ന്യൂയോര്ക്ക്/ദുബായ്: ഹോര്മുസ് കടലിടുക്കിലെ ഇറാന്റെ നിയമവിരുദ്ധ ഇടപെടലുകള് തടയാനും ചരക്ക് നീക്കം സുഗമമാക്കാനും സൈനിക ശക്തി ഉപയോഗിക്കാന് അനുമതി നല്കണമെന്ന് ഗള്ഫ് സഹകരണ കൗണ്സില് (GCC) ഐക്യരാഷ്ട്രസഭയോട് ആവശ്യപ്പെട്ടു. യുഎന് രക്ഷാസമിതിയില് നടന്ന പ്രത്യേക യോഗത്തിലാണ് ജിസിസി സെക്രട്ടറി ജനറല് ജാസെം അല് ബുദൈവി ഈ ആവശ്യം ഉന്നയിച്ചത്.
ഇറാന് ഹോര്മുസ് കടലിടുക്ക് ഏകപക്ഷീയമായി അടച്ചിരിക്കുകയാണെന്നും വാണിജ്യ കപ്പലുകളെയും എണ്ണ ടാങ്കറുകളെയും തടയുകയാണെന്നും ജിസിസി കുറ്റപ്പെടുത്തി. കപ്പലുകള് കടന്നുപോകുന്നതിന് ഇറാന് കര്ശനമായ നിബന്ധനകള് ഏര്പ്പെടുത്തുന്നത് അന്താരാഷ്ട്ര നാവിക നിയമങ്ങളുടെ ലംഘനമാണെന്ന് ജാസെം അല് ബുദൈവി ചൂണ്ടിക്കാട്ടി. അന്താരാഷ്ട്ര കപ്പല് പാതകളുടെ സുരക്ഷ ഉറപ്പാക്കാന് രക്ഷാസമിതി അടിയന്തര നടപടികള് സ്വീകരിക്കണമെന്നും അദ്ദേഹം ആവശ്യപ്പെട്ടു.
രക്ഷാസമിതിയില് ഭിന്നത
കടലിടുക്കിലൂടെയുള്ള സുരക്ഷിത യാത്ര ഉറപ്പാക്കാന് രാജ്യങ്ങള്ക്ക് സൈനിക നീക്കം ഉള്പ്പെടെയുള്ള 'ആവശ്യമായ എല്ലാ നടപടികളും' സ്വീകരിക്കാന് അനുമതി നല്കുന്ന പ്രമേയം ബഹ്റൈന് രക്ഷാസമിതിയില് അവതരിപ്പിച്ചു. എന്നാല്, 15 അംഗ സമിതിയില് ഈ വിഷയത്തില് കടുത്ത ഭിന്നത നിലനില്ക്കുകയാണ്. വീറ്റോ അധികാരമുള്ള റഷ്യ, ചൈന, ഫ്രാന്സ് എന്നീ രാജ്യങ്ങള് പ്രമേയത്തിലെ സൈനിക നടപടിയെന്ന നിര്ദ്ദേശത്തോട് ശക്തമായ വിയോജിപ്പ് പ്രകടിപ്പിച്ചു. പ്രമേയത്തിന്റെ പരിഷ്കരിച്ച അഞ്ചാമത്തെ കരട് വ്യാഴാഴ്ച അംഗരാജ്യങ്ങള്ക്ക് വിതരണം ചെയ്തിട്ടുണ്ട്.
ഇറാനിലെ അമേരിക്കന് സൈനിക നടപടികള് ലക്ഷ്യത്തോടടുക്കുകയാണെന്ന് പ്രസിഡന്റ് ഡൊണാള്ഡ് ട്രംപ് അവകാശപ്പെട്ടു. വരും ആഴ്ചകളില് ആക്രമണം കൂടുതല് തീവ്രമാക്കുമെന്നും അദ്ദേഹം മുന്നറിയിപ്പ് നല്കി. എന്നാല്, യുദ്ധത്തിന്റെ കാര്യത്തില് നാറ്റോ സഖ്യത്തിനുള്ളില് ഭിന്നത രൂക്ഷമാകുന്നത് അമേരിക്കയ്ക്ക് വെല്ലുവിളിയാവുന്നുണ്ട്.
അതേസമയം, ഇറാന് തൊടുത്തുവിട്ട മിസൈലുകളെയും ഡ്രോണുകളെയും വിജയകരമായി പ്രതിരോധിച്ചതായും രാജ്യത്തെ സാഹചര്യം പൂര്ണ്ണ നിയന്ത്രണത്തിലാണെന്നും യുഎഇ അധികൃതര് വ്യക്തമാക്കി. യുദ്ധം 34 ദിവസം പിന്നിടുമ്പോഴും ആഗോള ഇന്ധന വിപണിയും ഓഹരി വിപണികളും വന് അനിശ്ചിതത്വത്തിലാണ്.
Related News
