ന്യൂഡല്ഹി: ലബനന് നേരെ ഇസ്രായേല് നടത്തുന്ന ആക്രമണങ്ങളെ രൂക്ഷമായി വിമര്ശിച്ച പാകിസ്ഥാന് പ്രതിരോധ മന്ത്രി ഖവാജ ആസിഫിന്റെ പ്രസ്താവനയെത്തുടര്ന്ന് ഇരുരാജ്യങ്ങളും തമ്മില് വാക്പോര് മുറുകുന്നു. ഇസ്രായേലിനെ 'തിന്മ' എന്നും 'മനുഷ്യരാശിക്കേറ്റ ശാപം' എന്നും വിശേഷിപ്പിച്ച ആസിഫിന് കടുത്ത ഭാഷയിലാണ് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു മറുപടി നല്കിയത്.
ഇസ്ലാമാബാദില് സമാധാന ചര്ച്ചകള് പുരോഗമിക്കവെ ലബനനില് ഇസ്രായേല് വംശഹത്യ നടത്തുകയാണെന്ന് ഖവാജ ആസിഫ് 'എക്സില്' കുറിച്ചു.'ആദ്യം ഗാസ, പിന്നെ ഇറാന്, ഇപ്പോള് ലബനന്; ഇസ്രായേല് നിരപരാധികളെ കൊന്നൊടുക്കുകയാണ്. യൂറോപ്യന് ജൂതന്മാരെ ഒഴിവാക്കാന് പലസ്തീന് മണ്ണില് ഈ അര്ബുദ സമാനമായ രാജ്യം സൃഷ്ടിച്ചവര് നരകത്തില് എരിയട്ടെ,' എന്നായിരുന്നു ആസിഫിന്റെ വിവാദമായ പോസ്റ്റ്.
ഇസ്രായേലില് നിന്നുള്ള കടുത്ത പ്രതിഷേധത്തെത്തുടര്ന്ന് അദ്ദേഹം പിന്നീട് ഈ പോസ്റ്റ് പിന്വലിച്ചു. എന്നാല്, പാക് നേതൃത്വത്തിന്റെ പ്രസ്താവനകള് അങ്ങേയറ്റം വിദ്വേഷപരമാണെന്നും ഇസ്രായേലിന്റെ നിലനില്പ്പിനെത്തന്നെയാണ് പാകിസ്ഥാന് ചോദ്യം ചെയ്യുന്നതെന്നും ഇസ്രായേല് വിദേശകാര്യ മന്ത്രി ഗിദിയോന് സാര് പ്രതികരിച്ചു. ഔദ്യോഗിക നയതന്ത്ര ബന്ധമില്ലാത്ത ഇരുരാജ്യങ്ങളും തമ്മിലുള്ള അസാധാരണമായ നേരിട്ടുള്ള ഏറ്റുമുട്ടലായി ഇത് മാറി.
അമേരിക്കയും ഇറാനും തമ്മില് ധാരണയായ രണ്ടാഴ്ചത്തെ വെടിനിര്ത്തലില് ലബനന് ഉള്പ്പെട്ടിട്ടുണ്ടോ എന്ന കാര്യത്തില് കടുത്ത ആശയക്കുഴപ്പം നിലനില്ക്കുന്നുണ്ട്. വെടിനിര്ത്തല് എല്ലാ മേഖലകള്ക്കും ബാധകമാണെന്ന് മധ്യസ്ഥനായി പ്രവര്ത്തിക്കുന്ന പാക് പ്രധാനമന്ത്രി ഷെഹബാസ് ഷെരീഫ് അവകാശപ്പെട്ടെങ്കിലും, ലബനന് ഇതില് ഉള്പ്പെടുന്നില്ലെന്ന് നെതന്യാഹുവും അമേരിക്കന് വൈസ് പ്രസിഡന്റ് ജെ.ഡി. വാന്സും വ്യക്തമാക്കി.
ഫെബ്രുവരി 28-ന് അമേരിക്കയും ഇസ്രായേലും ഇറാനില് നടത്തിയ സംയുക്ത ആക്രമണത്തെത്തുടര്ന്നാണ് യുദ്ധം ആരംഭിച്ചത്. ഡൊണാള്ഡ് ട്രംപിന്റെ മുന്നറിയിപ്പിനെത്തുടര്ന്ന് ഏപ്രില് 10ന് ഇസ്ലാമാബാദില് വെച്ച് നിര്ണ്ണായകമായ സമാധാന ചര്ച്ചകള് നടത്താന് തീരുമാനിച്ചിരുന്നു.
ലബനനിലെ സൈനിക നീക്കം ഇസ്രായേല് നിര്ത്തിവെച്ചില്ലെങ്കില് ഇസ്ലാമാബാദില് നടക്കാനിരിക്കുന്ന സമാധാന ചര്ച്ചകളില് നിന്ന് പിന്മാറുമെന്ന് ഇറാന് ഭീഷണി മുഴക്കിയിട്ടുണ്ട്. ഇതോടെ മിഡില് ഈസ്റ്റിലെ സംഘര്ഷം ലഘൂകരിക്കാനുള്ള നയതന്ത്ര ശ്രമങ്ങള് വീണ്ടും അനിശ്ചിതത്വത്തിലായി.
അതേസമയം, ഹിസ്ബുള്ളയെ നിരായുധരാക്കുന്നതുമായി ബന്ധപ്പെട്ട് ലബനനുമായി നേരിട്ടുള്ള ചര്ച്ചകള്ക്ക് നെതന്യാഹു ഉത്തരവിട്ടു. അടുത്ത ആഴ്ച വാഷിംഗ്ടണില് വെച്ച് ഇരുരാജ്യങ്ങളും ചര്ച്ച നടത്തുമെന്നാണ് റിപ്പോര്ട്ട്. പാകിസ്ഥാനെ ഒരു വിശ്വസ്ത മധ്യസ്ഥനായി കാണുന്നില്ലെന്ന് ഇന്ത്യയിലെ ഇസ്രായേല് സ്ഥാനപതി റൂവന് അസര് വ്യക്തമാക്കിയിട്ടുണ്ട്.
Related News
