ലണ്ടന്/പാരിസ്: ഹോര്മുസ് കടലിടുക്കിലെ ഇറാന് ഉപരോധം അവസാനിപ്പിക്കാനും ആഗോള സമ്പദ്വ്യവസ്ഥയെ തടവിലാക്കുന്ന നീക്കങ്ങളില് നിന്ന് പിന്തിരിപ്പിക്കാനും ലക്ഷ്യമിട്ട് ലോകരാജ്യങ്ങള് ഒന്നിക്കുന്നു. ബ്രിട്ടീഷ് വിദേശകാര്യ മന്ത്രി ഇവെറ്റ് കൂപ്പറിന്റെ അധ്യക്ഷതയില് നടന്ന നാല്പ്പതോളം രാജ്യങ്ങളുടെ യോഗത്തിലാണ് നിര്ണ്ണായക തീരുമാനമുണ്ടായത്. കടലിടുക്ക് തുറക്കുന്നതിനായി സൈനികവും നയതന്ത്രപരവുമായ സാധ്യതകള് തേടാനാണ് രാജ്യങ്ങളുടെ നീക്കം.
ലോകത്തെ ആകെ എണ്ണ ഉപഭോഗത്തിന്റെ അഞ്ചിലൊന്ന് കടന്നുപോകുന്ന ഹോര്മുസ് കടലിടുക്ക് ഇറാന് ഏകപക്ഷീയമായി അടച്ചതോടെ ആഗോള വിപണിയില് ഇന്ധനവില കുതിച്ചുയരുകയാണ്. 'അന്താരാഷ്ട്ര കപ്പല്പ്പാത ഹൈജാക്ക് ചെയ്ത് ലോക സമ്പദ്വ്യവസ്ഥയെ ഇറാന് ബന്ദിയാക്കിയിരിക്കുകയാണ്,' ഇവെറ്റ് കൂപ്പര് പറഞ്ഞു. ഫെബ്രുവരി അവസാനം ആരംഭിച്ച യുഎസ്-ഇസ്രായേല് ആക്രമണങ്ങള്ക്ക് പ്രതികാരമായാണ് ഇറാന് കടലിടുക്ക് അടച്ചത്.
എന്നാല് ഈ ചര്ച്ചകളില് നിന്ന് അമേരിക്ക വിട്ടുനിന്നു എന്നതാണ് കൗതുകകരം. ഹോര്മുസ് കടലിടുക്ക് സ്വയം തുറന്നുകൊള്ളുമെന്നും ഈ പാതയെ ആശ്രയിക്കുന്ന രാജ്യങ്ങള് തന്നെ അതിന്റെ സുരക്ഷ ഉറപ്പാക്കണമെന്നുമായിരുന്നു യുഎസ് പ്രസിഡന്റ് ഡൊണാള്ഡ് ട്രംപിന്റെ നിലപാട്. കടലിടുക്ക് തിരിച്ചുപിടിക്കാന് മറ്റു രാജ്യങ്ങള് ധൈര്യം കാണിക്കണമെന്നും അദ്ദേഹം കഴിഞ്ഞ ദിവസം പരിഹസിച്ചിരുന്നു.
കടലിടുക്ക് സൈനികമായി പിടിച്ചെടുക്കുന്നത് പ്രായോഗികമല്ലെന്ന് ഫ്രഞ്ച് പ്രസിഡന്റ് ഇമ്മാനുവല് മാക്രോണ് വ്യക്തമാക്കി. ഇറാന് റവല്യൂഷണറി ഗാര്ഡില് നിന്നുള്ള തീരദേശ ആക്രമണങ്ങളും ബാലിസ്റ്റിക് മിസൈല് ഭീഷണിയും കണക്കിലെടുക്കുമ്പോള് സൈനിക നടപടി വലിയ അപകടമുണ്ടാക്കുമെന്ന് അദ്ദേഹം മുന്നറിയിപ്പ് നല്കി.
എന്നാല്, ചരക്ക് കപ്പലുകള്ക്ക് ഇന്ഷുറന്സ് പരിരക്ഷ ഉറപ്പാക്കാനും കപ്പല് ഉടമകളില് ആത്മവിശ്വാസം വളര്ത്താനും സംയുക്ത സൈനിക വിന്യാസം ആവശ്യമാണെന്ന് ഫ്രഞ്ച് സായുധ സേന വക്താവ് ഗില്ലൂം വെര്നെറ്റ് ചൂണ്ടിക്കാട്ടി. വ്യോമ-നാവിക സേനകളുടെ ഏകോപനവും ഇന്റലിജന്സ് കൈമാറ്റവും ചര്ച്ചയായി.
മേഖലയിലെ സുരക്ഷാ ക്രമീകരണങ്ങള്ക്കായി സൈനിക പ്ലാനര്മാരുടെ പ്രത്യേക യോഗം അടുത്ത ആഴ്ച ബ്രിട്ടനില് നടക്കും. ഇന്ധനവില കുതിച്ചുയരുന്ന സാഹചര്യത്തില് വികസിത രാജ്യങ്ങളും ഗള്ഫ് രാഷ്ട്രങ്ങളും ഒരേപോലെ ആശങ്കയിലാണ്. ഇറാന്റെ സുരക്ഷാ ഗ്യാരണ്ടിയില്ലാതെ കപ്പല് ഗതാഗതം പുനരാരംഭിക്കുന്നത് തല്ക്കാലം അസാധ്യമാണെന്നാണ് വിദഗ്ധരുടെ വിലയിരുത്തല്.
ഫോട്ടോ: ലണ്ടനിലുള്ള ഫോറിന് ആന്ഡ് കോമണ്വെല്ത്ത് ഓഫീസില് നടന്ന വെര്ച്വല് ഉച്ചകോടിയില് ബ്രിട്ടീഷ് വിദേശകാര്യ സെക്രട്ടറി ഇവെറ്റ് കൂപ്പര് സംസാരിക്കുന്നു.
Related News
