ടെഹ്റാന്: അമേരിക്കയും ഇറാനും തമ്മിലുള്ള സമാധാന ചര്ച്ചകള് പുനരാരംഭിക്കാനുള്ള നിര്ണ്ണായക നീക്കങ്ങളുമായി പാകിസ്താന് കരസേനാ മേധാവി ഫീല്ഡ് മാര്ഷല് അസിം മുനീര് ഇറാനിലെത്തി. കഴിഞ്ഞ ആഴ്ച ഇസ്ലാമാബാദില് നടന്ന ഒന്നാംഘട്ട ചര്ച്ചകള് കരാറിലെത്താതെ പിരിഞ്ഞ പശ്ചാത്തലത്തിലാണ് ഉന്നതതല സൈനിക പ്രതിനിധി സംഘത്തോടൊപ്പം അസിം മുനീര് ടെഹ്റാനിലെത്തിയത്.
യു.എസ് പ്രസിഡന്റ് ഡൊണാള്ഡ് ട്രംപിന്റെ പുതിയ സന്ദേശവുമായാണ് പാക് സംഘത്തിന്റെ സന്ദര്ശനം. ചര്ച്ചകളുടെ രണ്ടാം ഘട്ടം വീണ്ടും ഇസ്ലാമാബാദില് തന്നെ നടത്തുന്നതിനെക്കുറിച്ച് ഇറാന് അധികൃതരുമായി ഇവര് ആശയവിനിമയം നടത്തും. മധ്യസ്ഥശ്രമങ്ങളില് അസിം മുനീര് വഹിക്കുന്ന പങ്കിനെ അമേരിക്കന് പ്രസിഡന്റ് ഡൊണാള്ഡ് ട്രംപ് പ്രശംസിച്ചു. വരാനിരിക്കുന്ന രണ്ട് ദിവസങ്ങള് നിര്ണ്ണായകമാണെന്നും ഇറാനുമായുള്ള സംഘര്ഷം അവസാനത്തോടടുക്കുകയാണെന്നും ട്രംപ് പ്രത്യാശ പ്രകടിപ്പിച്ചിരുന്നു.
അതേസമയം, ഇറാന്റെ തുറമുഖങ്ങളില് ഏര്പ്പെടുത്തിയിരിക്കുന്ന നാവിക ഉപരോധം തുടരുമെന്ന് അമേരിക്കന് സൈന്യം വ്യക്തമാക്കി. അമേരിക്ക ഉപരോധം നീക്കിയില്ലെങ്കില് റെഡ് സീ ഉള്പ്പെടെയുള്ള മേഖലകളിലെ വ്യാപാരങ്ങള് തടസ്സപ്പെടുത്തുമെന്ന് ഇറാന്റെ ജോയിന്റ് മിലിട്ടറി കമാന്ഡ് മുന്നറിയിപ്പ് നല്കി. നിലവില് അയ്യായിരത്തോളം പേരുടെ ജീവന് നഷ്ടപ്പെട്ട സംഘര്ഷത്തിന് അയവുവരുത്താനുള്ള പാകിസ്താന്റെ ഈ നയതന്ത്ര നീക്കത്തെ ലോകം അതീവ പ്രാധാന്യത്തോടെയാണ് നോക്കിക്കാണുന്നത്.
Related News
