മെക്സിക്കോ സിറ്റി: 2026 ഫിഫ ലോകകപ്പിന്റെ ആവേശകരമായ ഉദ്ഘാടന മത്സരത്തില് ദക്ഷിണാഫ്രിക്കയ്ക്കെതിരെ മെക്സിക്കോയ്ക്ക് മേല്ക്കൈ. എസ്റ്റാഡിയോ അസ്ടെക്കയില് നടക്കുന്ന മത്സരത്തിന്റെ ആദ്യ പകുതി അവസാനിക്കുമ്പോള് ഏകപക്ഷീയമായ ഒരു ഗോളിന് മെക്സിക്കോ മുന്നിലാണ്.
മത്സരത്തിന്റെ ഒമ്പതാം മിനിറ്റില് ജൂലിയന് ക്വിനോണിസാണ് ലോകകപ്പിലെ കന്നി ഗോള് നേടിയത്. റൗള് ജിമെനെസ് ഗോളിന് തൊട്ടടുത്തെത്തിയതിന് തൊട്ടുപിന്നാലെയാണ് മെക്സിക്കോ ആരാധകരെ ആവേശത്തിലാഴ്ത്തി ക്വിനോണിസിന്റെ ഗോള് പിറന്നത്. ദക്ഷിണാഫ്രിക്കന് ഗോള്കീപ്പര്ക്കിടയിലൂടെ പന്ത് വലയിലെത്തിച്ച ക്വിനോണിസ് സ്റ്റേഡിയത്തില് വലിയ ആരവമുയര്ത്തി.
ആദ്യ പകുതിയിലുടനീളം മെക്സിക്കോയുടെ സമ്പൂര്ണ്ണ ആധിപത്യമായിരുന്നു. ഇരുപതാം മിനിറ്റില് ക്വിനോണിസിന്റെ ശക്തമായ ഒരു ഷോട്ട് ക്രോസ് ബാറിന് മുകളിലൂടെ പറന്നപ്പോള്, ആദ്യ പകുതിയുടെ അവസാന നിമിഷം താരത്തിന്റെ മറ്റൊരു ശ്രമം പോസ്റ്റില് തട്ടി തെറിച്ചു. സൗദി പ്രോ ലീഗില് ക്രിസ്റ്റ്യാനോ റൊണാള്ഡോയെയും ഇവാന് ടോണിയെയും മറികടന്ന് മികച്ച ഫോമില് കളിക്കുന്ന ക്വിനോണിസ്, ഈ ഗോള് നേട്ടത്തോടെ ലോകകപ്പ് ചരിത്രത്തില് തന്റെ പേര് എഴുതിച്ചേര്ത്തു കഴിഞ്ഞു.
അതേസമയം, ആദ്യ പകുതിക്ക് ശേഷം ഡ്രസിംഗ് റൂമിലേക്ക് മടങ്ങുകയായിരുന്ന മെക്സിക്കോ പരിശീലകന് ഹാവിയര് അഗ്യുറെ അസിസ്റ്റന്റ് റഫറിയോട് തട്ടിക്കയറിയത് ശ്രദ്ധേയമായി. ബ്രയാന് ഗുട്ടിയെറസിന് മഞ്ഞക്കാര്ഡ് ലഭിക്കാന് കാരണമായ റഫറിയുടെ തീരുമാനത്തില് കടുത്ത അതൃപ്തി രേഖപ്പെടുത്തിയ അഗ്യുറെ, അത് തെറ്റായ തീരുമാനമാണെന്ന് ആംഗ്യങ്ങളിലൂടെ വ്യക്തമാക്കാന് ശ്രമിച്ചു.
തുടക്കത്തിലെ മികച്ച പ്രകടനം രണ്ടാം പകുതിയിലും നിലനിര്ത്താനായാല് മെക്സിക്കോയ്ക്ക് അനായാസം വിജയം സ്വന്തമാക്കാം.
