മിയാമി: 2026 ലോകകപ്പിലെ തങ്ങളുടെ ആദ്യ മത്സരത്തില്‍ ഉറുഗ്വേയ്ക്കെതിരെ സൗദി അറേബ്യയ്ക്ക് സമനില. മികച്ച പ്രകടനം കാഴ്ചവെച്ച സൗദി അറേബ്യന്‍ ഗോള്‍കീപ്പര്‍ മുഹമ്മദ് അല്‍-ഒവൈസിന്റെ തകര്‍പ്പന്‍ സേവുകളാണ് ടീമിന് നിര്‍ണ്ണായകമായ ഒരു പോയിന്റ് സമ്മാനിച്ചത്. ഗ്രൂപ്പ് എച്ചിലെ മറ്റൊരു മത്സരത്തില്‍ സ്പെയിനും കേപ് വേര്‍ഡും ഗോള്‍രഹിത സമനിലയില്‍ പിരിഞ്ഞതോടെ ഗ്രൂപ്പിലെ നാല് ടീമുകളും ഓരോ പോയിന്റുമായി ഒപ്പത്തിനൊപ്പമാണ്.

മത്സരത്തിന്റെ തുടക്കത്തില്‍ ഇരു ടീമുകളും ഏറെ ജാഗ്രതയോടെയാണ് കളിച്ചത്. എന്നാല്‍ 30-ാം മിനിറ്റില്‍ ഫെഡറിക്കോ വിനാസിന്റെ ഹെഡര്‍ തടുത്തിട്ടുകൊണ്ട് സൗദി ഗോളി അല്‍-ഒവൈസ് തന്റെ കരുത്ത് തെളിയിച്ചു. പിന്നീട് ലഭിച്ച കോര്‍ണര്‍ കിക്കുകളില്‍ നിന്നും സൗദി അറേബ്യ ഉറുഗ്വേന്‍ ഗോള്‍മുഖത്ത് നിരന്തരം ഭീഷണി ഉയര്‍ത്തി. 41-ാം മിനിറ്റില്‍ മുസാബ് അല്‍-ജുവൈറിന്റെ കോര്‍ണര്‍ കിക്കില്‍ നിന്ന് ഹസ്സന്‍ അല്‍-താംബക്തി തൊടുത്ത ഷോട്ട് ഉറുഗ്വേന്‍ ഗോളി ഫെര്‍ണാണ്ടോ മുസ്ലേര തടുത്തെങ്കിലും, റീബൗണ്ട് പന്ത് വലയിലെത്തിച്ച് അബ്ദുല്ല അല്‍-അമ്രി സൗദിക്ക് ലീഡ് സമ്മാനിച്ചു.

രണ്ടാം പകുതിയില്‍ കൂടുതല്‍ ആക്രമണോത്സുകമായാണ് ഉറുഗ്വേ കളത്തിലിറങ്ങിയത്. പകരക്കാരനായി ഇറങ്ങിയ അഗസ്റ്റിന്‍ കനോബിയോ സൗദി പ്രതിരോധത്തിന് വലിയ തലവേദന സൃഷ്ടിച്ചു. ഉറുഗ്വേയുടെ ശക്തമായ ആക്രമണങ്ങള്‍ക്കിടെ 80-ാം മിനിറ്റില്‍ സൗദി ഗോളിക്ക് പിഴച്ചു. മാനുവല്‍ ഉഗാര്‍ട്ടെയുടെ ഷോട്ട് അല്‍-ഒവൈസ് തടുത്തെങ്കിലും പന്ത് ലഭിച്ചത് മാക്‌സിമിലിയാനോ അരൂജോയുടെ കാലുകളിലായിരുന്നു. അദ്ദേഹം പന്ത് അനായാസം വലയിലെത്തിച്ച് ഉറുഗ്വേയ്ക്ക് സമനില നേടിക്കൊടുത്തു.

സമനിലയ്ക്ക് ശേഷവും ഉറുഗ്വേ സമ്മര്‍ദ്ദം തുടര്‍ന്നുവെങ്കിലും, അവിശ്വസനീയമായ സേവുകളുമായി അല്‍-ഒവൈസ് സൗദിയുടെ രക്ഷകനായി. മത്സരത്തില്‍ ഒമ്പത് തവണയാണ് അദ്ദേഹം ഉറുഗ്വേയുടെ ഗോള്‍ശ്രമങ്ങള്‍ വിഫലമാക്കിയത്. സ്റ്റോപ്പേജ് ടൈമില്‍ ഫെഡറിക്കോ വാല്‍വെര്‍ദെയുടെ ശക്തമായ ഷോട്ട് തട്ടിയകറ്റിയതും അല്‍-ഒവൈസിന്റെ മികവായിരുന്നു. മത്സരത്തില്‍ മാന്‍ ഓഫ് ദ മാച്ച് പുരസ്‌കാരവും അദ്ദേഹത്തെ തേടിയെത്തി.

ജൂണ്‍ 21-ന് സൗദി സമയം വൈകുന്നേരം 7 മണിക്ക് നടക്കുന്ന മത്സരത്തില്‍ സൗദി അറേബ്യ കരുത്തരായ സ്പെയിനെ നേരിടും. ജൂണ്‍ 22-ന് നടക്കുന്ന മറ്റൊരു മത്സരത്തില്‍ ഉറുഗ്വേ, ലോകകപ്പില്‍ അരങ്ങേറ്റം കുറിക്കുന്ന കേപ് വേര്‍ഡിനെ നേരിടും.