ജിദ്ദ- സൗദി പോര്ട്ട് അതോറിറ്റി (മവാനി) ചൈന യുണൈറ്റഡ് ലൈന്സിന്റെ പുതിയ ഷിപ്പിംഗ് സര്വീസായ 'SGX' ജിദ്ദ ഇസ്ലാമിക് പോര്ട്ടില് ആരംഭിച്ചതായി പ്രഖ്യാപിച്ചു. ആഗോള വിപണികളുമായുള്ള സൗദി അറേബ്യയുടെ ബന്ധം മെച്ചപ്പെടുത്തുന്നതിനും വിതരണ ശൃംഖലയുടെ കാര്യക്ഷമത വര്ദ്ധിപ്പിക്കുന്നതിനുമായാണ് ഈ പുതിയ ചുവടുവെപ്പ്. ലോകത്തെ ഏറ്റവും പ്രധാനപ്പെട്ട സമുദ്രപാതകളിലൊന്നായ ചെങ്കടല് വഴിയുള്ള വ്യാപാരത്തിന് ഈ പുതിയ സര്വീസ് വലിയ രീതിയിലുള്ള പിന്തുണ നല്കും.
പുതിയ സേവനം ജിദ്ദ ഇസ്ലാമിക് പോര്ട്ടിനെ ഷാങ്ഹായ്, നാന്ഷാ എന്നീ ചൈനീസ് തുറമുഖങ്ങളുമായും കൂടാതെ മലേഷ്യയിലെയും ഈജിപ്തിലെ സുഖ്നയിലെയും തുറമുഖങ്ങളുമായും ബന്ധിപ്പിക്കും. ഏകദേശം 2,452 സ്റ്റാന്ഡേര്ഡ് കണ്ടെയ്നറുകള് കൈകാര്യം ചെയ്യാന് ശേഷിയുള്ള കപ്പലുകളാണ് ഈ സര്വീസിനായി ഉപയോഗിക്കുന്നത്. ഇത് കിഴക്കന് ഏഷ്യന് വിപണികളിലേക്കും ആഫ്രിക്കന് മേഖലയിലേക്കുമുള്ള ചരക്ക് നീക്കം കൂടുതല് സുഗമമാക്കാന് സഹായിക്കും.
ആഗോള ലോജിസ്റ്റിക്സ് സൂചികകളില് സൗദി അറേബ്യയുടെ റാങ്കിംഗ് ഉയര്ത്തുന്നതിനും ആഭ്യന്തര കയറ്റുമതി പ്രോത്സാഹിപ്പിക്കുന്നതിനുമുള്ള 'മവാനി'യുടെ ശ്രമങ്ങളുടെ ഭാഗമായാണ് ഈ നടപടി. മൂന്ന് ഭൂഖണ്ഡങ്ങളെ ബന്ധിപ്പിക്കുന്ന ഒരു ആഗോള ലോജിസ്റ്റിക്സ് ഹബ്ബായി സൗദിയെ മാറ്റുക എന്ന ലക്ഷ്യത്തോടെയുള്ള നാഷണല് ട്രാന്സ്പോര്ട്ട് ആന്ഡ് ലോജിസ്റ്റിക്സ് സ്ട്രാറ്റജിക്ക് അനുസൃതമായാണ് ഈ പുതിയ സര്വീസ് വിഭാവനം ചെയ്തിരിക്കുന്നത്.
നിലവില് 62 മള്ട്ടി പര്പ്പസ് ബെര്ത്തുകളുള്ള ജിദ്ദ ഇസ്ലാമിക് പോര്ട്ട് അത്യാധുനിക സൗകര്യങ്ങളാല് സമ്പന്നമാണ്. സ്റ്റോറേജിനും പുനര് കയറ്റുമതിക്കുമായി പ്രത്യേക ലോജിസ്റ്റിക്സ് ഏരിയകള്, രണ്ട് വലിയ കണ്ടെയ്നര് ടെര്മിനലുകള്, സമുദ്ര ഗതാഗതത്തിനായി പ്രത്യേക സംവിധാനങ്ങള് എന്നിവ ഇവിടെയുണ്ട്. പ്രതിവര്ഷം 130 ദശലക്ഷം ടണ് ചരക്ക് കൈകാര്യം ചെയ്യാന് ശേഷിയുള്ള ജിദ്ദ തുറമുഖം പുതിയ സര്വീസിലൂടെ കൂടുതല് കരുത്താര്ജ്ജിക്കും.
Related News
