ടെഹ്റാന്: അമേരിക്കയുമായുള്ള വെടിനിര്ത്തല് കരാറിലെ വ്യവസ്ഥകള് ലംഘിക്കപ്പെട്ട സാഹചര്യത്തില്, ഇനി ചര്ച്ചകള് തുടരുന്നതില് അര്ത്ഥമില്ലെന്ന് ഇറാന് പാര്ലമെന്റ് സ്പീക്കര് മുഹമ്മദ് ബാഗര് ഖാലിബാഫ്. ഇറാന് മുന്നോട്ടുവെച്ച 10 ഇന നിര്ദ്ദേശങ്ങള് അംഗീകരിച്ച് മണിക്കൂറുകള്ക്കകം അമേരിക്കയും സഖ്യകക്ഷികളും കരാര് ലംഘിച്ചതായി അദ്ദേഹം ആരോപിച്ചു. എക്സ് പ്ലാറ്റ്ഫോമിലൂടെയായിരുന്നു അദ്ദേഹത്തിന്റെ പ്രതികരണം.
ഇറാന് സമര്പ്പിച്ച ചര്ച്ചാ പദ്ധതിയുടെ അടിസ്ഥാനമായ മൂന്ന് പ്രധാന കാര്യങ്ങള് ഇതിനോടകം ലംഘിക്കപ്പെട്ടതായി സ്പീക്കര് ചൂണ്ടിക്കാട്ടി. എല്ലാ മേഖലകളിലും ഉടനടി വെടിനിര്ത്തല് വേണമെന്നതായിരുന്നു ആദ്യ വ്യവസ്ഥ. എന്നാല് ബുധനാഴ്ച ഇസ്രായേല് ലെബനനില് നടത്തിയ കനത്ത ആക്രമണത്തില് നൂറുകണക്കിന് സിവിലിയന്മാര് കൊല്ലപ്പെട്ടു. ഇറാന്റെ വ്യോമാതിര്ത്തി ലംഘിക്കില്ലെന്ന വ്യവസ്ഥ നിലനില്ക്കെ, പേര്ഷ്യന് പ്രവിശ്യയായ ലാറില് അതിക്രമിച്ചു കയറിയ ഡ്രോണ് ഇറാന് വെടിവെച്ചിട്ടു. യുറേനിയം സമ്പുഷ്ടീകരിക്കാനുള്ള ഇറാന്റെ അവകാശം അംഗീകരിക്കാന് അമേരിക്ക ഇപ്പോഴും വിസമ്മതിക്കുന്നു.
'തുടക്കം മുതലേ അവിശ്വാസത്തോടെയാണ് ഞങ്ങള് ഈ പ്രക്രിയയെ നോക്കിക്കണ്ടത്. ചര്ച്ചകള് തുടങ്ങും മുന്പേ അമേരിക്ക തങ്ങളുടെ വാഗ്ദാനങ്ങള് ലംഘിച്ചിരിക്കുന്നു. ഇത്തരമൊരു സാഹചര്യത്തില് ഉഭയകക്ഷി വെടിനിര്ത്തലിനോ ചര്ച്ചകള്ക്കോ പ്രസക്തിയില്ല,' ഖാലിബാഫ് വ്യക്തമാക്കി.
വെടിനിര്ത്തല് കരാറില് ലെബനനും ഉള്പ്പെടുമെന്ന് മധ്യസ്ഥത വഹിച്ച പാകിസ്ഥാന് പ്രധാനമന്ത്രി ഷഹബാസ് ഷെരീഫ് നേരത്തെ അറിയിച്ചിരുന്നു. എന്നാല് ഇസ്രായേലിന്റെ ആക്രമണവും യുറേനിയം സമ്പുഷ്ടീകരണത്തെ ചൊല്ലിയുള്ള തര്ക്കവും സമാധാന നീക്കങ്ങളെ പൂര്ണ്ണമായും പ്രതിസന്ധിയിലാക്കിയിരിക്കുകയാണ്.
Related News
