വാഷിംഗ്ടണ്‍: ഇറാനുമായുള്ള യുദ്ധം അവസാനിപ്പിക്കുക എന്ന ലക്ഷ്യത്തോടെയുള്ള സമാധാന ചര്‍ച്ചകള്‍ക്കായി അമേരിക്കന്‍ വൈസ് പ്രസിഡന്റ് ജെ.ഡി. വാന്‍സ് പാകിസ്ഥാനിലേക്ക് തിരിച്ചു. പുറപ്പെടുന്നതിന് മുന്നോടിയായി ഇറാന് കടുത്ത മുന്നറിയിപ്പാണ് അദ്ദേഹം നല്‍കിയത്. അമേരിക്കയെ 'കളിപ്പിക്കാനാണ്' ഇറാന്‍ ശ്രമിക്കുന്നതെങ്കില്‍ ചര്‍ച്ചാ സംഘം അതിനോട് ഒട്ടും അനുഭാവം കാണിക്കില്ലെന്ന് വാന്‍സ് വ്യക്തമാക്കി.

ഫെബ്രുവരി 28-ന് ആരംഭിച്ച ആറാഴ്ച പിന്നിട്ട യുദ്ധം അവസാനിപ്പിക്കാന്‍ തന്റെ വിശ്വസ്തനായ വാന്‍സിനെയാണ് പ്രസിഡന്റ് ഡൊണാള്‍ഡ് ട്രംപ് ചുമതലപ്പെടുത്തിയിരിക്കുന്നത്. നയതന്ത്ര തലത്തില്‍ വലിയ പരിചയസമ്പത്തില്ലാത്ത വാന്‍സിന് ഇത് കടുത്ത പരീക്ഷണമായിരിക്കും.

ഇറാന്‍ ആത്മാര്‍ത്ഥതയോടെയാണ് ചര്‍ച്ചയ്ക്ക് വരുന്നതെങ്കില്‍ അമേരിക്ക സഹകരിക്കാന്‍ തയ്യാറാണെന്ന് ട്രംപിനെ ഉദ്ധരിച്ച് വാന്‍സ് പറഞ്ഞു. എന്നാല്‍ ചര്‍ച്ചകള്‍ എങ്ങനെ മുന്നോട്ട് പോകണം എന്നതിനെക്കുറിച്ച് ട്രംപ് വ്യക്തമായ മാര്‍ഗ്ഗനിര്‍ദ്ദേശങ്ങള്‍ നല്‍കിയിട്ടുണ്ടെന്നും അദ്ദേഹം കൂട്ടിചേര്‍ത്തു. വാന്‍സിനൊപ്പം ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്കോഫ്, മരുമകന്‍ ജാരെഡ് കുഷ്‌നര്‍ എന്നിവരും സംഘത്തിലുണ്ട്.

ചൊവ്വാഴ്ച പ്രഖ്യാപിച്ച താല്‍ക്കാലിക വെടിനിര്‍ത്തല്‍ നിലവില്‍ തന്നെ വലിയ പ്രതിസന്ധിയിലാണ്. ലബനനിലെ ഇസ്രായേല്‍ ആക്രമണം നിര്‍ത്താതെ ചര്‍ച്ചകള്‍ക്ക് അര്‍ത്ഥമില്ലെന്നും തടഞ്ഞുവെച്ചിരിക്കുന്ന സാമ്പത്തിക ആസ്തികള്‍ ചര്‍ച്ചയ്ക്ക് മുന്‍പ് വിട്ടുനല്‍കണമെന്നും ഇറാന്‍ പാര്‍ലമെന്റ് സ്പീക്കര്‍ മുഹമ്മദ് ബാഘര്‍ ഖാലിബാഫ് ആവശ്യപ്പെട്ടു.

വെടിനിര്‍ത്തല്‍ കരാറില്‍ ലബനന്‍ ഉള്‍പ്പെടുന്നില്ലെന്നും ഇറാന്‍ ഉടന്‍ തന്നെ ഹോര്‍മുസ് കടലിടുക്ക് തുറന്നുകൊടുക്കണമെന്നും ട്രംപ് ആവശ്യപ്പെട്ടു. എണ്ണക്കപ്പലുകള്‍ കടത്തിവിടുന്നതില്‍ ഇറാന്‍ വീഴ്ച വരുത്തുകയാണെന്ന് ട്രംപ് സോഷ്യല്‍ മീഡിയയില്‍ കുറിച്ചു.

നയതന്ത്ര നീക്കങ്ങള്‍ പരാജയപ്പെട്ടാല്‍ ഇറാനെതിരെ ശക്തമായ സൈനിക നടപടി ഉണ്ടാകുമെന്ന സൂചനയും ട്രംപ് നല്‍കിയിട്ടുണ്ട്. അമേരിക്കന്‍ യുദ്ധക്കപ്പലുകളില്‍ അത്യാധുനിക ആയുധങ്ങള്‍ നിറയ്ക്കുകയാണെന്നും ചര്‍ച്ചകള്‍ പരാജയപ്പെട്ടാല്‍ അവ ഫലപ്രദമായി ഉപയോഗിക്കുമെന്നും ന്യൂയോര്‍ക്ക് പോസ്റ്റിന് നല്‍കിയ അഭിമുഖത്തില്‍ ട്രംപ് പറഞ്ഞു. ചര്‍ച്ചകളുടെ ഫലം അടുത്ത 24 മണിക്കൂറിനുള്ളില്‍ വ്യക്തമാകുമെന്നും അദ്ദേഹം കൂട്ടിച്ചേര്‍ത്തു.

2028-ലെ പ്രസിഡന്റ് തിരഞ്ഞെടുപ്പില്‍ മത്സരിക്കാന്‍ സാധ്യതയുള്ള വാന്‍സിന് ഈ ചര്‍ച്ചകള്‍ നിര്‍ണ്ണായകമാണ്. ചര്‍ച്ച വിജയിച്ചാല്‍ അത് അദ്ദേഹത്തിന്റെ വലിയ നേട്ടമാകും. എന്നാല്‍ പരാജയപ്പെട്ടാല്‍ അതിന്റെ ഉത്തരവാദിത്തവും അദ്ദേഹം ഏല്‍ക്കേണ്ടി വരും. 1979-ലെ ഇസ്ലാമിക വിപ്ലവത്തിന് ശേഷം ഇതാദ്യമായാണ് ഇത്രയും ഉയര്‍ന്ന തലത്തിലുള്ള ഒരു അമേരിക്കന്‍ സംഘം ഇറാനുമായി നേരിട്ടുള്ള ചര്‍ച്ചകള്‍ക്കായി എത്തുന്നത്.