തിരുവനന്തപുരം: പ്രവാസി കേരളീയര്‍ക്കായുളള സമഗ്ര ആരോഗ്യ-അപകട ഇന്‍ഷുറന്‍സ് പദ്ധതിയായ 'നോര്‍ക്ക കെയര്‍ പ്ലസ്' പദ്ധതിയുടെ രണ്ടാംഘട്ട എന്റോള്‍മെന്റും ഇതിനായുളള പോര്‍ട്ടലിന്റെയും ഉദ്ഘാടനം 2026 ഓഗസ്റ്റ് 18 ന് മുഖ്യമന്ത്രി വി.ഡി സതീശന്‍ നിര്‍വഹിക്കും. വാര്‍ത്താസമ്മേളനത്തില്‍ നോര്‍ക്ക റൂട്ട്‌സ് ചീഫ് എക്‌സിക്യൂട്ടീവ് ഓഫീസര്‍ രാജേഷ് മാധവനാണ് ഇക്കാര്യം അറിയിച്ചത്. വാര്‍ത്താസമ്മേളനത്തില്‍ നോര്‍ക്ക റൂട്ട്‌സ് ജനറല്‍ മാനേജര്‍ പ്രകാശ് പി. ജോസഫ്, സെക്ഷന്‍ ഓഫീസര്‍ രമണി കെ. എന്നിവരും സംബന്ധിച്ചു.

പ്രധാന വിവരങ്ങള്‍:

എന്റോള്‍മെന്റ് തീയതി: 2026 ഓഗസ്റ്റ് 18 മുതല്‍ സെപ്റ്റംബര്‍ 18 വരെ.
പരിരക്ഷാ കാലയളവ്: 2026 ഏപ്രില്‍ 15 ന് പ്രാബല്യത്തില്‍ വന്ന പദ്ധതിയുടെ ശേഷിക്കുന്ന എട്ടു മാസത്തേയ്ക്കാണ് (2027 ഏപ്രില്‍ 14 വരെ) ഇപ്പോള്‍ എന്റോള്‍ ചെയ്യാന്‍ അവസരം ഉള്ളത്. ഇതിനനുസരിച്ച് പ്രീമിയത്തിലും മാറ്റങ്ങളുണ്ടാകും.
ഇന്‍ഷുറന്‍സ് സ്ലാബുകള്‍: 5 ലക്ഷം, 10 ലക്ഷം, 15 ലക്ഷം, 20 ലക്ഷം, 25 ലക്ഷം, 50 ലക്ഷം, 1 കോടി രൂപ എന്നിങ്ങനെ 7 വിവിധ സ്ലാബുകളിലാണ് പരിരക്ഷ ലഭ്യമാക്കുന്നത്.

ആര്‍ക്കൊക്കെ ചേരാം?:

18 മുതല്‍ 70 വയസ്സുവരെയുളള, സാധുവായ നോര്‍ക്ക പ്രവാസി ഐ.ഡി, സ്റ്റുഡന്റ് ഐ.ഡി, എന്‍.ആര്‍.കെ ഐ.ഡി എന്നിവയിലൊന്നുള്ള പ്രവാസികേരളീയര്‍ക്ക് എന്റോള്‍ ചെയ്യാം.
കുടുംബാംഗങ്ങള്‍ക്കും പരിരക്ഷ: 10 ലക്ഷം മുതല്‍ 1 കോടി രൂപ വരെയുളള പോളിസികളില്‍ പോളിസി ഉടമയുടെയോ പങ്കാളിയുടെയോ മാതാപിതാക്കളെയും (80 വയസ്സു വരെ) ഉള്‍പ്പെടുത്താനാകും.

ചികിത്സാ സൗകര്യങ്ങളും മറ്റ് സവിശേഷതകളും:

കേരളത്തിലെ 688-ലധികം ആശുപത്രികള്‍ ഉള്‍പ്പെടെ രാജ്യത്തെ 24,000-ത്തോളം ആശുപത്രികള്‍ വഴി ക്യാഷ്‌ലെസ്സ് ചികിത്സ ഉറപ്പാക്കുന്നു. പ്രമുഖ പൊതുമേഖലാ സ്ഥാപനമായ യുണൈറ്റഡ് ഇന്ത്യ ഇന്‍ഷുറന്‍സ് കമ്പനിയുമായി സഹകരിച്ചാണ് പദ്ധതി നടപ്പിലാക്കുന്നത്.

ഇതുവരെയുള്ള നേട്ടങ്ങള്‍:

നോര്‍ക്ക കെയര്‍, നോര്‍ക്ക കെയര്‍ പ്ലസ് പദ്ധതികളിലായി 138 രാജ്യങ്ങളില്‍ നിന്നുള്ള 1,62,000-ത്തോളം പ്രവാസി കുടുംബങ്ങള്‍ ഇതുവരെ എന്റോള്‍ ചെയ്തു.
2026 ജൂലൈ 31 വരെ 31,660 പോളിസി ഉടമകള്‍ക്ക് 227 കോടി രൂപ ക്ലെയിം ഇനത്തില്‍ നല്‍കി. 99.38% ക്ലെയിമുകളും തീര്‍പ്പാക്കിയെന്ന മികച്ച നേട്ടത്തോടെയാണ് പദ്ധതി രണ്ടാംഘട്ട എന്റോള്‍മെന്റിലേക്ക് കടക്കുന്നത്.

എന്റോള്‍ ചെയ്യേണ്ടത് എങ്ങനെ?

നോര്‍ക്ക റൂട്ട്‌സ് വെബ്‌സൈറ്റ് വഴിയോ (www.norkaroots.kerala.gov.in) നോര്‍ക്ക കെയര്‍ പ്ലസ് മൊബൈല്‍ ആപ്ലിക്കേഷനുകള്‍ (ആപ്പിള്‍ ആപ്പ് സ്റ്റോര്‍, ഗൂഗിള്‍ പ്ലേ സ്റ്റോര്‍) വഴിയോ പദ്ധതിയില്‍ രജിസ്റ്റര്‍ ചെയ്യാവുന്നതാണ്.