാള്സ്ട്രീറ്റ് ജേണലും റിപ്പോര്ട്ട് ചെയ്തു. പൈലറ്റും വെപ്പണ് സിസ്റ്റം ഓഫീസറും ഉള്പ്പെടെ രണ്ട് പേരാണ് ഈ വിമാനത്തിലുണ്ടാവുക. തകര്ന്നു വീണത് അത്യാധുനിക എഫ്-35 സ്റ്റെല്ത്ത് വിമാനമാണെന്ന് ഇറാനിയന് മാധ്യമങ്ങള് അവകാശപ്പെട്ടെങ്കിലും, പുറത്തുവന്ന ദൃശ്യങ്ങള് പരിശോധിച്ചതില് നിന്നും അത് എഫ്-15 വിമാനമാണെന്ന് സിഎന്എന് സ്ഥിരീകരിച്ചു.
രക്ഷാപ്രവര്ത്തനം തുടരുന്നു
വിമാനം തകര്ന്നതിന് പിന്നാലെ യുഎസ് സ്പെഷ്യലൈസ്ഡ് ഫോഴ്സിന്റെ നേതൃത്വത്തില് വന്തോതിലുള്ള തിരച്ചില് ആരംഭിച്ചു. ഇറാനിയന് മാധ്യമങ്ങള് പുറത്തുവിട്ട ദൃശ്യങ്ങളില് അമേരിക്കന് ഹെലികോപ്റ്ററുകള് തകര്ന്ന വിമാനത്തിന്റെ അവശിഷ്ടങ്ങള്ക്കിടയില് താഴ്ന്നു പറക്കുന്നത് കാണാം.
സംഭവത്തെക്കുറിച്ച് പ്രസിഡന്റ് ഡൊണാള്ഡ് ട്രംപിനെ അറിയിച്ചിട്ടുണ്ടെങ്കിലും വൈറ്റ് ഹൗസോ പെന്റഗണോ ഇതുവരെ ഔദ്യോഗികമായി പ്രതികരിച്ചിട്ടില്ല. ഇറാന് യുദ്ധം ആരംഭിച്ചതിന് ശേഷം ഇറാന് മണ്ണില് തകരുന്ന ആദ്യത്തെ അമേരിക്കന് യുദ്ധവിമാനമാണിത്.
ഇറാന്റെ പ്രതികരണം
അമേരിക്കന് പൈലറ്റിനെ കണ്ടെത്താന് സൈനിക നടപടി തുടങ്ങിയതായി ഇറാന്റെ ഫാര്സ് വാര്ത്താ ഏജന്സി അറിയിച്ചു. പൈലറ്റിനെ ജീവനോടെ പിടികൂടി കൈമാറുന്നവര്ക്ക് വലിയ പ്രതിഫലം നല്കുമെന്ന് ഇറാനിലെ പ്രാദേശിക ടെലിവിഷന് ചാനല് വഴി ജനങ്ങളോട് അഭ്യര്ത്ഥിച്ചു.
'പ്രിയപ്പെട്ട കോഹ്ഗിലുയേ, ബോയര്-അഹമ്മദ് പ്രവിശ്യയിലെ ജനങ്ങളേ, ശത്രു രാജ്യത്തിന്റെ പൈലറ്റിനെ പിടികൂടി പോലീസിനോ സൈന്യത്തിനോ കൈമാറിയാല് നിങ്ങള്ക്ക് അര്ഹമായ പ്രതിഫലം നല്കുന്നതാണ്.' - ഇറാന് ടെലിവിഷന് റിപ്പോര്ട്ട് ചെയ്തു.
യുദ്ധം വ്യാപിക്കുന്നു
ഇറാന്-ഇസ്രായേല് സംഘര്ഷം രൂക്ഷമായി തുടരുന്നതിനിടെയാണ് വിമാനം തകര്ന്നത്. വെള്ളിയാഴ്ച ഉച്ചകഴിഞ്ഞ് ടെഹ്റാന്റെ വടക്കന് മേഖലയില് ശക്തമായ സ്ഫോടനങ്ങള് ഉണ്ടായതായി റിപ്പോര്ട്ടുകളുണ്ട്. ഇറാനില് നിന്നുള്ള മിസൈല് ആക്രമണത്തെ തുടര്ന്ന് ഇസ്രായേലില് വ്യോമ പ്രതിരോധ സംവിധാനങ്ങള് സജ്ജമാക്കിയിരിക്കുകയാണ്.
ഒരു മാസം മുന്പ് അമേരിക്കയും ഇസ്രായേലും സംയുക്തമായി ഇറാനില് നടത്തിയ ആക്രമണത്തോടെയാണ് യുദ്ധത്തിന് തുടക്കമായത്. നിലവില് മിഡില് ഈസ്റ്റ് മുഴുവന് വ്യാപിച്ച യുദ്ധം ലോക സമ്പദ്വ്യവസ്ഥയെയും ദശലക്ഷക്കണക്കിന് ആളുകളെയും ഗുരുതരമായി ബാധിച്ചിരിക്കുകയാണ്.
Related News
