ജിദ്ദ- സൗദി അറേബ്യയിലെ കര, കടല്‍, വ്യോമ അതിര്‍ത്തികള്‍ വഴി കടത്താന്‍ ശ്രമിച്ച 879 നിരോധിത വസ്തുക്കള്‍ സകാത്ത്, ടാക്‌സ് ആന്‍ഡ് കസ്റ്റംസ് അതോറിറ്റി പിടികൂടി. സമൂഹത്തിന്റെ സുരക്ഷ ഉറപ്പാക്കുന്നതിനും അനധികൃത കടന്നുകയറ്റങ്ങള്‍ തടയുന്നതിനുമായി അതോറിറ്റി നടത്തുന്ന നിരന്തര പരിശ്രമങ്ങളുടെ ഭാഗമായാണ് ഈ നടപടി. ഹഷീഷ്, കൊക്കെയ്ന്‍, ഹെറോയിന്‍, ക്രിസ്റ്റല്‍ മെത്ത്, കാപ്റ്റഗണ്‍ ഗുളികകള്‍ തുടങ്ങി 71 ഇനം മയക്കുമരുന്നുകളും 364 തരം നിരോധിത പദാര്‍ത്ഥങ്ങളും ഇതില്‍ ഉള്‍പ്പെടുന്നു.

ലഹരിമരുന്നുകള്‍ക്ക് പുറമെ, പുകയില ഉല്‍പ്പന്നങ്ങള്‍ കടത്താനുള്ള 1,915 ശ്രമങ്ങളും കസ്റ്റംസ് പരാജയപ്പെടുത്തി. വിവിധ വിദേശ കറന്‍സികള്‍, ആയുധങ്ങള്‍, അവയുടെ അനുബന്ധ സാമഗ്രികള്‍ എന്നിവയും അതിര്‍ത്തികളില്‍ വച്ച് ഉദ്യോഗസ്ഥര്‍ പിടിച്ചെടുത്തു. രാജ്യത്തേക്കുള്ള ഇറക്കുമതിയിലും കയറ്റുമതിയിലും കസ്റ്റംസ് നിയന്ത്രണം കര്‍ശനമാക്കുന്നത് തുടരുമെന്നും, മറ്റ് സുരക്ഷാ ഏജന്‍സികളുമായി സഹകരിച്ച് രാജ്യത്തിന്റെ സമ്പദ്വ്യവസ്ഥയെയും സുരക്ഷയെയും സംരക്ഷിക്കുമെന്നും അതോറിറ്റി വ്യക്തമാക്കി.

കള്ളക്കടത്ത് തടയുന്നതില്‍ പൊതുജനങ്ങളുടെ പങ്കാളിത്തം അതോറിറ്റി അഭ്യര്‍ത്ഥിച്ചു. നിയമലംഘനങ്ങളെക്കുറിച്ചുള്ള വിവരങ്ങള്‍ നല്‍കുന്നതിന് 1910 എന്ന സുരക്ഷാ നമ്പറിലോ, 1910@zatca.gov.sa എന്ന ഇമെയില്‍ വിലാസത്തിലോ, അന്താരാഷ്ട്ര നമ്പറായ 009661910 ലോ ബന്ധപ്പെടാവുന്നതാണ്. വിവരങ്ങള്‍ നല്‍കുന്നവരുടെ രഹസ്യസ്വഭാവം പൂര്‍ണ്ണമായും സൂക്ഷിക്കുമെന്നും, കൃത്യമായ വിവരം നല്‍കുന്നവര്‍ക്ക് സാമ്പത്തിക പ്രതിഫലം നല്‍കുമെന്നും 'സാറ്റ്ക' അറിയിച്ചു.