ന്യൂയോര്ക്ക്- സാങ്കേതികവിദ്യയുടെ ലോകത്ത് ആപ്പിള് പ്രേമികള് ഏറെ ആകാംക്ഷയോടെ കാത്തിരിക്കുന്ന ഐഒഎസ് 27 അപ്ഡേഷന്റെ വിപുലമായ വിവരങ്ങള് പുറത്ത്. ജൂണ് 8-ന് നടക്കുന്ന ആപ്പിളിന്റെ വാര്ഷിക ഡെവലപ്പര് കോണ്ഫറന്സില് പുത്തന് ഓപറേറ്റിംഗ് സിസ്റ്റം കമ്പനി ഔദ്യോഗികമായി പരിചയപ്പെടുത്തുമെന്നാണ് റിപ്പോര്ട്ടുകള്. സിസ്റ്റത്തിന്റെ ഇന്റര്ഫേസിലും സ്മാര്ട്ട് ഫീച്ചറുകളിലും വലിയ മാറ്റങ്ങളോടെ എത്തുന്ന ഈ പതിപ്പ്, സെപ്റ്റംബര് മാസത്തോടെ ഉപയോക്താക്കളിലേക്ക് ഔദ്യോഗികമായി ലഭ്യമാക്കാനാണ് ആപ്പിള് ലക്ഷ്യമിടുന്നത്.
പുറത്തുവരുന്ന വിവരങ്ങള് അനുസരിച്ച്, എയര്പോഡ്സ് ക്രമീകരണങ്ങളിലാണ് പ്രധാന രൂപമാറ്റം പ്രതീക്ഷിക്കുന്നത്. കൂടുതല് ലളിതവും വ്യക്തവുമായ രീതിയില് ഓപ്ഷനുകള് ക്രമീകരിക്കാനും എളുപ്പത്തില് കൈകാര്യം ചെയ്യാനും സഹായിക്കുന്ന പുനര്രൂപകല്പ്പന ഇതിലുണ്ടാകും. കൂടാതെ, ആപ്പിളിന്റെ നിര്മ്മിത ബുദ്ധി സംവിധാനമായ 'ആപ്പിള് ഇന്റലിജന്സ്' കൂടുതല് കരുത്തുറ്റതാക്കും. ആപ്ലിക്കേഷനുകള്ക്കുള്ളിലെ ഇമേജ്, ഇമോജി നിര്മ്മാണ ടൂളുകളായ ജന്മൊജി , ഇമേജ് പ്ലേഗ്രൗണ്ട് എന്നിവയുടെ പ്രവര്ത്തനക്ഷമത വര്ദ്ധിപ്പിക്കുന്നത് ഇതിന്റെ ഭാഗമായാണ്.
കൂടാതെ യൂറോപ്യന് യൂണിയന് ഉള്പ്പെടെയുള്ള ചില പ്രത്യേക വിപണികളില്, ആപ്പിളിന്റെ സ്ഥിരം സംവിധാനമായ എയര്പ്ലേയ്ക്ക് പകരമായി ഗൂഗിള് കാസ്റ്റ് വഴിയുള്ള ഉള്ളടക്ക സ്ട്രീമിംഗിന് ഐഒഎസ് 27 അനുമതി നല്കിയേക്കുമെന്നും സൂചനകളുണ്ട്. ആപ്പിളിന്റെ വെര്ച്വല് അസിസ്റ്റന്റായ 'സിരി' ഇനി പുത്തന് ഡാര്ക്ക് ഡിസൈന് ഇന്റര്ഫേസിലും സ്വതന്ത്രമായ ഒരു പ്രത്യേക ആപ്പായും മാറിയേക്കും. ഇതോടൊപ്പം കീബോര്ഡ്, ആപ്പിള് മാപ്സ് എന്നിവയിലെ പരിഷ്കാരങ്ങളും സഫാരി, വാലറ്റ്, ഷോര്ട്ട്കട്ട്സ് തുടങ്ങിയ ആപ്പുകളില് നിര്മ്മിത ബുദ്ധിയുടെ കൂടുതല് മികച്ച സമന്വയവും ഐഒഎസ് 27-ലൂടെ ആപ്പിള് ഉപയോക്താക്കള്ക്ക് സമ്മാനിക്കുമെന്നാണ് പ്രതീക്ഷിക്കുന്നത്.
Related News
