ജിദ്ദ- ഇക്കൊല്ലത്തെ ഹജ് തീര്ത്ഥാടനത്തിനെത്തുന്ന വിശ്വാസികളുടെ നടപടികള് സുഗമമാക്കുന്നതിന് ജനറല് ഡയറക്ടറേറ്റ് ഓഫ് പാസ്പോര്ട്ട് (ജവാസത്ത്) വിവിധ അന്താരാഷ്ട്ര പ്രവേശന കവാടങ്ങളില് അത്യാധുനിക 'മൊബൈല് കൗണ്ടറുകള്' സജ്ജീകരിച്ചു. ഹജ് യാത്ര കൂടുതല് സുരക്ഷിതവും വിശ്വസനീയവും ലളിതവുമാക്കുന്നതിന് ഏറ്റവും പുതിയ സാങ്കേതിക വിദ്യകള് ഉപയോഗിക്കുക എന്ന ലക്ഷ്യത്തോടെയാണ് ഈ സംവിധാനം നടപ്പിലാക്കിയിരിക്കുന്നത്.
പ്രായമായവര്ക്കും ശാരീരിക വെല്ലുവിളികള് നേരിടുന്നവര്ക്കും വലിയ ക്യൂകളില് നില്ക്കാതെ തന്നെ നടപടിക്രമങ്ങള് പൂര്ത്തിയാക്കാന് മൊബൈല് കൗണ്ടര് സഹായിക്കുന്നു. ബയോമെട്രിക് ഡാറ്റ ശേഖരണം, മുഖചിത്രം പകര്ത്തല്, പാസ്പോര്ട്ട് വിവരങ്ങള് വായിക്കല് എന്നിവ ഈ ഉപകരണത്തിലൂടെ അതിവേഗത്തില് നിര്വഹിക്കാനാകും. തീര്ത്ഥാടകര്ക്ക് ദീര്ഘനേരം കാത്തുനില്ക്കാതെ തന്നെ പ്രവേശന നടപടികള് പൂര്ത്തിയാക്കി വിശുദ്ധ മക്കയിലേക്കുള്ള യാത്ര തുടരാന് ഇത് വഴിയൊരുക്കുന്നു.
ഹജ് തീര്ത്ഥാടകരുടെ പ്രവേശന നടപടികളിലെ കാലതാമസം ഒഴിവാക്കാന് ജവാസത്ത് വിപുലമായ സജ്ജീകരണങ്ങളാണ് ഒരുക്കിയിരിക്കുന്നത്. വിമാനത്താവളങ്ങള്, കപ്പല് തുറമുഖങ്ങള്, കര അതിര്ത്തികള് എന്നിവിടങ്ങളില് മൊബൈല് കൗണ്ടറുകള് സജ്ജീകരിച്ചിട്ടുണ്ട്. തീര്ത്ഥാടകര്ക്ക് അവരുടെ ഇരിപ്പിടങ്ങളില് വെച്ച് തന്നെ നടപടികള് പൂര്ത്തിയാക്കാന് ജവാസത്ത് ഉദ്യോഗസ്ഥരെ ഈ ഉപകരണം സഹായിക്കുന്നു.
