ദമാം: തമിഴ്നാട്ടിലെ വാല്പ്പാറയില് മലപ്പുറം സ്വദേശികളായ പത്തു പേര് മരിക്കാനിടയായ ദുരന്തത്തില് അനുശോചനം രേഖപ്പെടുത്തി ദമാമിലെ കാല്പന്ത് പ്രേമികള്. ദമാം ഇന്ത്യന് ഫുട്ബോള് അസോസിയേഷന് (ഡിഫ) തുക്ബ ക്ലബ് സ്റ്റേഡിയത്തില് സംഘടിപ്പിച്ചു വരുന്ന എച്ച്.എം.ആര് - ഡിഫ ചാമ്പ്യന്സ് ലീഗ് മത്സര വേദിയിലാണ് ചടങ്ങ് സംഘടിപ്പിച്ചത്.
മലപ്പുറം പാങ്ങ് എല്.പി. സ്കൂള് അധ്യാപകരും കുടുംബാംഗങ്ങളും അടങ്ങുന്ന പത്തു പേരുടെ അപ്രതീക്ഷിത വിയോഗത്തില് സ്റ്റേഡിയത്തിലെത്തിയ കാണികളും കളിക്കാരും അഗാധമായ ദുഃഖം രേഖപ്പെടുത്തി. സ്റ്റേഡിയത്തില് ഒരു മിനിറ്റ് മൗനമാചരിച്ചാണ് കായികലോകം പരേതര്ക്ക് ആദരാഞ്ജലി അര്പ്പിച്ചത്. ഡിഫ പ്രസിഡന്റ് ഷമീര് കൊടിയത്തൂര്, ആക്ടിംഗ് ജനറല് സെക്രട്ടറി റഷീദ് ചേന്ദമംഗല്ലൂര്, ട്രഷറര് ജുനൈദ് നീലേശ്വരം, രക്ഷാധികാരികളായ സക്കീര് വള്ളക്കടവ്, മുജീബ് കളത്തില്, മറ്റു ഭാരവാഹികളായ സഫീര് മണലോടി, റാസിഖ് വള്ളിക്കുന്ന്, അനസ് മമ്പാട്, സുനീര് കല്ലായി, ഫതീന് മങ്കട, ടൈറ്റസ് വിന്സെന്റ്, മുഹമ്മദ് ജാഫര്, അന്വര് സജിത്, അന്ഷാദ് തുടങ്ങിയവര് ചടങ്ങില് സംബന്ധിച്ചു.
ഈദ് അവധിക്ക് ശേഷം പുനരാരംഭിച്ച ഡിഫ ചാമ്പ്യന്സ് ലീഗില് കഴിഞ്ഞ വാരാന്ത്യം മൂന്ന് മത്സരങ്ങള് നടന്നു. ആദ്യ മത്സരത്തില് യൂത്ത് ക്ലബ് കോബാറും യംഗ് സ്റ്റാര് ടൊയോട്ടയും തമ്മില് മാറ്റുരച്ചു. എതിരില്ലാത്ത ഏഴ് ഗോളുകള്ക്ക് യൂത്ത് ക്ലബ് തകര്പ്പന് വിജയം നേടി. രണ്ടാമത്തെ മത്സരത്തില് സി.എസ്.സി. സ്ട്രൈക്കേഴ്സും റെയിന്ബോയും ഏറ്റുമുട്ടിയെങ്കിലും മത്സരം ഗോള് രഹിത സമനിലയില് അവസാനിച്ചു.
ആവേശകരമായ മൂന്നാം മത്സരത്തില് ബദര് എഫ്.സിയും ഇ.എം.എഫ്. റാക്കയും തമ്മിലായിരുന്നു പോരാട്ടം. കളിയവസാനിക്കാന് മിനിറ്റുകള് മാത്രം ശേഷിക്കെ ദില്ഷാദ് നേടിയ ഏക ഗോളിന് ഇ.എം.എഫ്. റാക്ക വിജയിച്ചു. മുഹമ്മദ് സിയാദ് (യൂത്ത് ക്ലബ്), നിസാം മേലകത്ത് (റെയിന്ബോ), ദില്ഷാദ് (ഇ.എം.എഫ്.) എന്നിവര് മാന് ഓഫ് ദി മാച്ചായി തിരഞ്ഞെടുക്കപ്പെട്ടു. ടാക്സിറ്റ് സി.ഇ.ഒ. നൗഫല് പാരി മുഖ്യാതിഥിയായിരുന്നു. ഷനൂബ് കൊണ്ടോട്ടി, സന്തോഷ്, മഹ്റൂഫ് കൊണ്ടോട്ടി, അനസ് മങ്കട, അന്വര് സജിത് എന്നിവര് പുരസ്കാരങ്ങള് വിതരണം ചെയ്തു.
ചിത്രം: തുക്ബ ക്ലബ് സ്റ്റേഡിയത്തിലെ മത്സര വേദിയില് വാല്പ്പാറ ദുരന്തത്തില്പ്പെട്ടവര്ക്ക് ദമാം ഇന്ത്യന് ഫുട്ബോള് അസോസിയേഷന് (ഡിഫ) ആദരാഞ്ജലികള് അര്പ്പിക്കുന്നു.
Related News
