റിയാദ്- ആണവ നിര്‍വ്യാപന കരാര്‍ ആഗോള സുരക്ഷാ ക്രമത്തിന്റെ അടിസ്ഥാന തൂണാണെന്ന് സൗദി അറേബ്യ ആവര്‍ത്തിച്ചു. ഉടമ്പടിയിലെ വ്യവസ്ഥകള്‍ പൂര്‍ണ്ണമായി നടപ്പിലാക്കണമെന്നും അതിന്റെ മൂന്ന് പ്രധാന ലക്ഷ്യങ്ങള്‍ക്കിടയില്‍ സന്തുലിതാവസ്ഥ നിലനിര്‍ത്തണമെന്നും രാജ്യം ആവശ്യപ്പെട്ടു. ലോകസമാധാനത്തിനുള്ള ഏക ഉറപ്പ് ആണവായുധങ്ങളുടെ സമ്പൂര്‍ണ്ണ ഉന്മൂലനമാണെന്ന് സൗദി അറേബ്യ വ്യക്തമാക്കി.

യുഎന്നിലെ സൗദി അറേബ്യയുടെ സ്ഥിരം പ്രതിനിധി ഡോ. അബ്ദുല്‍ അസീസ് അല്‍-വാസില്‍, പതിനൊന്നാമത് എന്‍പിടി അവലോകന സമ്മേളനത്തിലാണ് രാജ്യത്തിന്റെ നിലപാട് വ്യക്തമാക്കിയത്. ആണവായുധങ്ങള്‍ കൈവശമുള്ള രാജ്യങ്ങള്‍ നിരായുധീകരണ ബാധ്യതകള്‍ പാലിക്കണമെന്ന് അദ്ദേഹം ഊന്നിപ്പറഞ്ഞു. കൂടാതെ, അന്താരാഷ്ട്ര ആണവോര്‍ജ്ജ ഏജന്‍സിയുമായി സഹകരിച്ച് സമാധാനപരമായ ആവശ്യങ്ങള്‍ക്കായി ആണവോര്‍ജ്ജം ഉപയോഗിക്കാനുള്ള രാജ്യങ്ങളുടെ അവകാശത്തെ തടസ്സപ്പെടുത്തരുതെന്നും അദ്ദേഹം കൂട്ടിച്ചേര്‍ത്തു.

പ്രാദേശിക സുരക്ഷയുടെ പ്രാധാന്യത്തെക്കുറിച്ച് സംസാരിക്കവേ, സൗദിയിലെ സിവിലിയന്‍ കേന്ദ്രങ്ങള്‍ക്ക് നേരെ ഇറാന്‍ നടത്തിയ ആക്രമണങ്ങളെ അദ്ദേഹം അപലപിച്ചു. 2026-ലെ സുരക്ഷാ കൗണ്‍സില്‍ പ്രമേയം 2817 പ്രകാരം അന്താരാഷ്ട്ര സമൂഹം ഈ ആക്രമണങ്ങളെ തള്ളിക്കളഞ്ഞതാണ്. അയല്‍പക്ക മര്യാദകള്‍ പാലിക്കണമെന്നും ആഭ്യന്തര കാര്യങ്ങളില്‍ ഇടപെടരുതെന്നും ആവശ്യപ്പെട്ട സൗദി, ഇറാന്റെ ആണവപദ്ധതി സമാധാനപരമാണെന്ന് ഉറപ്പാക്കാന്‍ അവര്‍ ഐഎഇഎയുമായി പൂര്‍ണ്ണമായി സഹകരിക്കണമെന്നും വ്യക്തമാക്കി.

മിഡില്‍ ഈസ്റ്റ് മേഖലയെ ആണവായുധ വിമുക്തമാക്കുക എന്നത് അന്താരാഷ്ട്ര സമൂഹത്തിന്റെ കൂട്ടായ ഉത്തരവാദിത്തമാണെന്ന് സൗദി അറേബ്യ ചൂണ്ടിക്കാട്ടി. 1995-ലെ പ്രമേയത്തെ പിന്തുണച്ച രാജ്യങ്ങള്‍ക്ക് ഇതില്‍ വലിയ പങ്കുണ്ട്. ഇസ്രായേല്‍ ഈ ഉടമ്പടിയില്‍ ചേരാന്‍ വിസമ്മതിക്കുന്നത് മേഖലയെ ആണവായുധങ്ങളില്‍ നിന്നും മറ്റ് കൂട്ടനാശകാരികളായ ആയുധങ്ങളില്‍ നിന്നും മുക്തമാക്കുന്നതിന് വലിയ തടസ്സമാണെന്നും പ്രസംഗത്തില്‍ ഓര്‍മ്മിപ്പിച്ചു.