മെക്സിക്കോ സിറ്റി: 2026 ഫിഫ ലോകകപ്പിന് ഗംഭീര തുടക്കം കുറിച്ചുകൊണ്ട് ആതിഥേയരായ മെക്സിക്കോ വിജയത്തോടെ തുടങ്ങി. എസ്റ്റാഡിയോ അസ്ടെക്കയില് നടന്ന ഉദ്ഘാടന മത്സരത്തില് ഏകപക്ഷീയമായ രണ്ട് ഗോളുകള്ക്ക് ദക്ഷിണാഫ്രിക്കയെ മെക്സിക്കോ പരാജയപ്പെടുത്തി. അച്ചടക്ക നടപടികള് കൊണ്ട് ശ്രദ്ധേയമായ മത്സരത്തില് മൂന്ന് താരങ്ങളാണ് ചുവപ്പ് കാര്ഡ് കണ്ട് പുറത്തായത്.
മത്സരത്തിലുടനീളം ആധിപത്യം പുലര്ത്തിയ മെക്സിക്കോയ്ക്കായി ജൂലിയന് ക്വിനോണിസാണ് ലോകകപ്പിന്റെ കന്നി ഗോള് നേടിയത്. ആദ്യ പകുതിയില് തന്നെ ഗോള് നേടാനും ലീഡ് വര്ദ്ധിപ്പിക്കാനും ക്വിനോണിസിന് അവസരങ്ങള് ലഭിച്ചിരുന്നു. രണ്ടാം പകുതിയില് ബ്രയാന് ഗുട്ടിയെറസിനെ ഫൗള് ചെയ്തതിന് ദക്ഷിണാഫ്രിക്കന് താരം യായ സിത്തോളെ ചുവപ്പ് കാര്ഡ് കണ്ട് പുറത്തായതോടെ ദക്ഷിണാഫ്രിക്കന് പ്രതിരോധം തകര്ന്നു. അധികം വൈകാതെ മെക്സിക്കോയുടെ ഇതിഹാസ താരം റൗള് ജിമെനെസ് ഒരു തകര്പ്പന് ഹെഡറിലൂടെ മെക്സിക്കോയുടെ ലീഡ് രണ്ടാക്കി ഉയര്ത്തി.
തുടര്ന്ന് ദക്ഷിണാഫ്രിക്കന് താരം തെംബ സ്വാനെ വയലന്റ് കണ്ടക്ടിനെ തുടര്ന്ന് പുറത്തായതോടെ ദക്ഷിണാഫ്രിക്ക ഒന്പത് പേരായി ചുരുങ്ങി. എന്നാല്, പിന്നീട് മെക്സിക്കോയ്ക്കും തിരിച്ചടി നേരിട്ടു. സ്റ്റോപ്പേജ് ടൈമില് മെക്സിക്കന് പ്രതിരോധതാരം സീസര് മോണ്ടെസ് അശ്രദ്ധമായ ടാക്കിളിനെ തുടര്ന്ന് ചുവപ്പ് കാര്ഡ് വാങ്ങി പുറത്തായി.
മത്സരം അവസാനിച്ചതോടെ മെക്സിക്കോ സിറ്റിയില് ആഘോഷം അലതല്ലുകയാണ്. ലോകകപ്പിലെ മികച്ച തുടക്കം ആഘോഷമാക്കുന്ന മെക്സിക്കന് ആരാധകരുടെ ആവേശത്താല് സ്റ്റേഡിയം ഇപ്പോഴും മുഖരിതമാണ്.
Related News
