ന്യൂദല്ഹി- പൊളിറ്റിക്കല് കണ്സള്ട്ടന്സി സ്ഥാപനമായ ഐ-പാകിനെതിരെ എന്ഫോഴ്സ്മെന്റ് ഡയറക്ടറേറ്റ് നടത്തിയ റെയ്ഡില് ഇടപെടല് നടത്തിയതിനെചൊല്ലി പശ്ചിമ ബംഗാള് മുഖ്യമന്ത്രി മമത ബാനര്ജിയെ രൂക്ഷമായി വിമര്ശിച്ച് സുപ്രീംകോടതി. ജസ്റ്റിസുമാരായ പി.കെ. മിശ്ര, എന്.വി. അഞ്ജരിയ എന്നിവരടങ്ങിയ ബെഞ്ചിന്റേതാണ് വിമര്ശനം. ഇത്തരം പ്രവൃത്തികളിലൂടെ ഒരു മുഖ്യമന്ത്രിക്ക് ജനാധിപത്യം തകര്ക്കാന് കഴിയില്ലെന്ന് കോടതി പറഞ്ഞു.
'ഇത് സംസ്ഥാനത്തിനും കേന്ദ്രത്തിനും ഇടയിലുള്ള ഒരു തര്ക്കമല്ല. ഒരു സംസ്ഥാനത്തിന്റെയും മുഖ്യമന്ത്രിക്ക് ഒരു അന്വേഷണത്തിനിടയിലൂടെ കടന്നെത്തി ജനാധിപത്യത്തെ അപകടത്തിലാക്കാനും കഴിയില്ല. എന്നിട്ട് സംസ്ഥാനവും കേന്ദ്രവും തമ്മിലുള്ള തര്ക്കമാക്കി മാറ്റരുത്. മുഖ്യമന്ത്രിയായ ഒരാള് മുഴുവന് ജനാധിപത്യത്തെയും അപകടത്തിലാക്കിയ പ്രവൃത്തിയാണിത്' കോടതി പറഞ്ഞു.
രാജ്യത്തെ പ്രമുഖ നിയമജ്ഞര് പോലും ഇങ്ങനെയൊരു സാഹചര്യം പ്രതീക്ഷിച്ചിരിക്കില്ലെന്നും കോടതി കൂട്ടിച്ചേര്ത്തു. മമതാ ബാനര്ജിയടക്കമുള്ളവര്ക്കെതിരെ സിബിഐ അന്വേഷണം ആവശ്യപ്പെട്ട് ആര്ട്ടിക്കിള് 32 പ്രകാരം ഇഡി ഉദ്യോഗസ്ഥര് നല്കിയ ഹരജിയിലായിരുന്നു കോടതിയുടെ നിരീക്ഷണങ്ങള്.
ഹരജിയുടെ നിലനില്പ്പ് ചോദ്യം ചെയ്തുകൊണ്ട് ബംഗാള് പോലീസ് ഉദ്യോഗസ്ഥനുവേണ്ടി ഹാജരായ അഭിഭാഷകന്റെ വാദങ്ങള്ക്ക് മറുപടി നല്കുകയായിരുന്നു കോടതി.
Related News
