ജെറുസലേം: ഹിസ്ബുള്ളയെ നിരായുധീകരിക്കുന്നത് ഉള്പ്പെടെയുള്ള കാര്യങ്ങള് ചര്ച്ച ചെയ്യുന്നതിനായി ലെബനനുമായി സമാധാന ചര്ച്ചകള് ആരംഭിക്കാന് ഉത്തരവിട്ടതായി ഇസ്രായേല് പ്രധാനമന്ത്രി ബെഞ്ചമിന് നെതന്യാഹു. വ്യാഴാഴ്ച പുറത്തിറക്കിയ പ്രസ്താവനയിലൂടെയാണ് അദ്ദേഹം ഇക്കാര്യം അറിയിച്ചത്.
'ഇസ്രായേലുമായി നേരിട്ടുള്ള ചര്ച്ചകള് ആരംഭിക്കണമെന്ന ലെബനന്റെ ആവര്ത്തിച്ചുള്ള അഭ്യര്ത്ഥന കണക്കിലെടുത്ത്, എത്രയും വേഗം ചര്ച്ചകള് തുടങ്ങാന് ഞാന് ഇന്നലെ മന്ത്രിസഭയ്ക്ക് നിര്ദ്ദേശം നല്കി. ഹിസ്ബുള്ളയെ നിരായുധീകരിക്കുന്നതിലും ഇസ്രായേലും ലെബനനും തമ്മില് സമാധാനപരമായ ബന്ധം സ്ഥാപിക്കുന്നതിലുമായിരിക്കും ഈ ചര്ച്ചകള് ശ്രദ്ധ കേന്ദ്രീകരിക്കുക.' എന്ന് നെതന്യാഹു പറഞ്ഞു. എന്നാല് നെതന്യാഹുവിന്റെ ഈ പ്രസ്താവനയോട് ലെബനന് സര്ക്കാര് ഔദ്യോഗികമായി ഇതുവരെ പ്രതികരിച്ചിട്ടില്ല.
എങ്കിലും, നെതന്യാഹുവിന്റെ പ്രസ്താവനയ്ക്ക് ഒരു മണിക്കൂര് മുന്പ് ലെബനന് പ്രസിഡന്റ് ജോസഫ് ഔന് സമാനമായ സൂചന നല്കിയിരുന്നു. ഇസ്രായേലും ലെബനനും തമ്മില് വെടിനിര്ത്തല് നടപ്പിലാക്കുക എന്നതും അതിനു പിന്നാലെ നേരിട്ടുള്ള ചര്ച്ചകള് ആരംഭിക്കുക എന്നതും മാത്രമാണ് നിലവിലെ സാഹചര്യത്തിനുള്ള ഏക പരിഹാരമെന്ന് അദ്ദേഹം പറഞ്ഞു. ഇക്കാര്യത്തില് നയതന്ത്രപരമായ നീക്കങ്ങള് നടത്തിവരികയാണെന്നും അന്താരാഷ്ട്ര തലത്തില് അതിന് അനുകൂലമായ പ്രതികരണങ്ങള് ലഭിക്കുന്നുണ്ടെന്നും അദ്ദേഹം കൂട്ടിച്ചേര്ത്തു.
മാര്ച്ച് 2-ന് ഇറാന് പിന്തുണയുള്ള ഹിസ്ബുള്ള ഇസ്രായേലിന് നേരെ ആക്രമണം ആരംഭിച്ചതിനെത്തുടര്ന്നാണ് ഇസ്രായേല് ലെബനനില് ശക്തമായ പ്രത്യാക്രമണം തുടങ്ങിയത്. ഇസ്രായേല് ആക്രമണത്തില് ഇതുവരെ 1,700 ഓളം പേര് കൊല്ലപ്പെടുകയും പത്തുലക്ഷത്തിലധികം ആളുകള് പലായനം ചെയ്യേണ്ടി വരികയും ചെയ്തതായി ലെബനന് അധികൃതര് വ്യക്തമാക്കുന്നു. ഇസ്രായേലിലേക്ക് നൂറുകണക്കിന് റോക്കറ്റുകളും ഡ്രോണുകളും അയച്ച ഹിസ്ബുള്ളയുടെ ഏതാണ്ട് 400 പോരാളികളും കൊല്ലപ്പെട്ടതായാണ് റിപ്പോര്ട്ടുകള്.
Related News
